Luke 16

Te araara fanga ki te taufenua toka roto

1Jesus ne muna atu ki na kau fanonga, “Nai take vasia te tangata taufenua e fai tana tangata e oono i ana kope kopenga. Te tangata taufenua ku faka aria kiei te tangata ku fai pariki ea koia a mane o na ariki lasi. 2Tera karanga atu rei koia ke au, muna atu rei kiei, ‘A nia rei nei e rongo kuou kia kee? Fai o pena pena faka tonu a mane oku kope kopenga kaatoa noko puke ea kee, natafito ko kee ka see roa ake ka see oono i oku kope kopenga.’ 3Tera muna rei te tangata maso koia, ‘Toku ariki ka nai fakaoti kia kuou i taku fainga fekau, a nia rei ma aku ka fai? Kuou see kau rava ina ko te keri rua, ma kuou e faka maa rei ma te kaisi. 4Kuou ku kau iroa ina pe nia ma aku ka fai! Tera i toku vasia ka faka oti i taku fainga fekau, kuou ka fai ni soavaka mo oku koratou ka fai ratou faka afe ria rei kuou ki aratou paito.’ 5Tera koia ne karanga ki faoa kaatoa ne kaoni i na ariki. Fesiri rei koia ki te mataki tangata, ‘E fia a au ne kaoni, kae siki siaki mai ki toku ariki?’ 6Tongoi atu rei koia, ‘Fua te rau sokotasi ia fua vai oa sua sinu ʻoliviʼ.’ Koia ne faka ari atu kiei, ‘Teinei tau sau anga, nofo ki raro faka vave o tusi fua rima.’ 7Koia ne muna atu ki take tangata, ‘Ko kee rei, e fia rei a au ne sau?’ Tongoi atu rei koia kiei, ‘Te afe sokotasi ia nevenga oa witi.’ Koia ne faka ari atu kiei, ‘Teinei tau sau anga, nofo ki raro faka vave o tusi koa fua te rau e varu.’ 8Tera te ariki o te taki fai toka roto nei ne nai faka puria koia ki ana nea ne toka roto kiei, natafito te kano fenua oa taangata nei e maatea rei ratou fai tifanga i ratou ngangea e fai, sapa rei ma te kano fenua o te maarama.”

9Jesus muna rei fokia, “Tera kuou ka muna atu kia kotou: Fai fakkau soavaka maso kotou ki otou taufenua ia taangata nei, tera i otou vasia ku siei rei pe nia iei, kotou ka faka afe ria ia noforanga see oti.

10“Pe koai e tonu maori rei kia ngangea e vikilake, ka tonu maori fokia kia ngangea e lasi. Pe koai e faka takekea kia ngangea e vikilakea, ka faka takekea fokia ia ngangea e lasi. 11Kae tera, kotou ku see faka poto oono kia taufenua oa taangata nei, ka fai rei faka fefea ke tuku soro atu ke kotou oono kia taufenua maori? 12Kae kotou see faka poto ke oono kia kope kopenga o rake nea, koai rei ia ka nai sori atu pe nia ma au?

13 # Mat 6.24. “Siei se seka ka fai fekau ki aana ariki e toka rua. Koia ka fakapere ki take na ariki, kae teke rei ki take na ariki, o pe laoi koia ki take na ariki, kae siei ki take na ariki. Ko kee ka si see fai fekauaki taanaki ko Tupua ma te mane i vasia e sokotasi.”

Rake fai muna muna ranga a Jesus

(Mat 11.12–13; 5.31–32; Mak 10.11–12)

14Nga Pharisee ne fakarongo kia nea kaatoa nei, koratou ku fai faka kata kia Jesus, natafito koratou e fakapere maatea rei ia mane. 15Jesus ne muna atu kia koratou, “Ko kotou maso kotou e fai ke mata mata laoi ia mata oa rake taangata, kae Tupua ia e nai iroa ina otou fatu manava. Natafito pe nia ma nga taangata e maanatu mafa sapa rei, i faasi o Tupua si see mafa iei.

16 # Mat 11.12,13. “Koa Fono a Moses, ma a tusi tusi ranga a nga ʻProphetʼ ne faka makeke ria oko rei ki te vasia o John te Faka uku. I vasiaa, te Rongo Laoi ki te Kainanga o Tupua ne araara fakina ki tua, ma faoa kaatoa e faka oso maso koratou ke fe urufi ki roto. 17#Mat 5.18.Kae e faingaofia ki te vaerangi ma taangata nei ke faka leku tia, ma kia mo taranga molakea oa Fono ke faia kesea ki tua.

18 # Mat 5.32; 1 Cor 7.10,11. “Se tangata koia e fue kese ko na nofine, kae avanga rei ki take maatua fafine, koia ku faka mee vare. Ma te tangata, koia ne avanga ki maatua fafine ne fueina kese, e faka mee vare.

Te araara fanga ki te tangata taufenua ma Lazarus

19“Nai take vasia te tangata taufenua, koia e uru fuarei ki ana suru laoi, ma e nofo, e kai kia kai laoi ma e vaki vaki i nga vasia katoa. 20Ka i te vasiaa, te tangata faka ruru faka arofa, na ingoa ko Lazarus, ana tino katoa e aofakina ki te para, koia ne aumai ina ki te urufanga o te tangata taufenua. 21Koia e fifia rei ke kai maakona maso koia kia moimoi kai kainga e soro ifo mai te tepolo o te tangata taufenua. Kae ko nga korii e oomai, o lamu ko ana para. 22Te tangata faka arofa ne mate atu, kave riaina rei e nga ʻangelʼ ki faasi o Abraham. Kae te tangata taufenua ne mate atu fokia, tanu arei. 23Koia ku maatea rei na fakarongo neaisu i te Ngangea o te Mate, i ngangea koia ne pula ake ki runga, nai ravea mmao atu rei ko Abraham ma Lazarus i na faasi. 24Tera karanga atu rei koia, ‘Pa Abraham ee, arofa mai kia kuou, o fakkau atu ko Lazarus ke au o faka siu ko na matikao kia vai, ke faka mariki toku alelo, natafito kuou ku maatea rei toku fakarongo neaisu i te afi nei!’ 25Kae tongoi atu rei ko Abraham kiei, ‘Taku tama ee, faka maanatu ki tou kee vasia laoi noko fai i tou vasia noko ora, kae te vasia pariki o Lazarus noko fai. Kae i te vasia nei, koia ku vaki vaki maso koia i kunei, kae i tou kee vasia e fakarongo neaisu iei. 26Kae tera faingataa rei fokia, natafito te rua lasi e takoto i tatou vasia, tera siei pe koai ia kotou ka ma fai ke au ki kunei. Ma siei fokia pe koai ia matou ka ma fai ke fenatu ki totou ngangea naa.’ 27Te tangata taufenua ne karanga atu, ‘Sea rei, pa ee, kuou e kaisi atu kia kee, fakkau atu ko Lazarus ke poi ki te paito o toku mmana, 28ki oku taina e toka rima e fare iei. Tuku ke poi o faka iro atu kia koratou, ka see oomai ki te ngangea fakarongo neaisu e kau nofo ria nei.’ 29Tongoi atu rei ko Abraham kiei, ‘Ko Moses ma nga ʻProphetʼ e faka iro ki ou taina. Koratou e fetau fangatasi ke fakarongo pe nia ma ratou e mmuna kiei.’ 30Tongoi atu rei te tangata taufenua, ‘Abraham pa ee! Siei, se fetau fangatasi, kae pe se tangata ke masike ake mai te mate, o poi kia ratou, tera koratou ka taafuri kese mai ia ratou sara.’ 31Kae tongoi atu rei ko Abraham kiei, ‘Kae koratou ka see fakarongo kia Moses ma nga ʻProphetʼ, koratou fokia ka see fakarongo rei pe koai ka masike ake mai te mate.’ ”

Actualmente seleccionado:

Luke 16: TKP

Destacar

Copiar

Comparar