A Matye koe‑noogo 20
20
B rɩgsa tʋmtʋmdb wakat toor-toore
1Bala, arzãn soolem wẽnda wa yir soab sẽn yi yibeoog pĩnd n na n dɩgs tʋmtʋmdb tɩ b tɩ tʋm a reezẽ tɩɩs pʋʋgẽ. 2B sara ne taab tɩ daar a yembr tʋʋmd na n yɩɩ deniye a yembre, t'a kɩt tɩ b kẽng a reezẽ tɩɩs pʋʋgẽ wã. 3A yii sõ-bɩɩmd wakate, n yãnd neb sẽn be raagẽ wã n ka maand bũmb ye, 4n yeel-ba: «Yãmb me kẽng n tɩ tʋm m reezẽ tɩɩs pʋʋgẽ wã, tɩ m na n kõ-y-la yaood sẽn zemse.» 5Nin-kãens kẽngame. Dẽ, a leb n yii wĩnto-sʋka, la wẽn-kaoore n leb n maan a woto bala. 6Wĩndg sẽn dabd lʋɩɩse, a leb n yiime n yãnd neb sẽn yas be, n sok-ba «Bõe tɩ yãmb be ka daarã tõr n ka maand bũmbu?» 7Bãmb leokame: «Yaa tɩ ned ba a yembr ka rɩk tõnd tʋʋmd ye.» Yẽnda yeel-b lame yaa: «Bɩ yãmb me kẽng mam reezẽ tɩɩs pʋʋgẽ wã.» 8#Mk 19.13, Tõ 24.15Zĩ-sobd sẽn ta, reezẽ tɩɩs pʋʋgã soab yeela ned ning sẽn get-a yẽnda tʋʋmã yellã yaa: «Bool tʋmtʋmdbã n yao ned kam fãa a yaoodo, sɩng ne yaoolem dãmbã n tɩ baas ne dẽenem dãmbã.» 9Neb nins sẽn wa‑b wĩndgã lʋɩɩs wakatã kolgame tɩ b kõ ned kam fãa deniye a yembre. 10Dẽenem dãmbã n yaool waoongo, n tẽed tɩ bãmb na n deeg n yɩɩda neb a taabã. La a kõo bãmb ned kam fãa deniye a yembre. 11B sẽn deeg deniye a yembr-yembrã, b yẽgma ne yirã soab n yeele: 12«Sẽn wa-b yaoolmã tʋma lɛɛr a yembr tãa, tɩ tõnd tʋm daarã tõr n nams ne tʋʋlgã, tɩ yãmb kõ bãmb yaood a yembr ne tõndo.» 13La a leoka bãmb ned a yembr a woto: «M zoa, mam ka zãmb foom ye. Tõnd dag n ka sar ne taab deniye a yembr tɩ fo sak sɩda? 14Dẽ wã, deeg f ligd n looge. Maam n dat n kõ yaoolem soabã wa foom. 15Dẽ yĩnga, mam ka tar noor tɩ maan m sẽn dat ne m sẽn so wã bɩ? Bɩ fo getame tɩ mam maan-neerã ka sõama?» 16#Mat 19.30, Mark 10.31, Luk 13.30Woto, yaoolem dãmbã na n yɩɩ dẽenem dãmba, tɩ dẽenem dãmbã yɩ yaoolem dãmba.
A Zeezi leb n goma b kũumã ne b vʋʋgrã yelle
(Mark 10.32-34, Luk 18.31-34)
17La a Zeezi sẽn dabd Zeruzalɛm, b peega b karen-biis piig la a yiibã toore, la b yeela bãmb sorã zug yaa: 18«Ges-y-yã! Tõnd dabda Zeruzalɛm, la b na n yõka Ninsaal Bi-riblã n kõ maan-kʋʋdbã kãsem-dãmbã ne tõog karen-saam-dãmbã, la b na n kaoo bãmb bʋʋd tɩ yɩ kũum. 19La b na n ninga bãmb bu-zẽms nusẽ tɩ b yaal bãmba, la b pãb-b ne kalwaase, la b ka-b da-pɩk zugu. La rasem a tãab daare, b na n vʋʋgame.»
A Zak ne a Zã ma kosgo
(Mark 10.35-45)
20Dẽ, a Zebde kom-dibli wã ma waa a Zeezi nengẽ ne a kom-dibli wã n yĩgimd bãmb taoor n na n bõos bãmba. 21Bãmb soka yẽnda t'a rata bõe? La a yeela bãmb yaa: Kõ-y noor tɩ mam kom-dibl‑kãensã b yiibã zĩnd ne yãmb y soolmã pʋgẽ, a yembr y rɩtgo, a to wã y goabga. 22A Zeezi leokame n yeele: «Yãmb ka mi yãmb sẽn kot maam bũmb ningã ye. Dẽ yĩnga, yãmb tõe n yũu bõn-yũudl ning mam sẽn na n yũ wã?» La b leokame: «D tõeeme.» 23La a Zeezi leok-b lame n yeele: «Yaa sɩd tɩ yãmb na n yũu bõn-yũudl ning mam sẽn na n yũ wã. La a ka be ne maam tɩ kõ noor tɩ ned zĩnd mam dɩtgo wall mam goabg ye. Mam sã n na n kõ me, yaa neb nins mam ba sẽn segl zĩ-kãens b yĩngã.» 24Karen-biis piigã sẽn wʋm woto, b sũyã sãama ne ba-biis a yiibã. 25#Luk 22.25,26A Zeezi boola bãmb n yeele: «Yãmb miime tɩ soolem nanambsã so b nebã ne pãng n dɩt naam, la tɩ nin-kãsemsã weoogda b nebã. 26#Mat 23.11, Mark 9.35, Luk 22.26La a kõn yɩ a woto yãmb sʋk ye. Ned ning fãa sẽn dat n yɩ yãmb sʋkã nin-kãsenga, bɩ a yɩ yãmb sõngda. 27La ned ning fãa sẽn dat n yɩ yãmb taoor soaba, bɩ a yɩ yãmb yamba. 28Yaa woto yĩng la Ninsaal Bi-riblã wa yã. Ka tɩ nebã na sõng bãmb ye, la yaa tɩ bãmb na sõng nebã, la tɩ kõ b vɩɩmã, n yao n fãag neb wʋsgo.»
A Zeezi puka zoens a yiib nini
(Mark 10.46-52, Luk 18.35-43)
29La bãmb sẽn yi Zeriko, neb kʋʋng wʋsg tũu a Zeezi. 30La zoens a yiib sẽn zĩ sorã noor wʋmame tɩ yaa a Zeezi n loogda, dẽ, b zẽka b koees n yeele: «Zu-soaba! A Davɩɩd Bi-ribla! Zoe-y tõnd nimbãanega.» 31Neb kʋʋngã Tãsa bãmb n yeel-b tɩ b sĩndi. La b zẽka b koɛɛg n yɩɩd pĩnd n yeele: Zu-soaba! Davɩɩd Bi-ribla! Zoe-y tõnd nimbãanega. 32A Zeezi yalsame n bool-b n sok yaa: «Yãmb datame tɩ mam maan bõe n kõ‑yã?» 33La b yeelame: «Zu-soaba, d data d ninã pukri.» 34La a Zeezi zoee bãmb nimbãanega, n sɩɩs b ninã. La tao-tao bala b ninã pukame, la bãmb tũu a Zeezi.
Actualmente seleccionado:
A Matye koe‑noogo 20: MPBU
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
Moore Bible © Bible Society of Burkina Faso, 2014.
