Luke 15

Te araara fanga faka tautau ki te sipi sipi ne leku

(Mat 18.12–14)

1 # Luk 5.29,30. Take aso e tokarava rei ko faoa tari takisi ma nga faoa titisara ne oomai ke fakarongo kia Jesus. 2Nga Pharisee ma nga fakaako oa Fono ne fakatafito o fe nguu aki, “Te tangata nei e faka afe ea koia ko faoa titisara ma e kau kai koratou!” 3Tera ko Jesus ne araara faki te araara fanga faka tautau nei kia ratou:

4“Pe koai ia kotou e fai tana tino te rau ia sipi sipi, kae leku rei e sokotasi, nia rei ma au ka fai? Ko kee ka tuku ko te tino siva ma siva sipi sipi ke kai mauku, kae poi rei o faara ki te manu ne leku, oko rei ku kee maua ria. 5Vasia ku kee maua ria, ko kee ka maatea rei tou vaki vaki, tuku ki ou kapakau, 6poi arei ki tou noforanga. Tera ko kee ka muna ki ou soavaka ma ki ou kanoa paito ke taanaki mai, kae muna atu kia ratou, ‘Kuou e maatea rei toku vaki vaki ku kau maua ria taku sipi sipi ne leku. Tatou kai kai o vaki vaki!’ 7Kuou e faka ari atu kia kotou, ia fai atamai sokotasi ka maatea rei ko te mata mau i te vaerangi ki te nea titisara ne tara ko ana sara, e sapa rei ma te tino siva ma siva o te kano fenua tonu, koratou si se ne fai o tara ko aratou sara.

Te araara fanga faka tautau ki te foi mane ne leku

8“O pe se maatua fafine, koia e fai ko ana foi mane e fuanga furu, kae leku rei e sokotasi, nia rei ma ana ka fai? Koia ka tutu tana laiti, saaro na rota paito, o faara saere kia ngangea kaatoa oko rei ku nai maua ria. 9Vasia ka nai maua, koia ka muna ki ana soavaka ma ana kanoa paito ke taanaki mai, o muna atu kia ratou, ‘Kuou e maatea rei toku vaki vaki, ku kau maua ria taku foi pene ne leku. Tatou kai kai o vaki vaki!’ 10Kuou ka faka ari atu kia kotou, ia fai atamai sokotasi ka maatea rei te vaki vaki sapa o nga ʻangelʼ o Tupua ki tangata titisara sokotasi ne tara ko ana sara.”

Te araara fanga faka tautau ki te tama ne leku

11Jesus e araara arei, “Nai take vasia te tangata e fai ko ana tama e toka rua. 12Te tee ki muri ne muna atu ki na mmana, ‘Pa ee, sori mai arei toku kee vaenga ia kope kopenga.’ Tera te tangata vae rua arei ea koia ko ana kope kopenga i ana tama. 13Ia tua fuarei oa foi aso, te tama ki muri ne fai tauvi arei ko na vaenga ia kope kopenga, mau ko ana mane, sau poi kese arei. Poi arei koia ki te potu fenua e mmao, o fai pariki ko ana mane ki te ora pariki. 14Koia ne faka leku ko ana mane kaatoa rei. Tera te onge ne rave i te potu fenua aofakina fakaoti rei, kae siei rei pe nia ma ana i vasia ke tee. 15Tera koia ne poi o fai fekau ma te tangata o te potu fenua, ne nai fakkauna riaina ke poi ki na tofi, oono ki tana fare poi. 16Koia ku manani rei ke kai kia umu o nga poi e kkai kiei, kae siei pe koai ke nai faangaina koia. 17Kia muri rei ku au i na atamai, muna rei koia, ‘A taangata fai fekau a toku mmana e kkai maakona, kae kuou ku piri piri ke kau mate i kunei! 18Kuou nei ka tuu ake, poi arei o muna atu ki toku mmana: Pa ee, kuou ku sara rei ki Tupua ma kia kee. 19Kuou ku see fetau fangatasi ke ati tau tama. Fai mai kuou fakapera pe tau tangata fai o au fainga fekau.’ 20Tera koia ne tokai ake, foki arei o poi ki na mmana. Koia koi au mmao rei mai ki na paito, vasia o na mmana ne ono atu kia koia. Na fatu manava ku naa ko na arofa kiei, rere arei o tau ko ana rima ki tana tama o songi kiei. 21Tera te tama ne muna atu rei ki na mmana, ‘Pa ee, kuou ku sara rei ki Tupua ma kia kee. Kuou ka see fetau fangatasi ke ati tau tama.’ 22Tera te mmana karanga arei ki aana seka, o muna atu kia ratou, ‘Faka vave, o sau mai ko se suru mo ona o faa uru. Faokaki ko se foi ringi mo ona, ma faa uru fokia ko ana rafi vae. 23Tera oro raa o taa mai ko se puluka faangai ke fai ko tatou kai kai! 24Natafito taku tama nei ne mate, kae vasia nei koia ku ora mai; koia ne leku, kae vasia nei ku mau mai!’ Tera te kai kai tafito arei o fai.

25“I te vasiaa, te tama matua e nofo i te maara. I na vasia e foki mai, ku au ku piri piri ki te paito, fakarongo rei koia ki te uru o te mako. 26Karanga atu rei koia ki te seka o fesiri atu kiei, ‘A nia e fai mai naa?’ 27Tongoi atu rei ko te seka, ‘Tou taina ku foki mai ki paito, tera tou mmana ne taa ko te puluka faangai kiei, natafito ku foki mai kia koia e ora ma e maroro.’ 28Te uru matua ku maatea rei na teke, koia ku see fifia rei ke poi ki rota paito. Tera uru mai rei na mmana ki fafo o au o faka laoi kiei ke uru ki rota paito. 29Kae muna atu rei koia ki na mmana, ‘Pula rei, ia tau kaatoa nei kuou noko fai fekau pe tau seka, ma kuou si se ne saeaki rei pe nia ma au noko muna kiei. A nia rei ma aku ne fai o sori mai ea kee? Siei atu rei se manu ne kee soria mai kia kuou, ke fai ko se purenga ma matou mo oku soavaka! 30Kae tau tama nei ne nai fai pariki tia ou kope kopenga ki nga faafine oro vare, vasia rei ku foki mai o au ki paito iei, tera ko kee taa arei te puluka e peti o faangai kiei!’ 31Tongoi atu rei ko na mmana kia koia, ‘Taku tama ee, ko kee i nga vasia katoa e nofo i oku tafa, ma a nea kaatoa a aku e fai nei o ou. 32Kae kotatou tonu ke fai te kai kai o vaki vaki, natafito tou taina ne mate, kae vasia nei ku ora mai. Koia ne leku, kae vasia nei ku mau mai.’ ”

Actualmente seleccionado:

Luke 15: TKP

Destacar

Copiar

Comparar