Hosea 11
11
Nenaik ’gain Onuk Logo a’ge en eiyagai at iak sagalogwi a’ge ai enebe edeap enebegei wene
1 #
Kel. 4:22; Mat. 2:15 Nenaik ’gain Onuk Logo a’ge en e, asogo mo’gulentesirik mesik disogo mo’gulentesi,
“Aphwami Israel a’ge enebe nede en enebe malik owan pamat yo’go enebegirik, o Mesir en liplaumagoluk mo’gulentegis ai o. 2Mo’gulentegismu liplau wegesema pobuk ne’bek wemagoluk loksogoat worlenebisokhweat de, is enebe an uknoboluk walegat lai lotluk, wam, di a’ge yu a’ge dogwi asua Baal paget emin, dogwi asua logon paget emin, wusogo narlogulat, e’ben op a’ge narlogulat, togwi o. 3An en e, is ebela laga lemagoluk mo’gulentasulat, nedeapsogo nagaimu wogenebiselat, tenentarok welat, tagokhwe a’geat de, is en e,
Nenaik ’gain Onuk Logo a’ge en op taknenebasu, oluk ’baksogo u ebele enebit welagai ai o. 4An en is enebe nede hwedik modok en, enebe ne’bek horoksogo onobou agalat, enebam e’gin-pe’gin oruakma lerentasulat, malik enielak en ono’borl lo’buksogo onso’boru wogontogwi ai ’gela’ge, onso’boru wogentasulat, tago a’geat de, 5is aphwami Israel a’ge ai enebabut heberlotluk togolik an ne’bek wom enebit welagai ai o. Ai en e, is pobuk togolik o Mesir louwak o. Asogo loma, is aphwami Asyur a’ge onue onuk logo a’ge en tenentarok welema o. 6Is aphwami Israel a’ge onu’gwarek enede opoluk togwi ai pam, ap tentara en waronobuogoluk is onowi kota annisogo ’gu otluk mumhogulat, enebe waronobogulat, leget pakleget emde ’belak a’ge modok wiagarogulat, tua o. 7Is an uknoboluk enannisogoat libagaiam, aphwami logon en di obotut yu obotut tagonobogwiam, delonobuagoluk, eniak loksogoat mu a’ge logon ononuk ’balua a’geat de, delonobua modok erlak o, oluk egei.
8 #
Ula. 29:23
Asogo egeitik, aphwami Israel a’ge disogo mo’gulentesi,
His aphwami Israel a’ge yu. An en his henebe modok-modok ukhonobo no? Modok mia o. An en aphwami Adma a’ge enebe modok erlagap enebegis ai ’gela’ge, erlagap henebasulat, aphwami Zeboim a’ge tagenebegi ai ’gela’ge takhenebasulat, tu no? Modok erlak o. An his henebe nede modok hwedik ai en, asogo takhenebaik erlak o. 9An nebe Allah at o. Aphwami ’gela’ge erlak ai en e, an en nolot het his henebam poluk, wene henebam pasu legi ai ’gela’ge pobuk paik erlak o. An nebe degelak modok welegi a’ge ano en, henebe ’gwelakhentarok welat, nolot het henebam pasu leik erlak o,’ oluk mo’gulentesi.
10 Singa en iak loksogo il noso ’gela’ge, ’gain Nonuk logo a’ge niak loksogo oso holuk neiyagai muknoboluk wagalat, Niak loksogo oso holuk e, an neiyagai mo il obuk ilasu hegit eba en onogorlok hil-hil an ne’bek wagalat. 11Tue darak noso ’gela’ge, is o Mesir en onogorlok pam onuak erlik-erlik wagalat, tue pen ’gela’ge o Asyur en onogorlok pam wagalat, togwi holuk An ene is onowi lo’gwe lo’bok welemagoluk, pil laik o, oluk At ’gain Onuk Logo a’ge Allah enat egeimu re, mo’gulhentasu legi o,” oluk, mo’gulentesi.
Actualmente seleccionado:
Hosea 11: Wul
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
