Luke 18

Te araara fanga faka tautau ki te maatua fafine faka arofa

1Tera ko Jesus ne nai araara fakina kia ratou ko te araara fanga faka tautau nei, ke fakaako ko na kau fanonga ke rotu i nga vasia katoa, ka see faka motu. 2Koia ne nai munakina, “I te noforanga te tangata oa fono e nofo, koia si se nai raua ina ko Tupua, si se nai faka epa riaina ko nga taangata. 3Kae te maatua fafine faka arofa i te noforanga, koia e au mau rei kiei, o kaisi atu ki tana sosoa ke tuu fakatau ki faoa e fai pariki mai kia koia. 4Ku rava rei ana vasia o maatua faka arofa e au o kaisi atu kiei, kae si see fifia. Kae kia muri rei, koia ku muna maso koia, ‘Maafa rei onia kuou ku see kau raua riaina ko Tupua, pe kau faka epa riaina ko nga taangata, 5kae kuou ku soo rei oku roto i maatua fafine faka ruru faka arofa nei, natafito koia koi au rei o kaisi mai ke kau sosoa ake kia koia. Kuou pe see fai o sosoa ake kia koia, koia ka au mau arei kia kuou! Kuou ka maatea rei toku pupu taamaki!’ ”

6Tera te Ariki koi muna rei, “Fakarongo pe nia ma te tangata oa fono toka roto e muna kiei naa. 7Kae ea Tupua ka si se nai soakina fuarei ko na kee kanofenua ia ne sau e ttangi kiei te poo ma te ao? Kae ea tana sosoa ka tuei mai kia ratou? 8Kuou ka faka ari atu kia kotou: Koia ka maataki koratou i faka faoa, ma ka fai faka vave.

“Kae ea, te Tama a Tangata ka nai maua ria ko se paanaki ia taangata nei i na vasia ka au iei?”

Te araara fanga faka tautau ki te Pharisee ma te tangata tari taakisi

9Jesus fokia ne araara faki ko te araara fanga faka tautau ki te kano fenua koratou e fai fakapuu kia koratou fuarei, kae fai pariki rei ki faoa kaatoa: 10“Nai take vasia, a taangata toka rua ne oro ki rota Paito Tapu ke rotu, take tangata te foi Pharisee, take tangata te tangata tari takisi. 11Te Pharisee ne tuu mmao rei maso koia o rotu, ‘Kuou e faka ue ue kia ko kee, Tupua, kuou si see totomatua, taataa laoi, pe faka mee vare pe rake faoa. Kuou e faka ue ue kia ko kee, kuou ku si se fai pe te tangata tari takisi e tuu mai. 12Kuou e faka naa mangumangu i oku foi aso e rua i te wiki sokotasi, ma kuou e sori atu te faka fuanga furu o toku taufenua.’

13“Kae te tangata tari takisi e tuu mmao mai rei, si see rangai rei ko ana mata ki te vaerangi, kae tuki ko na fata fata, ma e tangi ki Tupua, ‘Tupua ee, arofa mai kia kuou, kuou te tangata titisara!’ ”

14 # Mat 23.12; Luk 14.11. Muna rei ko Jesus, “Kuou ka faka ari atu kia kotou: Te tangata tari takisi, ma siei ki te foi Pharisee, ne tonu ma Tupua vasia koia ne poi ki na noforanga. Natafito pe koai e faka sapa maso koia, ka tukuna ria ki raro, kae pe koai e tuku raro maso koia, ka faka sapa ria.”

Jesus e fakatapu ko nga tamariki

(Mat 19.13–15; Mak 10.13–16)

15A rake faoa ne tari mai aratou punai memea kia Jesus, ke tuku ifo ko na rima kiei, kae fue kese rei e na kau fanonga ko faoa nei. 16Kae karanga atu rei ko Jesus ki nga tamariki ke oomai kia koia ma ne muna atu, “Tuku ko nga tamariki ke oomai kia kuou, ma kau see fai o pii koratou, natafito te Kainanga o Tupua mo fai faoa faka peinei. 17Kuou e faka ari atu kia kotou te maori: Pe koai ka se nai saua ko te Kainanga o Tupua pe te punai tama riki riki, ka se nai urufia ina.”

Te tangata taufenua

(Mat 19.16–30; Mak 10.17–31)

18Te taki o nga Jew ne fesiri atu kia Jesus, “Te fakaako laoi ee, a nia ma aku ke fai, ke kau saua ria ko te ora mau?”

19Tongoi atu rei ko Jesus kiei, “Sea na atamai ko kee e karanga mai kia kuou te laoi? Siei pe koai e laoi, kae ko Tupua maso koia fuarei. 20Ko kee e kee iroa ina koa fono: ‘Kau see poi vare, kau see taa taangata, kau see kaiaa, kau see faka marau raua taranga ma tukuaki pouri, faka epa ki tou mmana ma tou nana.’ ”

21Tongoi atu rei te tangata, “Mai toku vasia rei noko tama tama iei, kuou ne tautari kia fono katoa rei nei.”

22Vasia o Jesus ne fakarongo kiei nei, koia ne muna atu kiei, “Ko kee e tee ke fai e sokotasi fuarei: Fai tauvi fakaoti rei ko ou kope kopenga, sori rei koa mane ki te faka arofa, ma ko kee ka fai tou taufenua i te vaerangi. Tera au raa o tautari mai kia kuou.”

23Kae vasia te tangata ne fakarongo kiei, koia ku maatea rei na arofa, natafito koia te taufenua sapa rei.

24Jesus ne ono atu kiei ku arofa, muna rei koia, “E faingataa maatea rei ki te tangata taufenua ke nai urufia ina ko te Kainanga o Tupua! 25Te tangata taufenua ke nai urufia ko te Kainanga o Tupua, e faingataa sapa atu ma te ʻkameleʼ ke nai urufia ko te mata o te nitili.”

26Te kano fenua koratou ne fakarongo kiei ne feesiri, “Koai rei ia ka faka saofia ia?”

27Ta tongoi atu rei ko Jesus, “Pe nia e faingataa ki nga taangata, e faingaofia ki Tupua.”

28Tera muna atu rei ko Peter kiei, “Pula rei! Komatou ku tuku ko amatou noforanga, kae tautari atu rei kia kee.”

29Muna atu rei ko Jesus kia ratou, “Kuou e faka ari atu kia kotou te maori: Pe koai ne tuku ko na noforanga, pe na nofine, pe ana taina, pe ana maatua, pe ana tamariki natafito i te Kainanga o Tupua, 30ka nai saua maafa rei i te tupuranga i vasia nei, ma koia ka nai saua ko te ora mau ia vasia ka au.”

Jesus e araara faki faka toru ki na mate

(Mat 20.17–19; Mak 10.32–34)

31Jesus ne sau te kau fanonga e tino angafuru ma rua, o muna atu kia ratou, “Fakarongo! Tatou ka oro ki Jerusalem, te ngangea oa nea kaatoa ne tusia ria e nga ʻprophetʼ ki te Tama a Tangata ka au tonu maori rei. 32Koia ka soria ina ki nga Gentile, ka ratou fai faka kata ria, ka ratou fai pariki tiaina, ma ka ratou anu sia ria ko ana mata. 33Ka ratou saia ria, ma ka ratou tamatea ria, kae i na aso toru ka masike ake ki te ora.”

34Kae na kau fanonga si see atetea kia ratou pe nia ma ana e muna kiei. Te atamai oa taranga ne funa ria ia koratou. Tera se ne ratou iroa ina pe nia ma Jesus noko araara faki.

Jesus e faka pula tangata mata sengi

(Mat 20.29–34; Mak 10.46–52)

35Vasia o Jesus ku au piri piri ki Jericho, te tangata mata sengi, e nofo i vae riu ara o kaisi fuarei. 36Vasia koia e fakarongo ki te kano fenua e faka sara, fesiri rei koia, “Sea nei?”

37Faka ari atu rei ea ratou kiei, “Ko Jesus o Nazareth e faka sara o poi.”

38Karanga ake rei koia, “Jesus! Te tama a David ee! Arofa mai kia kuou!”

39Te kano fenua i te mata kau fanonga, ne karanga atu kiei ke faka turi. Kae koia e singa forua rei ki runga, “Tama a David ee! Arofa mai kia kuou!”

40Tera ko Jesus tuu arei, kae karanga atu rei ki te tangata mata sengi ke aumai kia koia. Vasia koia ku oko mai kiei, ta fesiri atu rei ko Jesus kiei, 41“A nia ma au e fifia kia kuou ke fai atu kia kee?”

Tongoi atu rei koia, “Maurunga ee, kuou e fifia ke kau pula fokia.”

42Tera muna atu rei ko Jesus kiei, “Tera pula! Tau fakatonu ku nai faia ko kee ke laoi.”

43I mo vakanga ana mata ku pula, tautari arei koia kia Jesus, sori tana faka ue ue ki Tupua. Vasia te kano fenua ne ono kiei, koratou ne rausapai arei ki Tupua.

Actualmente seleccionado:

Luke 18: TKP

Destacar

Copiar

Comparar