Yehezkiel 45
45
Allah paget ’gwiang ’balogo po yo oluk osoma hesi wene
1“Enemening a’ge ’gela’ge ’gwiang ’balogo Israel a’ge wogontogulat, ’gwiang eliko loksogo ’balogo An Allah nebaget welemagoluk pulogo pouwak o. Pulogo pouwa a’ge ano walhogulat, yat ai, meter 12.500 pam walhogulat, eliko lok ai, meter 10.000 pam walhogulat, tuak o. ’Gwiang walho gal hwerli ’balema a’ge ai, ’berlegat an nebaget pulogo pouwak o. 2’Gwiang ’balua a’ge eria re an nowi omu pulogo woru a’ge pageratma re, walhogulat, erei akhit-orogou akhit emin wali’gogo emin meter hegitsogo 250 pam walhogulat, ye, meter 250 pam walho gal selak we ’golo wolomma ukpoma eliko lok ai re, meter 25 pam walhogulat, tuak o. 3’Gwiang loksogo nebaget pulogo pouwa a’ge ano pema walhogulat, ado yat mesik meter 12.500 pam walhogulat, eliko lok ai, meter 5.000 pam walhogulat, takpoluk, ’gwiang ’balumu ’burl eba an nowi werik poluk, asua modok wolommaat takpoluk pouwak o. 4’Gwiang walhoma eria re, is en an nowi worogwi holuk, eba en togulat, An Allah ne’bek wotluk nil pam en togulat, togulom e is an nebe eiye a’ge ebano enebageratma re, omuat degelogo pouwak o. ’Gwiang ’balumu eba ologun eria pam e is an nebe eiye a’ge onowi worogulat, ye, pema re o muat pulogo pou wama re, eria pam an nowiat werik pogulat, tua o. 5Toluk, ’gwiang mesik ’balua a’ge walhogulat, yat ai re, meter 12.500 pam walhogulat, ye, eliko lok akhit ai, meter 5.000 pam walhogulat, togwi a’ge ano re, is ap an nowi worogwi holuk, togulom a’ge Lewi a’ge enebageratma re, eiyetak pagathorloluk, onowi kota-kota at tak pagathorloluk welema o.
6Ye, ’gwiang an nebaget pulogo poma eriano emin lo’boktak a’ge ano, o kota woru a’ge ’gwiang polik poluk, walhogulat, eliko lok a’ge meter 2.500 pam walhogulat, ologun yat akhit meter 12.500 pam walhogulat tuak o. Asogo tua ai, is Israel a’ge ono’gwiangat welemak o,” oluk mo’gulnosoma hegi o.
Ap onuk logo a’ge wolomma o’gwiang pulogo po a’ge hesi wene
7“’Gwiang an nebaget pulogo pouwa a’ge emin, o kota woru a’ge ’gwiang ’balogo pouwa a’ge emin lo’boksogo ’burl oruakhwe pema-pema ai re, is Israel a’ge onue onuk logo a’ge wolomma ebagerat pouwak o. At o’gwiang o mo orlu ago akhit o’gwe hwerli ’balua ano re, is Israel a’ge ono ’gwiang wogonto re omo orlu ago akhit hwerli hegit agalat, ye, o mo obuk ilasu akhit o’gwe hwerli ’balua ano re, is Israel ono ’gwiang wogonto ano o mo obuk ilasu akhit hwerli hegit agalat tua o. 8O Israel a’ge wolomma eba at o’gwiang eiyetak pagathorloluk wolom aiatma re, is Israel onuelak kain-kain an en edik enebaik a’ge ano en an neiyagai mesik emin sebelogo onobogu lema erlak o. At e, is Israel ena’gul onuk modok polik a’ge ano en ono ’gwiang eiyetak pagathorloluk wolom obat opogu lomul ani o,” oluk, osoma hegi o.
Aphwami onuelak kain en togulom a’ge osoma hegi wene
9At otok modok welago a’ge Allah en egei ano re yuat o. “Is Israel a’ge onuelak kain-kain en an neiyagai tagonobogwi ai, modok horli arat o. Ena’guluak haro welat, aphwami wiagap enebil no’gulat, sebelak enebi lagalat, togwi ai, ukpouwak o, ukpoluk, op a’ge nak tagenebil lagalat, hegitsogo nak tagenebil lagalat, togu lemak o. Is an neiyagai ono’gwiang eiyetak pagathorloluk oruakma ebano en mukho lebik onobogwi ai, mesik emin togumu no yo, oluk an notok modok welago a’ge An Allah enat egi o.
10 #
Ima. 19:36
E’gin walhegeik demat hegit nagat ago holuk, di a’ge yu a’ge e’gin walhogulat, di a’ge yu a’ge yagaru a’ge walhegeik efa ’gela’ge re, ember lok a’ge ’gela’geatma re, emde lorop ago holuk nak walhegeik yagasogo pogulat, ye, nak u a’ge walhegeik bat ’gela’ge, jeriken lok ai ’gela’geatma re, emde lorop oso holuk nak walhegeik na’gogo pogulat, togu lemak o.
11Di a’ge yu a’ge yagaru a’ge walhegeik efa ’gela’ge ember lok a’ge emin, nak u a’ge walhegeik bat ’gela’ge jeriken lok a’ge emin, ai re ebe walhegeik emin hegit-hegit at o. Ye, homer ’gela’ge re, dorom ’gela’geatma re, dorom ogola nak uano re, jeriken lok a’ge lo na’gogo pogulat, ye, ember lok ai ’gela’ge re hegitsogoat lo na’gogo pogulat togumu re, ai pam walholuk wogontogu lemak o.
12 Uang syikal mesigat nak ai re, uang gera 20 at o. Ye, uang syikal 60 ai re, uang mina mesigat at o,” oluk osoma hegi o.
13“Enagai en an woknoum ano re yuat o. Gandum e’gen dorom hundomok yagatil lo louwa a’ge ano pam ember lok a’ge ogorlukmu we seperenam nak yagasogo wogulat, gandum ’gela’ge jelai e’gen dorom hun-domok yagatil lo a’ge ano pam ember lok a’ge ogorlukmu we seperenam nak yagasogo wogulat, togu lemak o. 14A’bosu nak u a’ge walhegeik bat ’gela’ge jeriken lok a’ge lo ai, homer ’gela’ge dorom mesigat nak o. Ye, a’bosu nak u a’ge walsogo bat’ gela’ge jeriken lok a’ge lo nak ogo po ai re, kor mesigat nakma re, nak u a’ge walhegeik kor emin, yagaru a’ge walhegeik homer emin, ai re, dorom mesigat nakma re, zaitun a’bosu wogoum a’ge op ano re, dorom pam ’berelogo na’gwil lagai a’ge ano nak u a’ge walhegeik jeriken lok a’ge pam walhogulat, dorom ebe lo’bok pam jeriken lok a’ge ogorlukmu we sepersepuluh nak na’gogo wogulat. 15Israel ono ’gwiang a’bosu welaga ano pam en e’gela a’bik libaga lomma ebano pam domba enebe 200 ago holuk nak mesik-mesik ’gegilogo wogulat, togu lemak o. Ai wogulom a’ge ’berlegat e, an en onowiak erlagap poluk nemin hwedik wolomogoluk, di e’gen yu e’gen ’balogo e’gen wogu lema a’ge an nebaget woknosu agalat, wusogo nebaget odouk narlogulat, nemin hwedik wolomogoluk woknosu agalat, asogo togulat, wogo poluk emin woknosu aga lemagoluk, an notok modok welago a’ge Allah enat egi o.
16Is aphwami o eba welema a’ge ’berlegat onogola enagai en po ano re, Israel a’ge onuk logo a’ge wogosu aga lemak o. 17Is Israel a’ge enagaisogo welat seni sorogulat, dugwi get pololisoam sorogulat, hup nogo 6 nogoluk loruk o’gwe togulat, seni sorogulom a’ge op ono ’berlegat togwi holuk, ap onuk logo a’ge enat wusogo odouk narlu a’ge paget emin, e’gen egesiso a’ge ebano po a’ge paget emin, a’bosu herlilogo po a’ge emin, hwalogo pasu lemak o. Is aphwami Israel a’ge onowiak erlagap poluk an nemin hwedik egesiso a’ge po wolomogoluk, onowiak erlagap po a’ge paget emin, e’gen po a’ge paget emin, wusogo e narlua a’ge paget emin, nemin hwedik wolomul a’ge paget emin, ap onuk logo a’ge ai enat hwalogo pasu lemak o,” oluk osoma hegi o.
“Agauwa lok a’ge wago holuk sorogulom o,” oluk, osoma hegi wene
18At otok modok welago a’ge Allah en egei ano re, “Yuat o. Dugwi naduk pelelak a’ge tanggal 1 dugwi ai pamat onowi worua a’ge orogole wiak agoma no oluk, op emagoluk, sapi ierak a’ge ot aik ’belak erlak a’ge woluk poumak o. 19Onowiak erlagapsogo pouma a’ge ai, worogwi holuk, is Allah eiye a’ge en emep weiyat wokho an nowi werikmu ’gogulomma ’goduk esa’go pema-pema emin, nebaget odouk ebale ebak demak a’ge eragam ogut ugan ano a’ge pam emin, nowi werik odipmu en ogola ’gwiloma ebano ’goduk esa’go pema-pema lagabak a’ge ano pam emin, egelik pil laga lemak o. 20Ye dugwi naduk pelelak a’ge tanggal 7 dugwi ai pam nak di ap yu ap wiak tu a’ge eberak erlakma at de li-lebek a’ge togulat, eneperlak welat en togulat, togwi holuk, is enebaget ai ’gela’geat togu lemak o. Asogo togwi ai pam an nowi werik a’ge ai, obab pogu lorogubat o.
21 #
Kel. 12:1-20; Bil. 28:16-25 Dugwi naduk pelelak a’ge tanggal 14 dugwi ai pamat seni eming non oluk laga oluk sorogu lemak o. Sorogulat, agauwa naduk en ’bekhit, agauwa sabiren lail lasu holuk, oroti peruagoluk emin po erlak a’ge werakho nogu lemak o. 22Agauwa ai pamat ap onuk logo a’ge en at o wiak erlagapsogo po a’ge paget emin, is aphwami o eba oruak a’ge ’berlegat onowiak erlagapsogo onobo a’ge enebaget emin, sapi ierak a’ge mesik wusogo soru a’ge paget pulogo pogu lemak o. 23Agauwa naduk en ’bekhit agauwa sabiren lail lasukhwe setil lo a’ge paget e, ap onuk logo a’ge en At Allah paget wusogo odouk narlu a’ge sapi ierak a’ge ebe sabiren emin, domba ebetne aik ’belak erlak a’ge ebe sabiren emin, polik pasulat, ye, onowiak erlagapsogo po a’ge kambing ierak mesik polik pasulat, tuak o. 24Sapi ierak a’ge ebe sabiren ebano wusogo soru a’ge ebe hegitsogo e’gen wogo yagaru a’ge walhegeik efa ’gela’ge ember lok a’ge mesik-mesik nak pil lasulat, domba ebe sabiren eriano wusogo soru a’ge ebe hegitsogo, e’gen wogo yagaru a’ge walhegeik efa ’gela’ge ember lok a’ge mesik-mesik nak pil lasulat, ye, walhegeik ember lok yagaru a’ge ebe gela’ge zaitun a’bosu liter ugan pil lasulat, taga lemak o.
25 #
Ima. 23:33-36; Bil. 29:12-38 Seni onuk, onowi sabo wetil wegesa a’ge ebesogo soru a’ge hwelak ano re dugwi hebarligen pelelak poluk, mesik pelelak a’ge tanggal 15 dugwi ai a’ge pam tuagoluk, togulom a’ge agauwa naduk hwerli en ’bekhit agauwa sabiren lail lasukhwe, ap onuk logo a’ge en onowiak erlagapsogo hebarligen onobo a’ge emin, nebaget wusogo e narlu a’ge emin, e’gen wogo a’ge emin zaitun a’bosu ne’gak emin, nebaget po a’ge pulogo pasu lemak o,” oluk, mo’gulnosoma hegi o.
Actualmente seleccionado:
Yehezkiel 45: Wul
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
