ESTA 6
6
Mangyi ang'anisa Mordekai
1Nalyo kio ekyo mangyi nnyaleerera nta rwe imwi-fo, kavavasya neengyo kyitabu ekyo kitiri mbony toose shaasa tikeetanyika efo urukeny lwakwe, nawe kasomyo toose. 2Kikakooyo-fo shaasa kikee kireiye sheelyi Mordekai mmbo aleriingya Bigtana na Tereshi valya vekee veekallya findo fya mangyi, vakaveringa yoo ngiriny, na mmbo yewo vekeeringya mangyi Ahasuero. 3Mangyi kaamba, “A nkyoki Mordekai aletannyo kyeemwaana elyi aletana indo?” Vasero va mangyi vakammbia, “Nnyaletannyo nta kindo-fo.” 4Mangyi kookafo kavesa, “Kulya kari kwiifo nndu?” Na Hamani mmbo ensha kakaa efo kari ka mmba ya mangyi, naambo navere ikamba lyeerera na mangyi, naambo nanniinge muumu wendewanika Mordekai kulya nriny ulya alen-deesya. 5Vasero va mangyi vakammbia, “Akoolya Hamani akee alya kari.” Mangyi kaamba, “Mmbyeny naange.” 6Naasa Haman kaanga. Mangyi kammbia, “A nkyoki atannyoo nndu yeto mangyi akundye innganisa?” Naasa Hamani kakusara efo nriminy wakwe, “A mmbi ungyi mangyi ashiidimaa inng'anisa ngota yeny?” 7Naasa Haman kavia mangyi, “Nndu yeto mangyi akundye inng'anisa, 8neengyo masara a kimangyi alya mangyi muni araa, na frasi yeyo mangyi aisaamaa, naveraa na kofia ya kimangyi,” 9na masara yoo a kimangyi na frasi yeyo arambikkyo nndu atiri nnduma, navike nndu yeto mangyi akundye inng'anisa, namwiirye mbee eesaamye frasi eesoraa shia niini ya muri, nakape weele naambe, “Niindi atannyoo nndu yeto mangyi akunndye inng'anisa.”
10Naasa mangyi kavia Haman, “Kyasia, ipoo na ngeta masara yoo na frasi shaasa llya kwaamba, kundetannya Mordekai, Myuda yeto akaa yoo mwaangony kwa mangyi, kulore kushaalashaau nta irero lyimwi lya yoo kwaamba.” 11Nalyo Haman kandevika Mordekai masara yoo na frasi yeyo kansaamisau, kairyany frasi mbee, eeshiiraa shia niini ya muri, kakapa weele kaamba, “Nndu yeto mangyi akundye inng'anisa niindi atannyoo.” 12Naasa numa Mordekai kashekaa alya mwaangony kwa mangyi. Lyo we Haman kaangusya yeenda kyeny, ekee sheelyi afiyyo, keenda eeinyikye nrwe.
13Naasa Haman llya alefika kyeny kandeongoya nka wakwe Sereshi na vambuya vawo mbony tilya toose. Llyo vandu yewo vakwe vatiri urango, na nkaakwe vakammbia, “Kwankooya Mordekai yeu akufwallya si, mmbwa ufyari lwa Vayuda, nkumwiidimaa-fo, nkuti nakumamite.”
Haman Awaavo
14Llya veekerera nawe indo, veesalallya kulya kwa mangyi vakasha nang'u vakamwiitika naangusye yeenda sukukuuny ilya ya nka-mangyi Esta.
Actualmente seleccionado:
ESTA 6: MAS2
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
The Holy Bible in Kimashami © Bible Society of Tanzania, 2016.
