ESTA 7
7
Shaasa Hamani Awaawa
1Nalyo mangyi na Hamani vakasha shoongeny kwa nka wa mangyi Esta. 2Nawe mangyi kavesa Esta lya kavii alya kweni shoongeny veenaa mfinyu; “Esta, kindo kukundye ikitereva nkyoki? Naakwa kyava kyenga kya umangyi lwakwa shikuniinge.” 3Llyo nka-mangyi Esta alerouwa, kaamba, “Kwakooya mangyi akunda iirikya kiterewo kyakwa, mmbo shatereva muu wakwa, amwi na va vandu vakwa shivakundye. 4Mashika yese mmbo lukee vakumbe naambo lusherumatwa lusie deny. Kukooye mmbo lwekee vakumbe lukuviyye mashinga na fishinga-da, nta nsheereraa-fo mmbee; nnyo ngapo yeeru ulaniny kundo kulempaana umangyi lwafo.” 5Nalyo mangyi Ahasuero kavesa Esta, “Ammbi yeto akara itana indo? Nkwi nndu yeto akai?” 6Esta kammbia, “Ni nkiduva veeru na mwilyisa vandu ukiva mmbwe Hamani, nndu nkasha deny.” Nalyo Hamani kaereya nnu mbee ya Mangyi na nka mangyi Esta. 7Mangyi kakwiipoo atirwa nngoo kasomuka na poo kari ka mmba ya umangyi. Hamani nawe kasalala, eekundye itereva usari kwa nka mangyi, Esta mashika alelollya sheelyi mangyi anrwaayo nngo akundye inrumata. 8Mangyi kawuya na mmba ando alya vekee ifureny venaa mfinyu. Nalyo Hamani mmbo enkweera sumbai mbee ya kitima kya nka mangyi, Esta. Mangyi lya elolya indo kasswa, kankoomya kammbia, “A mmbo kuminaa nka mangyi, mbee yakwa kunu mmba yakwa shimuni?” Llya mangyi alemaa irera, Hamani kasikywa kisangu. 9Harbona, mwiisalallya mmba ya mangyi ekee umwi wa valya vekee mbee ya mangyi kaamba, “Lola kiri kyevanika kitiri waasha lwa maako makumi araanu, kilya Hamani enruuya kimaruma kya ivanika Mordekai, ulya erera kisha kya mangyi, kulya mmba ya Hamani kikai.” Mangyi kaamba, “Mmbanikeny yoo kiriny ekyo.” 10Naasa, vakavanika Hamani uwe ya nri ulya endeesya Mordekai. Unyafi lwa mangyi lukafwaa.
Actualmente seleccionado:
ESTA 7: MAS2
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
The Holy Bible in Kimashami © Bible Society of Tanzania, 2016.
