YOBU 4
4
Kirouwo Kya Mbee
(4:1–14:22)
Irouwa lya Elifasi
1Naasa Elifasi ulya Ntemani karouwa Yobu;
2A ndesa nndu kakurouwa kirero kusua?
A mmbi ashiidimaa isisirya irera?
3Arannya! Yewe mmbo kulellosha veengyi,
na itumarisa maako a vafwafwa.
4Marero afo akaviirya valya vemfwa nrima,
nkuletumarisa veturye finya.
5Indi ulaalu mmbo fyakukooya yewe kumuni, neewe kwatura usisiryo,
fikakupaana neewe kwasavaa.
6A ndesa ikusirya na Iruva n shi kyo kindo kuvikkye nsia?
Na worotu lwafo nshi kyo kindo kukusirye?
7Kusare ulaalu: Mmbi nalatiri ulyamari alensarumya?
Ao ndesa vandu vasaari valemmerwa sakeny?
8Kindo shiishi yeny vevaaya uravi na ukasha mmbo vailulaa fyo fyeni
9Iruva mmbo avamamitaa na mumuyo wakwe,
yewo mmbo vamamitwaa kwa ngapo ya nyashi yakwe.
10Varavi mmbo vadinaa sha miiso shinyaasi,
indi mayoo awo mmbo afishwaa.
11Miiso itiri finya mmbo ifwoo elyi yatura kyeelya,
na vana va miiso ya kyika vakananatwa.
12Nkonu umwi, mmbo shevio kindo kirika,
kuri kyakwa kakaita kiviriviri kyavayo.
13Shekee makusarony a moorya lya kio,
kyeeri rwe shiroo titiraa vandu.
14Shawoyony vereerei sharerema,
mafua akwa moose akateruka.
15Uraato lukaira mbee ya kisangu kyakwa,
fii ta mwiliny wakwa tikaenda saafu.
16Kindo kikasalala sau mbee yakwa
kyeeri shilekilola nshilekimanya twa-fo.
N kweiyo yuumbo iwe mbee yakwa;
kukava kimamia sau, numa shaita unyanga.
17Nndu wa vandu ashiidimaa itira usumanu mbee ya Iruva?
Nndu ashiidimaa iva mwaa mbee ya Muumbi wakwe?
18Naakwaa ni varundi vakwe, mmbo nnatiri nawo kikusiryo-fo;
na vasu vakwe mmbo avalollya verenga;
19Kilanya nndu wa vandu fyuumbe fya uteeri
vandu vaparikkye kilulyiny,
vashiidimaa ikonindwa konindwa sha minya.
20Vandu kwa fyeeri fyaangu deny vamanya imamika;
mmbo vamamikaa llung'anu nta valare wende lwawo!
21Kwakooya uruu lutirye muu wawo lwarumbuwa
wo mmbo vafwee nta valatiri urango usha.
Actualmente seleccionado:
YOBU 4: MAS2
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
The Holy Bible in Kimashami © Bible Society of Tanzania, 2016.
