Yehezkiel 46
46
Seni Sorogulat tugulom wene
1’Gain onuk logo a’ge Allah en egei ano re aiat o. Odipmu parema eba louwogoluk ’goduk ’gwi lagalomma o mo il porlu ago hegit eba oruak a’ge ano lerak oruakhwe, agauwa 6 pam yabuk tugulom a’geat de agauwa 6 takpoluk tono set hwal horlogulom a’ge ano pam emin, dugwi ’gera’ge peleliso holuk tugulom a’ge ano pam emin, ai re, ’goduk hwerik modok welemak o. 2’Goduk hwerik oruak ai a’ga pam e, ap ’gain onuk logo a’ge ano re parema en ’goduk ’gu aga lomma ogorli yatma ’gwilotluk, wene ’balogulomma da ’goluk ’goduk ’gwi lagalomma ’godukmu eria edik oruakhwe, is an nebe eiye a’ge en wusogo odouk narlu a’ge ap onuk logo a’ge en woluk wom a’ge ano, wusogo odouk narlogulat, an nemin hwedik tuak oluk wusogo woknoum a’ge woluk wom a’ge ano wusogo woknogulat, togwi holuk e, at en e, ogorli yat lokma ’gwi lagalomma ’goduk ’gu aga lomma eria en odogorlu pam sisogo erlik noluk en, libagalom a’geat de ’goduk ai, lerak hwerik nak oruak, o hupmuat lai louwak o. 3Nogo agauwa 6 takpoluk tono set hwalhorlogu lomma emin dugwi ’gela’ge peleliso holuk tugulomma emin, is aphwami o eba welagai a’ge holuk e, ogorlirakma ’goduk ’gwi lagalomma yel’berla pam eria ’Gain Nonuk logo a’ge nil pam onodogorlu pam hur otluk erliknobogu lemak o.
4Nogo 6 arat takpoluk e, tono set hwalhorlogu lomma, ap onuk logo a’ge ai en e. ’Gain Nonuk logo a’ge Allah nebaget wusogo oduk narlu ai, domba emalik ierak ebetne yebil erlak a’ge enebe 6 emin, domba ierak ebam aik ’belak erlak a’ge mesigat nak emin, woluk poumak o. 5Domba ierak mesigat a’ge ano wusogo odouk narlogulat, e’gen wedetla yagaru a’ge walhegeik efa ’gela’ge ember yat lok mesigat walholuk emin woknontouwagoluk pou wagalat, ye, domba emalik ano wusogo odouk narlogulat, e’gen yagarak a’ge emin, woknoum a’ge ai re, eminat woknoum epasu ’gela’ge, pou wagalat,
6Dogwi ’gela’ge peleliso holuk e, tugulom a’ge agauwa ai pam at en sapi ierak ot a’ge emin, domba emalik 6 emin, domba ierak mesik emin, ’berlegat ai re, ebetne aik ’belak erlak a’ge nak wusogo woknemagoluk, pasumak o. 7Sapi ierak mesik ano, wusogo woknogulat e’gen yagarak a’ge eminat woknoum a’ge ai yagaru a’ge walhegeik efa ’gela’ge ember lok a’ge mesik walholuk pou wagalat, domba ierak mesik ano wusogo woknogulat, e’gen yagarak a’ge emin woknoum a’ge yagaru a’ge walhegeik ember lok a’ge mesik walholuk pou wagalat, ye, domba emalik ano wusogo woknogulat, e’gen yagarak a’ge emin, woknoum a’ge ai emin woknoum a’ge epasukhwe pou wagalat, e’gen yagarak a’ge ano pou wagalat, ember lok a’ge ano re, ebe hegitsogo ’gela’ge, e zaitun a’bosu liter 4 nak pou wagalat, tugu lemak o.
8Ap onuk logo oruak a’ge ’gu ago holuk e, ’goduk ’gu aga lomma ogorli yat a’ge ano ’gwilotluk, wene ’balogulomma oruakhwe o ogola gwiselat, parema libagalat holuk ogo re ’goduk ai pam nak libagalat, tugu lemak o. 9-10Is aphwami o eba welagai a’ge ebano en ’Gain nonuk logo a’ge nil pam seni sorogulom a’ge paget agauwa pulik a’ge ano, paget soruogoluk ’gwi lagalat holuk nak e, an ’gain nonuk logo a’ge nil pamat ondogorlu pam hur otluk erliknobuogoluk ’gwi lagalom a’ge ai re, is o o’borl akhit hegit eba en ’goduk ’gwi lagalomma, ’gwi lagai a’ge ano re, o sogweik akhit ’goduk ’gwi lagalomma ano pam lebagalat, ye, o sogweik akhit hegit en ’goduk ’gwi lagalomma ’gwi lagai a’ge ano re, o sogweik akhit hegit eba ’goduk ’gwi lagalomma ano pam lebagalat, tugu lemak o. Is ’goduk ’gwi lagalomma ’gwi lagai ai pam libom ai mia o. A’geat de, is enematek-enematek ’goduk selakma ’gwi lagalom a’ge ai pam nak lebagalat tugu lemak o.
Ap onuk logo a’ge ano re, Is aphwami ’gu agai holuk, eneminat ’guagalat, ye, lebagai holuk e, eneminat libagalat, taga lemak o.
11Onogola enagai en o agauwa lok ago holuk tugulat, seni sorogulom a’ge paget pulik a’ge ano sorogulat, togwi holuk e, e’gen yagarak a’ge ano pou wagai ano re, sapi ierak a’ge wusogo woknogulat, yagaru a’ge walhegeik efa ’gela’ge ember lok a’ge mesik nak walholuk woknogulat, domba ierak a’ge mesik ano wusogo woknogulat, yagaru a’ge walhegeik ember lok a’ge mesik nak walholuk woknogulat, tuagoluk poumak o. Ye, domba emalik ano, re, wusogo woknogulat, emin woknoum a’ge is opogwi ’gela’geat yagaru a’ge walhegeik ember lok a’ge ano pou wagalat, ebe hegitsogo Zaitun a’bosu liter 4 wal e hegeik na’gogo poluk e, woknontouwak o.
12Ap onuk logo a’ge ede en e, o’go erlak weat wusogo odouk narlu a’ge Allah ebaget pele epasu a? At Allah ne ’birek la ’bolik weleik oluk, wogeik, epasu a? Tago holuk e, po ’guagoluk, ebaget ’goduk ’gwi lagaimu o mo porlu ago hegit eba oruak a’ge ebano husogo pouwak o. Husogo pogwi holuk e at en nogo 6 takpoluk, tono petne en wusogo odouk narliselat, an nemin la’bolik weleigoluk wokneselat, asogo tagalat, tago a’ge ’gela’ge takpoluk, liplai louwak o. Ye, libago holuk e, ’goduk modok lasogo pouwak o, oluk, osoma hegi o.
Loruk hupmu wusogo wogogulom wene
13Loruk hupmu at en domba emalik dogokhwe tahun mesik tak a’ge pam ebam aik ’belak erlak a’ge holuk e, an Allah nebaget poluk narluagoluk pou wagalat, tugu lemak o. 14Asogo tagalat, o hubet nak at en e’gen yagaru a’ge walhegeik efa ’gela’ge ember lok ogorlukmu nak seperenam pam walhasulat, e’gen yagarak a’ge ai re, omok ’balogo po a’ge zaitun a’bosu liter mesigat ’gela’ge walhasulat, takpoluk e, poumak o, e’gen yagarak an Allah nebaget pogulom a’ge ano re, tugulom a’ge wene werak a’geatma re, modok-modok tugu lemak o. 15Domba emalik emin, e’gen yagarak a’ge nebaget po a’ge emin, zaitun a’bosu ne’gak emin, ai re, hubet nak nebaget odouk narlogulat togu lemagoluk pou waga lemak o, oluk, osoma hegi o.
Ap onuk logo a’ge o’gwiang emining a’ge omlogo wogoum wene
16Allah otok modok welago a’ge Allah en egei ano re yuat o. Ap onuk logo a’ge ai en e, omlogo mesik emining a’ge ’gwiang wogoso holuk e, at omlogo o’gwiang at emama re, at wogoummu eiyagai weiyal ema a’ge emin, eiyetak pagathorloluk welema o. 17#Ima. 25:10Ye, at eragam a’ge mesik emining a’ge ’gwiang wogoso holuk nak e, at eiyerak pagathorloluk oruakhwe telakmasogo poluk tahun ai pamat lai louwak o. Lai lasu holuk e, emining a’ge wogoso a’ge ano pobuk aik at onuk logo a’ge ano at eiye ema o. Ap onuk logo a’ge emining a’ge ’gwiang ano re at eiyagai nagat ono’gwiangma re, is nagat eiyetak pagathorloluk welemak o. 18Ap onuk logo a’ge en aphwami ono’gwiang emining a’ge ai, at eiyerak pagathwerlasulat, is ono’gwiang pam en mukho lebigonobou mia o. Is an neiyagai ono’gwiang pam en ukpoluk libom no oluk, ap onuk logo a’ge ai enat ’gwiang ai nak eiyagai eiyetak pagathorlouwak emak o, oluk, osoma hegi o.
Ebaget werak a’ge sorogulomma nil hegi wene
19Asogo osoma hasuam e, ap ai en an woknoboluk o ogorli-ogorli omu degelakma is ap Allah eiye a’ge wolomma ’goduk ’gwi lagalomma horoksogo o o’borl akhit eba hegit ’goduk ’gwi lagalomma ebano nebei laga. Nebei lagarik, o mo obuk ilasu hegit eba o mesik eba werik oruakma hwiak nesi. 20Hwiakneselat e, an disogo mo’gulnesi, o ai re, is ap Allah eiye a’ge en aphwami Allah ebaget pogwi a’ge lelak poluk enede ebetholuk ebalema pou wagalat, onowiak erlagapsogo onobo a’ge pou wagalat togwi holuk sorogulat, e’gen yagarak a’ge sorogulat. E’gen daganak a’ge werarogulat, asogo tugulat, pema woluk e, Allah owi werik odipmu o’borl akhit ’gwi lagai holuk e, aphwami ’bete tagonobo no oluk, seni sorogumu aiatma re, eba nagat sorogu lema o, oluk, an mo’gulnosoma hegi o.
21Mo’gulnosoma hegirikmu en, an woknoboluk Allah owi werikmu odipmu o’borl akhit eba nebei lagarik, woknoboluk o o’gut 4 oruakma eba ematek-ematek odipmu weisogo ’berlegat oruakma yethil louwagoluk nebei lasumu hegi o. 22Odipmu parema o’gut 4 oruakma eba odipmu weisogo oruak a’ge ano walhasulat ologun yat a’ge ai re, meter 20 pam walhasulat, emde wigalak ai re, meter 15 hwerliat walhasulat, tegei. Odipmu wei-wei a’ge o’gut 4 oruakma oruak a’ge ano re, walhegeik modok hegitsogoat oruakma hegi o. 23Odipmu wei a’ge 4 eriano re helep leget werik a’ge ’gela’ge wali’gogo oruakma helep leget werik emde eragam sorogumu wi-waling ul ebale hele’gik oruakma hegi o. 24Asogo hasuam e, at en e, an disogo mo’gulnesi, O yu re, aphwami en Allah ebaget wusogo pou wagai holuk e Allah owi werikmu yabuk tugulom a’ge en sorogulomma yuat o, oluk, an mo’gulnosoma nil hegi o.
Actualmente seleccionado:
Yehezkiel 46: Wul
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
