Yehezkiel 44
44
’Goduk ’gwi lagalomma mesik lerakma il hesi wene
1Asogo toluk, ap ano en an togolik Allah owi werik odipmu ’burl ’goduk ’gwi lagalomma abel o mo porlu ago hegit eba opma ebano nobou wagama ’goduk ai lerak oruakma hegi o. 2Asogo hasuam e, at Allah en an mo’gulneselat, “’Goduk yu horlogulat, aphwami mesigat nak ogo mesik ’goduk yu pam ’guagalat, tu ai modok miayatma re, lerak nak welemak o. Israel enaik ’gain nonuk logo a’ge Allah ’goduk yu pam arat ’gu agama re, ’goduk yu modogat lerak a’ge welemak o. 3Ap onuk logo a’ge ai re, emategat ’goduk ’gulagalom yuat ’gu otluk ogola eba an Allah nil pam so’boru nasu lemak o, wene ’balogulomma ’goduk ’gulagalom ano yu pamat ’guagalat yu pam nak libagalat, taga lemak o, oluk,” mo’gulnosoma hegi o.
Allah owi werikmu ’gwilasuam tu a’ge paget il hesi wene
4Asogo hasuam e, an woknoboluk o abel akhit o’gwe hegit eba ’goduk ’gwi lagalom o’gwe ’gwilotluk Allah owi werikmu eriano nobo’gwegei. Nobo’gwegeimu, yethasu’gal e, At Allah modok logo welat, amolit modok welago a’ge ano, At Allah owi werikmu elirat oruakma hegirik, norogole sogup ’gwiangma ’bou tegis. 5’Bou tegismu, At Allah en an mo’gulneselat, aphwami en dogo a’ge yu o. An Allah nowi werikmu tugulat u wene tak a’ge ’berlegat opsogoat pobitak pil lasulat, hesa’go opsogo hweliselat, asogo tagalat, an nowi werikmu eba salak en ’gogulom a’ge emin, salak en ’gogu lema erlak a’ge emin, pobirak pasu lomup o.
6Pobirak poluk, is wene tak a’ge tu enebit a’ge Israel a’ge mo’gulentasulat, at otok modok welago a’ge Allah en egei a’ge ano yuat o. Is Israel a’ge ai re, onogorlok a’ge til lagai a’ge ebano ai hwerliat ukpouwak o. 7Is en di tu, yu tu, onogorlok a’ge til lagalat, aphwami mu a’ge enagap ’belak erlak welat, enede anni a’ge nowi werik omu degelakma ebano wogonoboluk onobogwiam nowi werik wiagapsogo pogukhwe, is an neiyagai ai nede aganhan enebam payogoluk, so’boru emin, esei emin, mep emin, woknogularat de, nemin wene a’bosu ’balogo pege a’ge ano erlagapsogo pogulat, 8An na’ge a’ge di a’ge yu a’ge ano modok omu degelak a’ge ano eiye wolom isat eiye wolom a’geat de, eiye wolom erlakma en welat, nowi werikmu tugulom a’ge ap mu a’ge en tugu lemagoluk, edikpogulat, tigisa, egei o.
9At otok modok welago a’ge Allah en eselat, aphwami pema enagap ’belak erlak a’ge enede anni ai re, an nowi werik omu degelakma ’gwilouwa erlak o. Is aphwami pema Israel ene’gerlakma welagai a’ge ebano ogo re, ’gwilouwa erlagat o, oluk, mo’gulentegis a’geat de, tigisa o, oluk, mo’gulnosoma hegi o.
Ap Lewi a’ge Allah eiye welema erlak oluk osoma hegi wene
10“Is aphwami Israel a’ge ’gwani oluk ’gebela mu ’gwe lagaihwe, is Lewi a’ge en an uknebegesarik, an oruakhweat de, enasua erliktil laga legesema re, wiak tugu legesa o’go tagonobo ai re, is onomuat enebam welema o. 11An nowi werik omu degelakma ebano togulat, nowi werikmu emin, ’goduk ’gwi lagalomma emin, ’gwelakharok welat, ye, nebaget wusogo oduk narlu a’ge woluk wagalat, nebaget wusogo an woknoum a’ge ano, woknosu agalat, togwi holuk e, enebaget wusogo pogulat, mesik enebaget tu a’ge ano holuk e, enil pam at enebaget togulat, togulom op a’geat de, 12Enasua ogut enil pam is aphwami ai enebaget togwi ano pam Israel a’ge enarogun wokho onobouwagoluk tigisema re, is wiak tugu legesa o’go tagono’bo ano re, is onomuat enebam welema o, oluk, ho’buk ’balegis o. 13Is en an nebe eiye welemagoluk, neragam wagalat, na’ge di a’ge yu a’ge omu degelak a’ge ebano tenhau wagalat, na’ge modok omu degelak a’ge nebaget wusogo woknogwi a’ge ebano horok lau wagalat, tu modok mia onogorlok a’ge til laga legesa ai pam, tu puk a’ge modok til laga legesema ene’gerli hegesa a’ge ano re, ene’gerli pamat laga lemak o, oluk, ’gain nonuk logo a’ge an Allah enat egi o. 14Asogoat a’geat de, nowi werikmu eiye welat, mesik wiak ago holuk togulat, ye, mesik tu a’ge ago holuk tugulat, tugu lemagoluk, edik enebaik o, oluk, mo’gulnosoma hegi o.
Allah eiye a’ge en tugulom a’ge paget osoma il hesi wene
15Is Israel a’ge en an uknoboluk ’gwi’gwani ’gebela mu o’gwe lagaihwe, an nowi werik omu degelakma yabuk opsogo nak tugu legesema is ap nebe eiye Lewi a’ge ena’gul onuk Zadok pam en wigalak a’ge ano en nak an neragam wotluk, nil pam nebaget togulat, nil pam nebaget werak a’ge esei emin emep emin, pogulat, tugu lemak o, oluk, Notok modok welago a’ge an Allah enat egi o. 16Is en nak nowi werik omu degelakma ’guagalat, is en nak nagan delakma lau wotluk, tu a’ge paget an en mo’gulentasu a’ge ano nil pam tugulat, tugu lemak o. 17#Kel. 28:39-43; Ima. 16:4Asogoatma re, is en an nowi werik odipmu ebano ’goduk ’gogulomma, nowi werik odipmu parema eba ’goduk ’gwi lagalomma emin, an nowi werikmu emin, tugulat, onosum domba asu pam egeik a’ge ’buktak poluk tugulom mia o, a’geat de, sum op modok a’ge nak ’buk horlogu lemarik, ’gwilotluk togu lemak o. 18Sum il mit op a’ge ena’gul pagaiya tak pagathorlogulat, onosum il op a’ge enebagase sum ’buk horlogulat, tugu lemak o. Enerlegisak tagoma no oluk sogwei sum ’buktogumu no yo. 19#Ima. 16:23Ye, nowi werik a’ge odip o’borl akhit o’gwe neiyagai oruakma ’gwelagentail lagalat, onosum omu degelak a’ge ano pam aphwami en ’gwelak ontogulat e, wiagapsogo onobogumu no oluk, o ogola eba en tugulat, Onosum ’bukhorlogwi a’ge ebano no’gorlogo o ogorli omuat degelakma eba poluk, sum we a’ge ’buk horloluk libaga lemak o.
20 #
Ima. 21:5
Is enasu ena’gul hapsogo ’bal horlogu hweat, enasu yat a’ge ukpogulat, asogo togumu no yo o. A’geat de, enasu herik-horoksogo nak ’bal horlogu lemak o. 21#Ima. 10:9Is ap an nebe eiye a’ge en nowi werik odipmu eba ’gwi lagalat holuk e, a’bosu ik enede ’balago a’ge noluk ’gwi lagalom mia o.
22 #
Ima. 21:7,13,14 Is en hwami tugwe onobogwi a’ge emin, ap en hwami ugonobogwi a’ge emin, wogonobogulom mia o. A’geat de hwelani ap enemin nogogwi erlak a’ge Israel pam en weiyelak a’ge holuk de a? Is ap an nebe eiye a’ge en onugwami tugwe onobogwi a’ge holuk a, ai nak wogonobogu lemak o.
23 #
Ima. 10:10
Is en e, di a’ge yu a’ge ebabut pobirak pogulat, mesik ai re, Allah paget togulat tugulom a’ge paget polik oruak hegi o, ye, mesik yu re, we yogunat togulat tu a’ge paget hegi uak oluk, koluk neiyagai mo’gulontogwi a’ge, mesik tu miayat hegi o. Ye, mesik e tu op at hegi o, oluk, enagat houwagoluk mo’gulontogulat, tugu lemak o. 24Wene mesik ago holuk e, is an nebe eiye a’ge en onuak lol enebiso a’ge ’gela’ge at welat, tugulom a’ge an mo’gulentasu legi a’ge ano e’berligat motluk gat onowene a’bosu ’balogulat, onogola enagai en seni sorogulom a’ge paget o agauwa pulogo pegi a’ge ano tugulat, disogo togu lomup o,” oluk, mo’gulentasu legi a’ge emin, wene le’gelogo mo’gulentasu legi a’ge emin, opsogoat pobirak poluk nagat tugulat, ye, nogo 6 nogoluk, hubet o’gwe omu degelak welemagoluk, tugulat, tugu lemak o.
25 #
Ima. 21:1-4
Is ap an nebe eiye a’ge en enebam wiagap onobo no oluk aphwami waragai holuk e, ’gwelak onto mia o. Asogoat wene werak a’geat de, is a’ge opsogo enia ya, enaik a, enemalik ap logomalik a, hwelani a, onuelak onosilak ap a, enereilak onogunlak owan horlo erlak a’ge a, is nak e, ’gwelak onto op at o. 26Is ’gwelak enebam ema a’ge ano onowiak ontouwa a’ge hosogo poluk oruakhwe agauwa 7 pamat lai louwak o. 27Ye, an nowi werik omu degelak a’ge odipmu en ogo la eba nowi werik omu degelakma en tugu lomogoluk, ’gwi lagalat, is onowiak erlagapsogo onobo a’ge enebaget wusogo woknemak o, oluk, ’gain nonuk logo welago a’ge an enat egi o.
28 #
Bil. 18:20
Is ap an nebe eiye a’ge ebano enemining a’ge ’gela’ge eiye wolom a’ge an nebeatma re, is Israel a’ge enemining a’ge ’gela’ge ’gwiang wogentasulat, is an nebe eiye a’ge emin wogonto mia o. Di a’ge yu a’ge eiye wolom erlakhwe an nebe nagat eiye wolom o. 29#Bil. 18:8-19Gandum e’gen nebaget pou wagalat, onowiak erlagapsogo onobo a’ge paget nebaget wusogo woknogulat, nebaget pogwi a’ge ano lelak noboluk enede eberak wolomtik, ebalema woknosu agalat, togwi a’ge ano ’berlegat ai re, isat no’gulat, di a’ge yu a’ge o Israel eba ’gain nonuk logo a’ge Allah nebaget hosogo pogwi ano re isat eiyerak pagathorlogulat, tugu lemak o. 30E’gen naduk a’ge ’belak modok op a’ge holuk e, an nebaget pogulat, aphwami enede onogola enagai en di a’ge yu a’ge ’berlegat nebaget polik poluk, pou wagalat togwi ano re, is ap an nebe eiye ena’geat o. Nede aganhan is aphwami we a’ge onowi werik pam welemagoluk e’gen naduk a’ge arat op modok a’ge egeik a’ge ano me’gisogo naduk is an nebe eiye a’ge ebano wogentau waga lemak o. 31#Ima. 22:8Is ap an nebe eiye a’ge en di tue yu tue emin, ’baik hogobi teiye emin ai a’ge welak ’berlegat wokho no’gulat, asogo no’gulat pema pogwi a’ge ebano wokho no’gulat, tugulom modok mia o, oluk, osoma hegi o.
Actualmente seleccionado:
Yehezkiel 44: Wul
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
