خروج ۳۶
۳۶
1 «خوداوند، ایستعدأد و توأنأیی بِصَلئیل و اهولیاب و البأقی مأهیرٚ صنعتگرأنَ بٚبخشِه کی او کأرأن کی عیبأدتٚ خیمه چأکودنٚ شین ایسهیَ انجأم بٚدد. اوشأن خوداوندٚ طرح و دستورٚ موطأبق وأستی عیبأدت خیمه چأکودن و تزئین کودنَ تومأنَ کونٚد.»
2 پٚس موسا بِصَلئیل و اهولیاب و تومأمٚ صنعتگرأنَ کی خوداوند، اوشأنَ مهأرت بٚبخشِه و خیدمت کودنٚ رِه علأقه دأشتیدَ دؤخأد کی کأرٚ رِه موشغول بٚبد. 3 اوشأن، بنیایسرأییلٚ تومأمٚ پیشکشأنَ کی هر روج صُب اَوٚردیدی عیبأدتٚ خیمه چأکودنٚ رِه، موسا جَا فأگیفتیدی. 4 آخرپٚسی او مأهیرٚ صنعتگرأن کی خیمه چأکودنٚ رِه موشغول بود کأرٚ جَا دٚس اوسأدٚد. 5 اوشأن بوشؤده موسا ورجأ و بوگفتٚده: «مردوم خٚیلی ویشتر جٚه اونچی لأزیم بٚبه او کأرٚ رِه کی خوداوند دستور بٚدأ پیشکش بأوٚردٚده.» 6 پٚس موسا بٚفرمأسته کی او جیگأ کی چأدر بٚزِده میأن وأگویا بوکونٚد کی دِه هیکس پیشکش نأوٚره. اَطؤیی دِه ولأنشتٚده کی بنیایسرأییل پیشکش بأوٚره، 7 چونکی او پیشکشأن کی نٚهأ بو، خٚیلی ویشتر جٚه اونی بو کی خیمه کأرٚ تومأنَ کودنٚ رِه لأزیم بو.
عیبأدتٚ خیمهیَ چأکودن
8 او صنعتگرأن کی کأر کودنٚ رِه موشغول بود، دهتأ پرده جٚه ریز بأفٚ کتأنٚ اَمرأ، عیبأدتٚ خیمهیَ آمأدَه کودٚد. 9 بأزون بِصَلئیل پردهیأنَ آبی، ارغوأنی و سورخٚ نخأنٚ اَمرأ تزئین بوکوده، فٚرٚشتهیأنٚ نقشَ دیقّتٚ اَمرأ اوشأنٚ رو گولدوجی بوکود. 10 بأزون او دوتأ پردهیَ پنجتأ پنجتأ کسبٚکس بودؤخته کی دوتأ تیکه سیوأ بوبوسته چأکوده بٚبه. 11 اَ دوتأ پیله قیسمتٚ دوچوکستنٚ رِه، آبی پأرچه جَا پنجأتأ حلقه چأکوده اوّلی و دویُمی دسته آخری پرده لچه میأن. 12 ایتأ پرده لچه پنجأتأ حلقه، اویتأ پرده پنجأتأ حلقه اَمرأ روبرو بٚمأنسته. 13 بأزون طلأ جَا پنجأتأ گیره اَ دوتأ قیسمتٚ دوچوکستنٚ رِه کسکسٚ اَمرأ چأکودٚد، کی خیمه دؤرٚ پردهیأن ای دٚس بیرون بأیٚه.
14 اون بوزٚ پشمٚ جَا یأزدهتأ دِه تیکه عیبأدتٚ خیمه سقفٚ لأ دٚئنٚ رِه بٚبأفته. 15 اوشأنٚ درأزأ هرتأ پونزده متر و پأنأ هرتأ دو متر بو. 16 پنجتأ تیکهیَ ایجور دوچوکأنٚده کی ایتأ پیله تیکه بوبوسته. اویتأ شیش تیکهیَم کسکسَ دوچوکأنٚده. 17 پنجأتأ شیرأزٚه اَ دوتأ پیله تیکه هرتأ حأشیه میأن وأزَ کودٚد 18 و مٚفرغی پولکٚ اَمرأ اوشأنَ کسکسَ دوچوکأنٚده کی اَطؤ دوتأ پیله تیکه کسکسَ دوچوکد. 19 دوتأ پوشش ایتأ قوچٚ پوستٚ جَا کی اونی رنگ سورخَ بوسته بو و اویتأ خزٚ پوستٚ جَا چأکودٚد، کی اوشأنَ اوّلی پوشش رو تترج تأوٚدٚد.
20 اقاقیا تختهیأنٚ چو جَا چو دٚوٚد عیبأدتٚ خیمه رِه چأکودٚد کی رأست اونٚ رو بٚمأنه. 21 هرتأ تخته درأزأ پنج متر و اونٚ پأنأ هفتأد و پنج سأنتی متر بو. 22 دوتأ زوأنه تخته هرتأ ور دأشتی کی اونَ دوچوکأنِئی بغلی تختهیَ. 23 بیستتأ تخته عیبأدتٚ خیمه جونوبی قیسمتٚ رِه چأکود. 24 هطؤیم چهلتأ نوقرهیی پأیه اوشأنٚ جیرٚ رِه چأکود، ینی هرتأ تخته دوتأ زوأنه رِه دوتأ پأیه. 25 بیستتأ دِه تخته عیبأدت خیمه شومألی قیسمتٚ رِه چأکود. 26 هطؤیم چهلتأ نوقرهیی پأیه اوشأنٚ جیرٚ رِه چأکود، ینی هرتأ تخته دوتأ زوأنه رِه دوتأ پأیه. 27 شیشتأ تخته عیبأدتٚ خیمه آخری قیسمتٚ رِه چأکود، ینی غربٚ ورٚ آخری قیسمتٚ رِه. 28 بأزون خیمه پوشتٚ کنأره رِه دوتأ دِه تخته چأکودٚد. 29 او غربٚ قیسمتٚ شیشتأ تخته، حلقهیأنٚ اَمرأ جٚه بوجؤر و بیجیر دوچوکستٚده او کنأره تختهیأنَ. 30 پٚس سٚر جم او غربٚ قیسمتٚ میأن، هشتتأ تخته شونزدهتأ نوقرهیی پأیه اَمرأ نٚهأ بو، ینی هرتأ تخته جیر دوتأ پأیه.
31 بأزون اقاقیا چو جَا کولون چأکود، عیبأدتٚ خیمه ای ورٚ تختهیأنٚ رِه پنجتأ کولون، 32 اویتأ ورٚ تختهیأنٚ رِه پنجتأ کولون و او خیمه پوشتٚ غربٚ ورٚ تختهیأنٚ رِه پنجتأ کولون. 33 او وسطٚ رِه کولونٚم چأکود کی جٚه تختهیأنٚ میأن ای سٚره دٚوأره. 34 بأزون طلأ روکشٚ اَمرأ تختهیأن و کولونأنَ رو بیگیفته و طلأ جَا حلقهیأن تختهیأنٚ رو چأکود کی اونٚ رو کولونأنَ بٚدأره. 35 ریز بأفٚ کتأن و آبی، ارغوأنی و سورخٚ نخأنٚ جَا او مخصوصٚ پردهیَ کی قدس و قدسالاقدأسٚ مأبین نهأبو چأکوده و دیقّتٚ اَمرأ فٚرٚشتهیأنٚ نقشَ اونٚ رو گولدوجی بوکودٚد. 36 پرده وأرگأدنٚ رِه، اقاقیا چو جَا چأرتأ سوتون چأکود کی طلأ اَمرأ روکش بوبوسته و چنتأ طلأ جَا قولأب چأکودٚد و چأرتأ نوقرهیی پأیه او سوتونأنٚ رِه چأکودٚد. 37 بأزون عیبأدتٚ خیمه درٚ وأسی ریز بأفٚ کتأنٚ جَا ایتأ پرده آمأدَه کودٚد، آبی، ارغوأنی و سورخٚ نخأنٚ اَمرأ اونَ گولدوجی بوکودٚد. 38 پنجتأ سوتون کی قولأب دأشتی اَ پرده رِه چأکودٚد. بأزون طلأ روکشٚ اَمرأ، سوتونأنٚ سٚر و گیرهیأنَ رو بیگیفتٚده و سوتونأنٚ رِه پنجتأ مٚفرغی پأیه چأکودٚد.
Actualmente seleccionado:
خروج ۳۶: GCB
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
The Gilaki Contemporary Bible is a Product of Transform Iran © 2024. All rights reserved. www.kelisayejame.org