Sal 2
2
Ri Jehová kan rucha'on chik jun rey
1¿Achike roma yeyakatej ri tinamit,
y ri winaqi' nikich'obola' ri xa man jun rejqalen?
2Yeyakatej k'a ri q'atoy taq tzij kichin ri ruwach'ulew,
y ri tata'al nikiya' chikiwech,
richin yeyakatej chirij ri Jehová y ri rey ri rucha'on rija'.
3Nikibij k'a: Jo', Qojyakatej;
qaraq'ach'ij ri ximoj ri ruya'on chiqij.
¡qelesaj chiqij ri ximibel!, yecha'.
4Jak'a ri Dios ri k'o chila' chikaj xa xtitze'en,
kan nikikot ri ajaw chikij rije'.
5K'ari' rik'in janila royowal xkeruch'olij,
y kan xtusech kik'u'x.
6Y xtubij: Yin kan nucha'on chik ri rey pa ruwi' ri tinamit Sión,
ri nujuyu' ri k'o janila rejqalen, xticha'.
7Yin kan xtinya' rutzijol ri ruch'obonik ri Dios.
Ri Jehová kere' rubin chuwe:
Rat at nuk'ajol y yin in atata'.
8Tak'utuj k'a chuwe,
y yin xtinya' chawe ronojel ruwach'ulew richin xtawichinaj.
Kan chijun k'a ri ruwach'ulew xtok awichin.
9Rat xke'awulaj achi'el xa ta rik'in jun ch'ich',
xkek'is achi'el toq nipax jun bojo'y, xcha' chire.
10Chike ri rey y ri tata'al kichin ri tinamit,
xubij: Tiq'ax k'a chiwech y tibana' re ninbij chiwe.
11Tik'oje' k'a rukiy ri Dios chiwech toq nisamajij,
kixkikot k'a rik'in qasanri'il.
12Tiqasaj-iwi' chuwech ri k'ajolaxel richin man nipe ta royowal,
roma man xa xkixruk'is kan pa bey,
ri royowal rija' xa kan pa jun ti ramaj nuk'is ronojel.
¡Jebel ruwa-kiq'ij ri janipe' kikuquban kik'u'x rik'in, xcha' ri Dios.
Actualmente seleccionado:
Sal 2: KQC
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
Kaqchikel Bible © Bible Society in Guatemala, 2003.
