Luke 19

Jesus ma Zacchaeus

1Jesus ne poi ki roto i Jericho, ma e faka sara iei. 2Te ariki o faoa tari takisi, na ingoa ko Zacchaeus, koia te taufenua. 3Koia na fifia e maatea rei ke ono mata kia Jesus, kae koia te tangata potu lake, si se nai ravea ina ko Jesus natafito i te kano fenua. 4Tera koia ne rere o mua i te kano fenua, o kake i te raakau e ati ʻsekamoʼ ke nai ravea ina ko Jesus ka fenatu i ngangea. 5Tera vasia o Jesus ne au ki ngangea, koia ne pula ake ki runga, nai ravea rei ko Zacchaeus i fongo raakau, muna atu arei kiei, “Zacchaeus ee, ifo ifo ki raro faka vave, natafito taua ka fare i tou paito i te aso nei.”

6Zacchaeus ne ifo faka vave ki raro, o faka afea ea koia ko Jesus ki na paito, ma te mata mau sapa. 7Te kano fenua kaatoa ne ono mata kiei, ku fakatafito o fe nguu aki, “Te tangata nei ku uru i te paito o te tangata titisara!”

8Zacchaeus ne tuu ake ki runga, muna atu rei ki te Ariki, “Te Ariki ee! Fakarongo, kuou ka vae o sori ko te vae rua oku kope kopenga nei ki te faka arofa. Kae pe koai ne kau toka roto ria, ka siaki faka faa kiei.”

9Tera muna atu rei ko Jesus kiei, “Te faka sao ku au ki te paito nei i te aso nei. Te tangata nei fokia e afu mai ia Abraham. 10#Mat 18.11.Natafito te Tama a Tangata ne au ke faara, ma ke faka sao ko te kano fenua ne lleku.”

Te araara fanga faka tautau ki te foi ʻgoldʼ

(Mat 25.14–30)

11Tera mo vasia o te kano fenua e fakarongo kiei, Jesus ne araara faki arei ko te araara fanga faka tautau kia ratou, natafito koia ku piri ki Jerusalem, ma te kano fenua ku maanatu rei, te Kainanga o Tupua ku fai ke faka saa. 12Tera muna rei koia, “Nai take vasia te afu ariki, koia ne poi rei ki te fenua mmao rei ke sau ariki iei, oti foki mai raa ki na noforanga. 13Kae na vasia ka poi iei, koia ne karanga ki ana faoa fai fekau e tino angafuru, sori sori rei ko aratou foi ʻgoldʼ kia ratou, kae muna atu rei kia ratou, ‘Oono rei pe nia ka kotou maua ia nea nei i oku mo vasia ka poi iei.’ 14Kae ko ana kee kanofenua ia ku teke kiei, tera koratou ne kau ko faoa kave rongo ke oo atu i ana tua o muna atu kiei, ‘Komatou si see fifia ki te tangata nei ke fai matou tii.’

15“Vasia te tangata ne fai te tii fakaoti rei, foki mai rei ki na noforanga. Ia mo vasia koia ne muna ki ana faoa fai fekau ke oomai kia koia ke maataki mua e fia aratou ne mau mai. 16Te mataki tangata ne au, muna atu rei, ‘Maurunga ee, a aku ne mau mai e fuanga furu i tau foi ʻgoldʼ ne sori mai.’ 17Tongoi atu rei na ariki, ‘Au fainga fekau e maatea rei na laoi. Faina i tau fai faka poto kia punai fainga fekau, kuou ka tuku atu ke oono ia noforanga lasi e fuanga furu.’ 18Na toka rua ne au, muna atu rei, ‘Maurunga ee, a aku ne mau mai e rima i tau foi ʻgoldʼ ne sori mai.’ 19Muna atu rei koia kiei, ‘Kuou ka tuku atu ke oono ia noforanga lasi e rima.’ 20Take fai fekau ne au, muna atu rei, ‘Maurunga ee, tau foi ʻgoldʼ teinei, ne tuku ea kuou ne fuu ruru rei ki pakaa rafi. 21Kuou e faka mataku kia kee, natafito ko kee te tangata faingataa. Ko kee e sau a nea siei a au ne tuku. Ka ko kee e tau tofi rei kia tofi se ne kee tokia.’ 22Tongoi atu rei na ariki, ‘Ko kee te seka pariki! Kuou ka fai au kee taranga ia ke fai pariki ko kee! Ku kee iroa ina kuou te tangata faingataa, e kau saua kesea ria koa nea siei a aku ne tuku, ma ne fai kai kia kai, se ne kau tokia ria. 23Tera arei, sea rei ia na atamai, si se ne fao ea ko kee aku mane ki te panki? Ke fai ko ana foi mane fakatausara i toku vasia ka foki mai o sau kese iei.’ 24Tera muna atu rei koia kia koratou e turaki i ngangea, ‘Sau kese mai te foi ʻgoldʼ naa, o sori ki te seka e fai ko ana foi ʻgoldʼ e fuanga furu.’ 25Kae koratou e muna atu kiei, ‘Maurunga ee, ku fai ko ana foi ʻgoldʼ e fuanga furu!’ 26#Mat 13.12; Mak 4.25; Luk 8.18.Tongoi atu rei koia kia ratou, ‘Kuou e muna kia kotou, tera pe koai e fai faka laoi pe nia ma ana e fai, ta ka fai ka sori kiei e rava, kae pe koai e fai pe nia ma ana e molakea, maafa rei ana nea e molakea e fai, ka saua kese ma koia. 27#Mat 25.14–30.Kae kia ratou oku tau firi firi, koratou se ne fifia kia kuou ke fai ratou tii: Aumai koratou ki kunei ke taa ke mmate i aku mua!’ ”

Jesus e uru ma te maaroo ki Jerusalem

(Mat 21.1–11; Mak 11.1–11; Jon 12.12–19)

28Ia tua o Jesus ku oti na muna iei, koia ne mua ia ratou, o poi ki Jerusalem. 29Vasia koia ne au piri piri mai ki Bethphage ma Bethany, i te Maunga i Olive, koia ne fakkau e toka rua i na kau fanonga, ke mua i mua, 30ma a taranga, “Oro ki te noforanga e tuu mai i mua. Toru vasia e oro iei, ka koru maua ria te tamai manu e ati te ʻdonkeyʼ e noa, siei pe koai ne sopo ki na tua. Vevete ea korua, aumai rei ki kunei. 31Kae pe koai e fesiri atu kia korua, ‘Sea na atamai e koru vetea?’ faka ari atu rei kiei, ‘Te Ariki e fifia kiei.’ ”

32Koraua ne oro, rau maua rei koa nea kaatoa fakapera rei pea Jesus ne faka ari atu kia raua. 33Vasia koraua e vete te manu iei, nga taangata aratou ko te manu, ne karanga atu kia raua, “Sea na atamai korua e vete ko te manu naa?”

34Tongoi atu rei koraua, “Te Ariki e fifia kiei.” 35Tera kave rei ea raua kia Jesus.

Koratou ne fora ko aratou suru ki te tua o te manu, faka sopo rei ko Jesus, ke nofo ki na tua. 36Vasia koia e poi iei, te kano fenua e fora saere ko aratou suru ki te riu ara.

37Vasia koia ku au piri piri ki Jerusalem, ki te ngangea o te riu ara e ifo ki raro i te Maunga i Olive, e tokkapi te kano fenua o na kau fanonga ne fakatafito o rausapai ki Tupua ma e faka ue ue kia matuaa nea kaatoa koratou ne ono mata kiei:

38“Tupua ke nai fakatapu ria te Tii e au i te ingoa o te Ariki Tapu!

Roto mafora ki te vaerangi,

ma te taurekareka ki Tupua!”

39Tera a rake Pharisee i te kano fenua ne karanga atu kia Jesus, “Fakaako ee, muna atu ki tou kau fanonga ke faka tturi!”

40Tongoi atu rei ko Jesus, “Kae koratou ke faka tturi, kuou ka faka ari atu kia kotou, ko nga fatu maso koratou ka foorua.”

Jesus e arofa ki Jerusalem

41Koia ku au ku piri piri mai ki Jerusalem, kae i na vasia ne ono kiei, koia ne arofa ma e tangi kiei. 42Muna rei koia, “Kae ko kotou pe ne kotou iroa ina fuarei pe nia e ma fai ke faia ria te roto mafora! Kae vasia nei, ka see kotou ravea ina! 43Te aso ka au i vasia otou taangata tau firi firi ka ratou riikofia ina kotou, saisai tiaina kotou, ma ratou mono mono tiaina kotou i nga faasi kaatoa. 44Ka ratou faka ngaromia ina kotou fakaoti rei, ko te noforanga lasi nei ma a nea kaatoa rei, siei rei se foi fatu ma pe sea ka tukuna ria ke teka, natafito kotou se ne kotou matea ina te vasia fea o Tupua ne au ke faka sao kotou!”

Jesus e poi ki te Paito Tapu

(Mat 21.12–17; Mak 11.15–19; Jon 2.13–22)

45Tera ko Jesus ne poi ki rota Paito Tapu, tafito rei o nai fueina kese ko faoa fai tauvi. 46Muna atu rei koia kia ratou, “E tusia riaina i te Pepa Tapu,

‘Ko Tupua ne muna:

Toku paito ka fai te paito rotu,

kae kotou ne furi saki ea kotou ma faka leku otou kaiaa ranga!’ ”

47 # Luk 21.37. Jesus e fakaako mau i nga aso katoa i rota Paito Tapu. Nga ariki fai kava, nga fakaako oa Fono, ma nga taki o te kano fenua ne fifia ke ratou tamatea ria ko Jesus, 48kae see ratou maua ria pe nia ma ratou ke fai atu kiei, natafito te kano fenua katoa ratou fifia e maatea rei ke fakarongo kiei, si see fifia rei ke faka too ko se foi taranga sokotasi.

Actualmente seleccionado:

Luke 19: TKP

Destacar

Copiar

Comparar