Revelesen 21

Nut eia m'a nut a nadep' ima kam'dah

1 # Aisaia 65:17; 66:22; 2 P'ita 3:13. Sarei, nla nut eia m'dah m'a nadep' m'dah, sena ti nut eia itauamu m'a nadep' itauamu itv'siau, nata ihei ml. 2#Aisaia 52:1; Rev 3:12; Aisaia 61:10.Laha, kana, nv'i a Sun, nla v'anu lil p'as, iv'i Serusalem m'dah, ima dan eia asn Atua, inep'a tav'et atendedp' sarei kamhmah ani sanan a naun. 3#Esikiel 37:27; Livai 26:11,12.Laha, nrn nadl lil iamk idan eia, kavr ti a, “Pavlei, nmah kanuisan Atua iter asnr m'ertu. Hin ipalak m'er, laha hir apavv'i m'ertuan. Hin Atua ipalak m'er kav'i Atuar. 4#Aisaia 25:8; Aisaia 35:10; 65:19.Atua ipavalua ui m'atar udlani. Laha, m'ien ikahei ml, m'ertu akavrn istu ml, akavvalau ml, p'akr ikahrer ml, sena ti si udlani itauamu itv'siau.”

5Laha, Hin la ilak arna napl p'as ha ivr ti a, “Pavlei, Kana nen si udlani ima kam'dah.” Ivr a kana ml kavr ti a, “Pulul a v'nen laha, sena ti iv'i v'nen dau kaviviln.”

6 # Aisaia 55:1. Ivr a kana ml kavr ti a, “Si udlani ithiris. Kana nv'i Alva kav'i Umika, kav'i pla si udlani kav'i ual si udlani. Kana p'etuvn a nauei a m'ertu irn navan, ipadan a nut nauei na silv'ien itp. 7#2 Sam 7:14; Npin 89:26,27.M'ertu ipap'tir kahua kasiv' sei itukari, ipalev' si udlani. Laha, Kana p'ev'i Atuan, hin ipav'i a natk. 8V'eti m'ertu avdedrn, m'ertu ahavv'ah Kana, m'ertu avsapa p'kl stu ihuadau, m'ertu avrpep'n m'ertu, m'ertu avan si stu m'a tav'et, m'ertu avan paria tiet, m'ertu avpata aitul, m'er m'ertu udlani avhap'il, hir m'lnar ipaiak al nata iv'i nep'v'en m'a salva. Ki lera iv'i tv'el m'ien.”

Serusalem m'dah ima dan asn Atua

9Laha, nki iamk asnr ensel isaru la avua dis isaru ilini a der itauatah dau ha, ima asnk kav'ana m'a kana kavr ti a, “Pama atlaha. Kana p'ev'iv'en anh tav'et ip'hm'arit, iv'i a nau Net Sivsiv.” 10#Esikiel 40:2.Laha, ensel ilev' kana arna m'im'ilk nrv'a asn ptha lil iamk, ip'arei istudau. Kav'iv'en a kana v'anu lil lera, iv'i Serusalem p'as lahara, ima dan eia asn Atua. 11Si p'sp'asan Atua iter a nln. Nut lera ier inep'a nav'et p'as, ulien nen istudau, kanep'a nav'et iamk ier, iv'i saspa ilvlvar kanep'a klas kinkin, avr ti iv'i kristal. 12#Esikiel 48:30-35.Naml nen ilil kap'arei. Pn liu nen inal lman iru (12). Ensel inal lman iru (12) avp'tir asn pn liu nen. Aulul a naha kinkin aranan, iv'i naha nl nam'el inal lman iru (12) a Isrel. 13Arna Is, pn liu itl iter. Arna Nut, pn liu itl iter ml, Arna Saut, pn liu itl iak. Arna Ues, pn liu itl iak ml.

14Naml na v'anu lil lera, nav'et hua nen inal lman iru (12). Atu nahar apuselan a Net Sivsiv arnal lman iru (12) aranan. 15#Esikiel 40:3.Ensel iv'ana m'a kana hara iua tintin iamk aani a kul, a ti ipatina v'anu lil, katina pn liu nen m'a naml nen. 16V'anu lil, tv'eliel nen iv'a itinei inap'amk. Mrn m'a nap'n m'a tv'eliel iru itinei inap'amk. Laha, itina v'anu lil a tintin lahara, statia nen iv'i tausen inal lman iru (12,000, iv'i 2,300 km). Itina tv'eliel nen iv'a m'a nut iv'a eia inap'amk. 17Itina naml nen, kiupit nen iv'i 144. Tintin nen ip'arei inap'amk m'a tintina m'ertu, v'aha ensel. 18#Aisaia 54:11,12.Naml lera aani a nav'et p'as ier, avr ti iv'i saspa. V'anu lil lera iv'i kul tkv ihei a nln, inep'a klas ilvlvar.

19Nav'et hua na naml na v'anu lil amhmah ani katu nav'et p'as ururaur istudau aranan, ulien nen ilil. Arna nki itauamu atu saspa, arna tv'aln atu savaia, arna nitlen atu salsetuni, arna niv'an atu emral. 20Arna nilm'an atu satuniks, arna lm'sei nen atu kanilian, arna saru nen atu krisulait, arna satl nen atu perel, arna sav'et nen atu tupas, arna snal nen atu krisupres, arna lman iamk (11) nen atu aiasin, arna lman iru (12) nen atu ametis. 21Pn liu inal lman iru (12) lahara iv'i neiau tva ier, pn liu udlani p'sev' iv'i neiau tva iamamk. Navanel lil na v'anu iv'i kul tkv ihei a nln, inep'a klas aklup'rei.

Si p'sp'asan a Serusalem m'dah

22Nala nmah tamat kinkin atlera, sena ti a Mlin Atua, la nut huan ilil kasiv' si udlani ha, m'a Net Sivsiv arv'i nmah tamat nen. 23#Aisaia 60:19,20.V'anu lil lera iarn neiel a ti ipan, v'aha nal a ti ipar, sena ti si p'sp'asan Atua itu nut ren ani, Net Sivsiv iv'i lait nen. 24#Aisaia 60:3.M'ertu arna v'anu udlani Atua itlev'la sarar apavv'el arna nut ren lera. Mlin lilil arna nadep' apavrama a nln kavua si p'sp'asar m'a naha lilar. 25#Aisaia 60:11.Akap'leskar pn liu nen arna napn kinkin, sena ti nut lihat ihei atlera. 26Laha, v'anu udlani apavrama a nln kavua si p'sp'asar m'a naha lilar. 27#Aisaia 52:1; Esikiel 44:9.V'eti si kinkin inep'a tkv arna nahn Atua, v'aha m'ertu avan sei iv'i mamihien, v'aha m'ertu avhap'il, akavrav'a a nln naran kinkin, v'eti m'ertu uaki aulul a nahar arna puk na silv'ien, iv'i nka Net Sivsiv, hir apavrav'a a nln.

Actualmente seleccionado:

Revelesen 21: nmb

Destacar

Copiar

Comparar