ᔨᕆᒤᐊᐅᑉ ᐅᒡᒍᐊᕐᓂᖏᑦ 3
3
ᓱᒋᐊᕐᑕᐅᓂᖅ, ᓵᖏᐊᕐᓂᕐᓗ, ᓂᕆᐅᒋᔭᒃᓴᖃᕐᓂᕐᓗ
1ᐅᕙᖓ ᑕᑯᓯᒪᕗᖓ ᐋᓐᓂᐊᑎᑕᐅᓂᕐᒥᒃ.
ᑖᑦᓱᒪ ᓂᓐᖓᐅᒪᓂᖓᑕ ᐊᓇᐅᑕᖓᓂᒃ!
2ᐅᖁᒤᑦᑐᒧᑦ ᐊᔭᐅᕐᐹᖓ
ᑖᕐᑐᒧᑦ ᖃᐅᒪᓂᖃᖏᑦᑐᒧᑦ.
3ᐅᕙᓐᓄᑐᐊᖅ ᐊᒡᒐᓂ ᓵᑉᐰᑦ,
ᐋᓐᓂᕐᓯᕐᑕᐅᔪᑎᑐᑦ ᑍᒤᑉᐳᖓ ᐅᓪᓗᓕᒫᖅ.
4ᐅᕕᓂᒐᓗ ᑎᒥᓕᒫᕋᓗ ᐃᓄᑐᖃᕐᑎᑐᑦ ᑕᐅᑦᑐᖃᓕᕐᑎᑉᐹ
ᓴᐅᓂᒃᑲᓗ ᓇᒡᒍᕐᓗᒋᑦ.
5ᐊᔪᓕᕐᑎᑉᐹᖓ ᑎᒍᔭᐅᓯᒪᔪᑎᑐᑦ ᖁᕕᐊᓇᖏᑦᑐᒧᑦ ᐅᖁᒤᒃᓴᕐᓇᕐᑐᒧᓪᓗ.
6ᑖᕐᑐᒥ ᐃᓂᖃᕐᑎᑉᐹᖓ ᑐᖁᓯᒪᔪᑦ ᐃᓂᖓᓃᑦᑐᑎᑐᑦ.
7ᐊᕙᓗᓕᐅᕈᑦᔭᐅᓯᒪᔪᑎᑐᑦ ᑍᒤᑦᑐᒦᑎᒻᒪᖓ ᕿᒫᕕᒃᓴᖃᕈᓐᓃᕐᐳᖓ
ᐊᕐᓵᕐᑑᔭᓄᓪᓗ ᕿᓚᒃᓱᕐᐹᖓ.
8ᑐᒃᓯᐊᕋᓗᐊᕋᒪ ᐃᑲᔪᕐᑕᐅᔪᒪᓪᓗᖓ, ᑐᒃᓯᐊᕐᓂᕋ ᒪᑐᕚ.
9ᐊᑐᕐᓂᐊᕐᑕᕋ ᓴᓇᓯᒪᔪᓂᒃ ᐅᔭᕋᓕᕐᓱᕐᓗᒍ ᓴᐱᕚ,
ᐊᖅᑯᑏᓪᓗ ᐊᑐᕐᓂᐊᕐᑕᒃᑲ ᓴᖑᐃᕐᑎᓪᓗᓂᒋᑦ.
10ᐅᑕᖅᑭᕚᖓ ᓇᓄᕐᑎᑐᑦ
ᐹᒻᒪᖓᓪᓗᓂ ᐆᒪᔪᕐᓂᐊᕐᑕᒥᓂᒃ ᐅᑕᖅᑭᔪᑎᑐᑦ
ᓛᔭᑎᑐᓪᓗ ᐃᔨᕐᓯᒪᔪᑎᑐᑦ.
11ᐊᖅᑯᑎᒋᔭᓐᓂᑦ ᐅᓂᐊᕐᓗᓂᖓ ᐅᒋᐊᕐᓴᕐᐹᖓ
ᕿᒤᓐᓇᕐᓗᓂᖓᓗ ᐃᓱᖃᖏᑦᑐᒧᑦ.
12ᐱᑎᒃᓵᕐᓂᐊᕐᑐᑎᑐᑦ ᖃᕐᔪᓄᑦ ᐆᒃᑕᕐᕕᒃᓴᓕᐊᕆᕚᖓ.
13ᐱᑎᒃᑲᒥᖓ ᐳᑐᒥᓵᕐᐹᖓ ᑎᒥᒐ.
14ᐃᓄᖕᓄᑦ ᐃᔪᕿᓴᐅᑎᑐᐃᓐᓇᐅᓕᕐᐳᖓ
ᒥᑕᐅᑎᒋᔭᐅᔪᒃᓴᑐᐃᓐᓇᐅᓕᕐᓗᖓᓗ.
15ᐋᓐᓂᐊᕈᑎᒃᓮᓐᓇᕐᓂᒃ ᒪᒪᖏᑦᑐᓂᒃ ᐃᒥᒐᒃᓴᖃᕐᑎᑉᐹᖓ.
16ᑮᓇᕋ ᓄᓇᒧᑦ ᐊᐳᕐᑕᕐᑎᒻᒪᒍ ᑭᒍᑎᒃᑲ ᓱᕋᒃᑎᕐᐳᑦ ᐅᔭᖅᑲᓄᑦ,
ᑐᓪᓕᕋᕐᓗᓂᖓᓗ ᐊᕐᔭᓕᓂᕐᓃᑎᑉᐹᖓ.
17ᓮᒪᓇᕐᑐᒦᓚᐅᕐᓯᒪᔪᓐᓁᕋᒪ ᐊᒡᓛᑦ ᐱᒃᓴᖃᑦᓯᐊᕐᓂᖅ ᐳᐃᒍᕐᐸᕋ.
18ᐅᖃᓕᕐᐳᖓᓕ, ᐃᓅᓯᑦᓯᐊᒥᒃ ᖃᐅᔨᒪᔭᖃᓐᖏᓕᕋᒪ
ᐊᑕᓂᖅ ᓂᕆᐅᒡᕕᒋᔪᓐᓃᕐᐸᕋ.
19ᐅᑯᒤᒃᓴᕐᓂᕋ ᐃᓱᒪᒋᓕᕌᖓᒃᑯ, ᓇᒧᓐᖓᕐᕕᒃᓴᖃᖏᓐᓂᕋᓗ,
ᓱᖓᕐᑎᑐᑦ ᖃᒃᑭᓐᓇᕐᑐᑎᑐᑦ ᑍᒤᑉᐳᖅ.
20ᑕᕐᓂᕐᒪ ᐃᓱᒪᒋᑦᓮᓐᓇᕐᐹ ᐅᖁᒤᒃᓴᕐᓂᕐᒧᓪᓗ ᑲᑕᒃᐸᓪᓕᐊᑐᐃᓐᓇᕐᐳᖓ.
21ᐃᖅᑬᔭᕌᖓᒪᓕ ᓂᕆᐅᒋᔭᒃᓴᕐᑖᕐᐸᒃᑭᕗᖓ:
22ᐊᑕᓂᐅᑉ ᓂᒡᓕᒍᓱᖕᓂᖓ ᑲᔪᓯᑦᓮᓐᓇᕐᐳᖅ,
ᓂᑲᒍᓱᖕᓂᖓ ᓄᖅᑲᓚᐅᕐᓯᒪᓐᖏᓚᖅ,
23ᐅᓪᓛᑎᑐᑦ ᓄᑖᓐᖑᕐᑎᑕᐅᕕᕾᓐᓇᐅᔭᕐᒪᑦ ᓱᕐᕋᔪᐃᑦᑑᓃᑦ ᐊᖏᔫᖕᒪᑦ.
24ᑕᕐᓂᕋ ᐅᖃᕐᐳᖅ, “ᐊᑕᓂᖅ ᐊᓯᖃᓐᖏᓚᖅ,
ᑖᑦᓱᒪᓂ ᓂᕆᐅᒡᕕᒃᓴᖃᕐᐳᖓ.”
25ᐊᑕᓂᖅ ᐱᐅᔪᒥᒃ ᐱᓂᐊᕐᕕᖃᕐᐳᖅ ᑖᑦᓱᒥᖓ ᐅᑕᖅᑭᔪᓄᑦ,
ᑕᕐᓂᕐᒥᒍᑦ ᕿᓂᕐᑐᓄᑦ.
26ᐊᑕᓂᐅᑉ ᐱᐅᓕᒃᓯᓂᒃᓴᖓ ᐅᑕᖅᑭᐊᕆᓗᒍ ᐱᐅᓂᕐᓴᐅᕗᖅ ᓂᐰᑦᑑᓗᓂ.
27ᐃᓄᒃ ᐃᓅᓱᒃᑑᓂᕐᒥᓂᑦ ᐱᔭᕐᓂᖏᑦᑐᒥᒃ ᖃᐅᔨᕙᒌᕈᓂ ᐱᐅᓂᕐᓴᐅᕗᖅ.
28ᓂᐰᑦᑑᓗᑕ ᐃᓄᑑᓗᑕ ᐃᒃᓯᕙᒃᔪᒃᓴᐅᕗᒍᑦ ᐊᑕᓂᐅᑉ ᑍᒤᑎᑉᐸᒍ.
29ᐅᑯᓗᑕ ᓇᖕᒥᓂᖅ ᑐᓂᔪᒃᓴᐅᕗᒍᑦ,
ᓂᕆᐅᒋᔭᒃᓴᖃᖁᓪᓗᑕ.
30ᐋᓐᓂᕐᑎᒋᔧᑦ ᒪᓂᑐᐃᓐᓇᕈᒃ ᓈᒻᒪᒋᑐᐃᓐᓇᕐᓗᒍᓗ.
31ᐊᑕᓂᖅ ᓇᕐᕈᒋᔭᖃᓐᖏᓚᖅ ᐃᓱᖃᖏᑦᑐᒧᑦ.
32ᕿᒃᓵᒃᑎᓚᐅᕋᓗᐊᕐᓗᓂᑎᒍᑦ, ᐃᓚᑦᓱᒍᓱᒍᒫᕐᐳᖅ
ᓇᒡᓕᒍᓱᖕᓂᖓ ᐃᓱᖃᖏᑦᑑᖕᒪᑦ.
33ᐱᔪᒪᔭᓂ ᒪᓕᒡᓗᒍ ᐋᓐᓂᐊᑎᑦᓯᑐᐃᓐᓇᕈᒪᓐᖏᓚᖅ ᕿᒃᓵᒃᑎᑦᓯᑐᐃᓐᓇᕈᒪᓇᓂᓗ.
34ᑎᒍᔭᐅᓯᒪᔪᑎᑑᓕᕐᑎᓪᓗᒍ ᐊᓂᕐᓂᕗᑦ ᐊᑕᓂᐅᑉ ᖃᐅᔨᒪᕔᑦ.
35ᖃᐅᔨᒪᖕᒪᑦ ᐱᔪᓐᓇᕐᓂᕐᑖᕐᑎᑕᐅᓯᒪᓂᕗᑦ
ᒪᓕᒡᓗᒍ ᐱᓇᓱᐊᕈᓐᓇᕐᑎᑕᐅᖏᑦᑕᕌᖓᑦᑕ ᖁᑦᓯᖕᓂᕐᐹᖑᔪᒧᑦ.
36ᖃᐅᔨᒪᕗᕐᓗ ᓇᓛᒎᕐᑐᒥᒃ ᐃᖅᑲᕐᑐᕐᑕᐅᖏᑦᑕᕌᖓᑦᑕ, ᐊᑕᓂᐅᑉ ᐊᖏᕐᓯᒪᖏᑕᖓᓂᒃ.
37ᐅᖃᐅᓯᕆᔭᑦᑎᓐᓂᒃ ᐊᑑᑎᔪᓐᓇᕋᔭᓐᖏᓚᒍᑦ ᐊᑕᓂᐅᑉ ᑍᒤᑎᖏᑉᐸᒍ.
38ᖁᑦᓯᖕᓂᕐᐹᖑᔫᑉ ᐱᖁᔨᓂᖓᓄᑦ ᐱᐅᔪᑦ ᓈᒻᒪᖏᑦᑐᓪᓗ ᐊᑑᑎᕙᒃᑭᕗᑦ.
39ᐊᑲᐅᒃᓴᖏᓪᓗᑕ ᐅᖃᕐᐸᒃᑐᒃᓴᐅᕕᑖ ᐊᔪᕐᑐᓕᓂᑦᑎᓐᓄᑦ ᓱᒋᐊᕐᑕᐅᔭᕌᖓᑦᑕ?
40ᐱᐅᓯᕆᔭᕗᑦ ᕿᒥᕐᕈᓗᒋᑦ ᖃᐅᔨᓴᓚᐅᕐᓚᕗᑦ, ᐊᑕᓂᕐᒧᓪᓗ ᐅᑎᕐᓗᑕ.
41ᐆᒻᒪᑎᕗᑦ ᐅᒃᑯᐃᑦᓯᐊᕐᓗᒋᑦ ᒎᑎᒧᑦ ᐅᖃᕐᓗᑕᓗ,
42“ᐊᔪᕐᑐᓕᓚᐅᕐᐳᒍᑦ ᐃᓕᖕᓄᑦ ᐊᑕᓃᖅ,
ᐊᑭᕋᕐᑐᕐᓯᒪᒐᑦᑎᒋᓪᓗ ᐃᓱᒪᒋᔪᓐᓁᕐᕕᒋᓯᒪᓐᖏᓚᑦᑎᒍᑦ.
43ᓂᓐᖓᕕᒡᔪᐊᕐᓂᕐᒧᑦ ᑎᑭᑕᐅᒐᕕᑦ ᐅᕙᑦᑎᓐᓂᒃ ᒪᓕᒡᓗᑎᑦ
ᓂᑲᒋᓇᑕ ᑐᖁᕋᕐᑕᐅᑎᓚᐅᕐᐸᑦᑎᒍᑦ.
44ᓂᓐᖓᓗᐊᕐᓂᕐᓄᑦ ᓄᕗᔭᒧᑦ ᐅᓕᒃᑕᐅᓯᒪᔫᔮᓕᓚᐅᕐᐳᒍᑦ
ᓄᕗᔭᐅᓪᓗ ᐃᑦᔪᓗᐊᕐᓂᖓᓄᑦ ᑐᒃᓯᐊᖕᓂᕗᑦ ᑐᓴᕈᓐᓁᓪᓕᓚᐅᕐᐸᑎᑦ.
45ᓯᓚᕐᔪᐊᕐᒥᐅᓄᑦ ᐃᒋᑦᓯᕕᒃᓴᕆᔭᐅᔪᑎᑐᑦ ᑍᒤᑦᑑᑎᓚᐅᕐᐸᑦᑎᒍᑦ ᐃᓄᐃᑦ ᐊᑯᕐᖓᓐᓂ.
46ᐊᑭᕋᓕᒫᕗᑦ ᖃᓂᑎᒃ ᒪᑐᐃᕐᐹᑦ ᐊᑭᕋᕐᑐᕐᓗᑕ.
47ᑲᑉᐱᐊᓇᕐᑐᑎᒍᑦ ᐊᓯᕈᕐᑕᐅᓇᕐᑐᑎᒍᓪᓗ ᐊᑑᑎᓚᐅᕐᐳᒍᑦ,
ᓯᕘᕋᓇᕐᑐᒥᒃ ᐊᑦᑕᕐᓇᕐᑐᓂᓗ ᐃᓅᕕᖃᓚᐅᕐᐳᒍᑦ.
48ᐃᔩᒃᑲᒃ ᕿᐊᓂᕐᒧᑦ ᖁᕝᕕᓂᒃ ᑰᑐᐃᓐᓇᓕᕐᐴᒃ
ᐃᓄᖁᑎᒪ ᐊᓯᕈᕐᑕᐅᓂᖏᑦ ᐱᓪᓗᒋᑦ.
49ᐃᔩᒃᑲᒃ ᑯᕕᔪᓐᓃᕈᓐᓁᓪᓕᕘᒃ.
50ᐊᑕᓂᕐᒧᑦ ᑕᑯᔭᐅᓚᐅᖏᓐᓂᓐᓂ ᕿᓚᖕᒥᑦ.
51ᐃᔨᒪ ᕿᒃᓵᒃᑎᑉᐹᖓ
ᐊᕐᓇᖁᑎᕗᑦ ᐃᒡᓗᒐᓴᒡᔪᐊᓂ ᑕᑯᔭᒃᑲ ᐱᓪᓗᒋᑦ.
52ᑎᖕᒥᐊᑎᑐᑦ ᐱᔭᐅᓇᓱᒃᐳᖓ ᐊᑭᕋᓄᑦ ᐱᑦᔪᑎᒃᓴᖃᕋᑎᒃ.
53ᐃᑎᕐᓴᒧᑦ ᐃᒋᓪᓗᖓ ᑐᖁᓐᓇᓱᐊᕐᐹᖓ ᐅᔭᕋᖕᓄᑦ ᒥᓪᓗᕐᓗᖓ.
54ᐃᒪᕐᒧᑦ ᑎᑭᑕᐅᒐᒪ ᐃᓅᕕᒃᓴᖃᕋᓱᒋᔪᓐᓃᓚᐅᕐᐳᖓ.
55ᐊᑕᓃᖅ, ᐃᓗᖏᕐᑐᕐᓗᖓ ᕿᓄᕕᒋᓚᐅᕐᐸᒋᑦ ᐃᑎᕐᓴᒦᕝᕕᒋᔭᓐᓂᑦ.
56ᐊᔪᐃᓐᓇᕐᓗᖓ ᕿᓄᓕᕋᒪ ᑐᓴᕐᑕᐅᔪᒪᓪᓗᖓ ᑐᓴᕈᓐᓇᓚᐅᕐᐳᑎᑦ.
57ᕿᓄᕕᒋᒐᒃᑭᑦ ᖃᒡᓕᓪᓗᑎᑦ ᐅᖃᓚᐅᕐᐳᑎᑦ, ‘ᑲᑉᐱᐊᓱᖏᓪᓗᑎᑦ.’
58ᓴᐳᑎᔭᕐᑐᓚᐅᕐᐸᕐᒪ, ᐊᑕᓃᖅ; ᐱᐅᓕᓪᓗᖓᓗ.
59ᓯᕐᓂᒋᓚᐅᓐᖓ ᖃᐅᔨᒪᒐᕕᑦ ᓱᓕᖏᑦᑐᒥᒃ ᐊᑲᐅᖏᑦᑐᒥᒡᓗ ᐱᓂᐊᕐᕕᐅᓯᒪᓂᓐᓂᒃ.
60ᖃᐅᔨᒪᓪᓗᑎᓪᓗ ᐊᑭᕋᕐᑐᕐᑎᒪ ᐅᓄᕐᓂᖏᓐᓂᒃ,
ᑎᕐᓕᓈᕆᔪᒪᓪᓗᑎᒡᓗ ᐋᖅᑭᒃᓱᐃᓯᒪᕙᖕᓂᖏᓐᓂᒃ.
61ᐊᑕᓃᖅ ᐊᑭᕋᕐᑐᕋᓱᖕᓂᖏᑦ ᑐᓴᕐᓯᒪᒐᕕᒋᑦ,
ᑎᕐᓕᓈᕆᓪᓗᑎᒡᓗ ᐱᓂᕐᓗᐃᓇᓱᐊᖃᑦᑕᖕᓂᖏᑦ.
62ᐅᓪᓗᓕᒫᖅ ᖃᓄᐃᓕᓗᑎᒃ ᓱᒃᑯᐃᒐᔭᕐᒪᖔᕐᒥᒃ ᑐᑭᑖᕋᓱᐊᖃᑦᑕᕐᐳᑦ.
63ᑕᑯᓚᐅᒃᑭᑦ, ᐅᕙᓐᓂᒃ ᒥᑕᐅᑎᖃᕐᐳᑦ ᖃᓄᓕᒫᖅ ᐃᓐᖏᕈᓯᓕᐊᒥᒃᑎᒍᓪᓗ ᐊᒡᓛᑦ.
64ᐊᑕᓃᖅ ᓱᒋᐊᓚᐅᒃᑭᑦ ᐱᓂᐊᕐᓂᖏᑦ ᒪᓕᒡᓗᒋᑦ.
65ᐆᒥᒋᔭᒃᓴᓐᖑᕐᑎᓪᓗᒋᑦ ᖁᕕᐊᓇᖏᑦᑐᒧᐊᕐᑎᓚᐅᒃᑭᑦ.
66ᓂᓐᖓᕕᒃᔪᐊᕐᓂᕐᓄᑦ ᓇᓂᓗᒋᑦ ᓄᖑᑕᐅᑎᓚᐅᒃᑭᑦ.”
Actualmente seleccionado:
ᔨᕆᒤᐊᐅᑉ ᐅᒡᒍᐊᕐᓂᖏᑦ 3: EAIB
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
Eastern Arctic Inuktitut Bible © Canadian Bible Society, 2012, 2021-2023.
