Daniel 11
11
1Ap Media a’ge Darius ano ’gain agama tahun naduk tegei a’ge pam wene mo’gulentasulat, tu epasu a’ge ebano, at Mikhael en sebelogo pasukhwe, an en at Mikhael lethasulat, ne’birek soborak no’gulat, tu a’ge eberak poluk, taga legimu no, oluk en egi o, oluk egei o.
Ap ’gain-’gain o abel akhit hegit eba a’ge emin, o sogweik hegit akhit eba a’ge emin, en tu wene
2Asogoatma re, wene an en mo’gulheselegi a’ge yu demat epasu lomup o. O Persia yema ap onuelak ononuk oruak a’ge enebe henagan mesik inagalat togwi holuk e, ene’berlik at mesik inago a’ge ano is enebe henagan ene’gik erlak a’ge ’gela’ge oruakhwe at mesik yuno re, e’gik modok oruak a’geat welat, inago ano pam anni a’bigat agalomtik, ap aphwami Yunani a’ge eragam enebasulomma ebano sebelogo pouwagoluk, is aphwami eneragam onoboluk wolomma ’berlegat enede gagalil lasu lema ani o.
3Ai, tago holuk e, ap onue ’gain lok a’ge mesik inemarik, anni modok agalat, at ede epasu a’ge ebano nak wene mo’gulentasu lema ani o. 4Asogo nak til-til ologun pam e at eragam poluk wolomma eba re, ’bogorl ede’burl ya o sogwei erabu orogobu etleba yema en wetil wago akhit o’gwe hegit eba mi me’git pil louwama re, ai pam en wigalak a’ge en o 4 pamat me’git emma eba wene mo’gulontogulat, naduk at eragam onoboluk wolomma annisogo wolom ’gela’ge welat, tugu lema erlak o. At e, at eragam onoboluk wolomma eba, modok erlak agokhwe, ap mu a’ge eiyetak pouwa o.
5Ap o sogweik eba hegit en onue ’gain ano, anni ligema a’geat de, at osi enesegen oruak a’ge onue mesik en nage inagalat, anni modok ligemama re, wene mo’gulentasukhwe anni modok lokneat lok aga lema o. 6Pobuk nin tahun meren ’gela’ge takpoluk e’birek la’bolik poluk, is eneragam onoboluk, wolomma eba annisogo welemagoluk, ap o sogweik akhit o’gwe a’ge onue ’gain agalogo hwe dogum ano, ap o o’borl akhit o’gwe a’ge onue ’gain ano horlouwak oluk, wogosoam horlouwa a’geat de, at o sogweik akhit o’gule a’ge ai eragam poluk wolomma ano annisogo welat, ye, at agalogo wogoum a’ge ap ano eragam poluk wolomma emin, at pam en wigalak a’ge eneragam onoboluk wolomma emin, annisogo welat, taga lema erlak o. At eragam onoboluk wolomma erlak ema erlige at hwe ano emin, at ebaget tagalom a’ge emin, aik emin, at ebe woluk ap ’gain o o’borl akhit o’gwe hegit eba oruakma wokesilouwa a’ge ano emin, enebe ’berlegat wusogo onobouwa ani o. 7Asogo wusogo onobouwama, at hwe ano pam en dogoma a’ge mesik ia ano worogwiam e, ebalema erei ap a’ge ano inaga lemarik, at o erabu akhit o’gwe hegit eba en onue ’gain ano osilak enesegen oruak a’ge enemin weim obogulat, at wolomma helep pakleget wogo welema a’ge ano moluksogo pil-pil libagalat, mabenap onobouwa o. 8Sebelogo onoboluk, is enasua emin, enasua ogut ’besieme’gen pam hele’gik a’ge emin ena’ge emas perakpam hele’gik o’go modok lok a’ge emin, hogul wikwok o Mesir pei laik o. Asogo pei laiktik, erabu akhit weim ebilo erlakma en modok-modok oruakhwe tahun meren ’gela’ge ema o. 9Pobuk tahun meren ’gela’ge takpoluk, at ap erabu akhit o’gwe a’ge onue ’gain ano en at ap o sogweik akhit o’gwe hegit eba onue ’gain eragam poluk wolomma ebano hutla’gwi lotluk, pobuk, nin togolik owi pamat wema ai o.
10Pobuk at ap ’gain ano eiyagai en at ap o sogweik akhit o’gwe hegit a’ge onue ano, emin weim tuagoluk, ap enesegen oruak a’ge enebe modok a’bigat odoktagonoboluk ik ebe lok a’ge wagokhwe gagalu mia ago ai ’gela’ge, at osilak inotluk emin weim ebil ap o sogweik akhit o’gwe hegit eba onue ’gain wolomma helep pak wogoma oruakhweat de, ebam ’guogoluk tugukhwe, 11at ap ’gain o sogweik akhit a’ge ano en olot het agarik, at ap ’gain o abel erabu akhit welago a’ge ano osi enemin weim tigoluk osilak enesegen oruak a’ge enemin pulholuk legesa a’geat de at ap ’gain erabu akhit a’ge ano osilak enebe modok esan a’bigat enemin weim tigisa ’gale, is erabu akhit a’ge enebe modok esan a’bigat a’geat de mabenap enebesimu mo egesa. 12Is ap o o’borl akhit o’gwe a’ge ’gain osi enesegen oruak a’ge enebe esan ebano, at ap ’gain o sogweik akhit oruak a’ge ano en herle wusogo wogonoboluk lasu ano pam ede en logo pasulat enebe esan logolak ai wusogo onobouwa a’geat de, at eragam onoboluk wolomma ebano anni welema modok erlak o.
13Tahun meren ’gela’ge, takpoluk, at ap o abel o’borl akhit o’gwe onue ’gain ano en osilak enesegen oruak a’ge naduk ano enebe we wei nak ’gela’ge a’geat de, pobuk modok a’bik esanat enesegen onogodok modok leik-louktak poluk at ap o sogweik akhit o’gwe a’ge onue ’gain ano sebelogo pouwok oluk louwa ani o. 14Asogo tua ai erlige is aphwami a’bigat en e, ap yu en tennentarok wolom nenebit o, oluk, at ap o sogweik akhit a’ge onue ’gain ano, sebelogo pouwogoluk tua o. Ye, habi mo’gulhosokhwe hegen ano ’gela’geat, is aphwami hat a’ge nak ene’gerlakma en ap enede he tak a’ge en onolot heragalat, ap yu at iak hologulom nenebit o, oluk, sebelogo pouwogoluk tua a’geat de miayat ema o. 15Asogoat tugukhwe, at ap o erabu akhit o’gwe a’ge onue ’gain ano lasu lemarik, at ap o sogweik akhit a’ge onue ’gain owi o kota helep pak werisoma ano guok oluk, onoyuk berla pogulat, ’gwiang palogo pil ligagalat, takpoluk o ano ’gogukhwe, at o sogweik akhit a’ge onue ’gain osilak enesegen oruak a’ge ebano en e is enemin weim tu a’ge en anni erlak agalat, is pema weim en anni a’bik a’ge enemin welegesa a’ge ebano en ogo re mabenap agalat, tua on. 16At o sebele’gwi lasu a’ge ano en at agai epasu a’ge ebano nak til lasukhwe, is aphwami logon en at mabenap pouwa erlak at o, ’gwiang modok a’ge ’berlegat yu re, an eiye o, oluk, ’gwilotluk eiye wolom a? Erlagapsogo po a, ai re, at en nak taga lema o.
17At o erabu akhit o’gwe ’gain ano en nosi enesegen oruak a’ge neragam onoboluk oruakhwe enanni a’bik welagai a’ge enebe ’berlegat emin ap o sogweik o’gwe hegit eba ’gain eragam onoboluk, oruakma eba sebelhwerlai louwok o, oluk, osilak odoktagonoboluk ’gwi laga lemarik, ap o sogweik akhit a’ge ’gain ano emin, la’bolik poluk, at eragam onoboluk wolom a’ge ebano sebelhwerlaik oluk agalogo hwe dogum a’ge ano at wogema a’geat de, at en eberak poluk tua a’ge ai demat nak agalat, pobirak poluk nak eselat, tua erlagat o. 18Pobuk, olukhwe agam agalat, is aphwami onowi o ik esa’go’gwe welagai a’ge ebano a’bigat sebelogo enebil lasumu re, ap enesegen oruak a’ge onue mesik inotluk at ’gain ano mabenap poluk togolik ligaga at ’gain ano ugaregat maben otluk huranesogo welemagoluk takpesi. 19Pobuk at ap ano olukhwe edenhasulat, at o’gwiang eiye wolomma pema kota-kota helep pak werik pasumu ebano at enebit opogwi a’ge ebano sebelogo enebei laigoluk, til wagoma, at u’gwaregat sebelogwiam e, at ebe enil mesik hogu lema erlagat o.
20Ap ’gain a’ge ai re naduk at ai en o’gwiang tenak welaga a’ge ’berlegat eiye welagarik erlak agoam e, ebalema at omlogo ano at ’gain agarik welat o ’gwiang aik en tenak welaga a’ge ’berlegat eiye agarik welat, ’gwiang modok opma eba at u’gwarek eiye weleriogoluk e, is ap pema en pajak o’go wogulat, odoktogwi a’ge ebano odoksogo woknosumagoluk ap mesik perakpasuam e, ene’bek lagarik waga. Ageat de, ap ’gain ano tahun meren ’gelage at welagarik en onuk erlak agalat, ebe waraga. At ebe waraga ai re, weim en ogo aphwami onolot het en o’go waraga erlak o.
Ap ’gain enebabut wiak a’ge nak inema wene
21At ap ’gain a’guluak erlagapsogo pouwa a’ge ano ebalema re, ap mu a’ge mesik aiklak ’gain ebano ononuk pam en wigalak erlakhweat de ap mesik ebabut modok wiak a’ge welat aphwami en ai edikpo opogwi erlakhweat de we eneperlagat oruakma, onue ede poluk enat inagalomtik iak di u yu u il lasulat, o eba sebel horlouwa ani o. 22Is ap enesegen oruak a’ge esan odoktak a’ge ebano en, at emin walholo e oluk, tua a’geat de, is ’berlegat, sebelogo enebasulat, Allah eiye a’ge onue ’gain pulogo edikpesi a’ge ano ogo sebelogo pasulat, tua o. 23At en tugulom wene is aphwami abi’gat enemin il lasu lomtik en at de, pobuk li-lagak iagesei nak il lasu lotluk, at eiyagai enebe wei nagat a’geat de at modok anni ago yo. 24At eiye wolomma di owi yu owi ’gwiang modok molimu ebano aphwami onogola enagai en we yogun at oruakma, at en sebelhwerla’gwiselat, at e’balak emin, aiklak emin, tu opogwi a’geat de, mia aga laga a’ge ano at enat til lasulat, hogul wogo a’ge ano emin o sebelhwerlasulat, ene’gikmu a’ge delak a’ge emin, aphwami ena’ge-a’ge emin, at osi emin no’gwi a’ge ebano so’busogo wogentil lasulat, o pema helep pak werik poluk welagai a’ge ebano emin sebelil laik o, oluk, eberak poluk, sebelil lasulat, tago a’geat de, til lasu a’ge ano we loduat til louwa o.
25At en ap o sogweik akhit a’ge onue ’gain ano sebelogo paik oluk osi enesegen oruak a’ge enebe a’bigat enanni yethegeik modok enede sebelak poluk, wogonoboluk lasuam e, at ap o sogweik a’ge onue ’gain ano ogo osi weim togwi a’ge enebe esanat, enaluk a’ge nakma re, enemin obua a’geat de, osi en nagat at ai nenebit o, oluk, at sebelogo po a’ge paget eberak pogwi ano pam anni erlak agama re, ’gagalogo mo u a’ge erlagat ema o. 26At ap ’gain ano emin so’boru mesikmu no’gulema a’ge enat at ebe erlagapsogo pouwok oluk togwi ai en, anni erlak ago a’geat de, at osi enesegen oruak a’ge ebano en ogo, o e’gerlal dabopsogo wusogo enebil louwa ani o. 27Is ap ’gain enebe ’biren en, “At yu wiagap paik,” ye, at mesik ben, “At yu wiagap paik,” oluk e’birek en enede asogo eberogwi ano, e delak at yu, wiagap paik mesik a’ge pam hurotluk, tu a’ge e’birek eniak eseiat a’basu dep-dep ogulat, o ologun ’gobok tu a’ge we’gelak a’ge ano, owan ’gogolil lasumu re, is en tu a’ge ebesogo pogwi a’ge ano almasogoat eberua ani o. 28Pobuk at ap o erabu akhit o’gwe a’ge ’gain ano en di a’ge yu a’ge a’bigat woluk owi pam wemarik, wagalat e, is aphwami Allah emin, wene arat ologun ’balogo polik pesi a’ge omu degelak a’ge til lagai ano re, wiagap paik oluk o, oluk, arat polik pasumu re, wiagapsogo poluk owi pamat wema o.
29Pobuk ai erlige disogo tik o, oluk, tak a’ge ano lau wago holuk e, at en o sogweik akhit o’gwe pobuk, “Mesik emin sebelogo pei laik,” oluk tua a’geat de, at naduk ’gwi lasulat, tua a’ge ano ’gela’ge tua erlak o. 30At e, at emin weim tu a’ge di kapal yu kapal o Kitim en a’bigat wagaiam ogorlok en uak erlik oluk, at owi pam pobuk togoligat wema o. Ye, wagalat e, aphwami Allah emin wene arat daksogo pesimu omu tak a’ge til lagai a’ge ano at ebit modok enepasumu re, olot het agalat, wiagapsogo poluk owi pam wema o. Owi pam wotluk pobuk togolik lasu lemarik, is aphwami Allah emin wene modok daksogo ’balogo pesi a’ge omu tak a’ge til lagai ano tu erlakma en ukpogwi holuk e, at en hegirap poluk, obap onobouwa o. 31#Dan. 9:27; 12:11; Mat. 24:15; Mrk. 13:14Is ai obap enebasularat de, at osi enesegen oruak a’ge enanni agalat, Allah owi werik helep pak wogo oruak a’ge ano takpogulat, loruk hupmu. Allah paget wusogo wogogwi a’ge ano wogoum mia o, oluk mo’gulontogulat, ye, at Allah owi werikmu wiagapsogo po a’ge enemelmel a’ge mesik edikpogulat, tua o. 32Is aphwami Allah emin en wene arat daksogo po’gwi a’ge ano tu erlakma en ukpogwi a’ge ebano en, op tige opoluk, at iak hologu lemagoluk, iak a’bosu pam mo’gulentil louwa a’geat de, is aphwami Allah en osokhwe togwi a’ge ebano en nak e, at ap ai en il noso a’ge iak ai modok nenebit o, oluk tu erlakma en ukpogu lema ani o. 33Is aphwami ene’gerlakma ap enede oruak a’ge ebano en tugulom wene ano, po’gwi pouwagoluk, mo’gulnontogwiam togu lomul a’geat de, o agauwa meren ’gela’ge agokhwe is ap mo’gulontogwi a’ge ai wa’gun pam waronobogulat, enebe odouk ’gwelebak onobogulat, herle waronobogulat, ye, ena’ge-a’ge ene’gik abusak hogul horlogulat, togu lema ani o. 34Is, asogo tagonobogukhwe, is weisogo nak lerontogu lema a’geat de, is aphwami a’bigat en, no pam en sabuthorlul e? oluk, enemin louwa ani o. 35O ologun ’goboksogo tu a’ge agauwa pulogo pesi a’ge ano arat hegitsogo wemama re, owan lau wom erlakhwe, is aphwami enede oruak a’ge en mo’gulontogwi a’ge logon, wusogo onobogwi a’ge eba re, enede hurle emagoluk enebabut ’balogulat, enede op a’ge at oruakhwe ontogu lemagoluk tagonobogulat, enedemu om erlakma en oruakhwe ontogu lemagoluk tagonobogulat, togukhwe, o ologun ’gobok lauma ani o.
36 #
2Tes. 2:3-4; Wah. 13:5-6 At ap ’gain ai en tu ede epasu a’ge ano nak til lasulat, ede logo pasulat, asua ’berlegat sebelak oruakhweat de, “An nak logo welegi,” oluk epasulat, is aphwami en erliktogwi a’ge ’berlegat enaik enasua en mia epasulat, iak osokhwe hogwi erlak a’ge iak eselat, tuo o. At Allah en tu a’ge paget pulogo pesi a’ge ebano. Nak demat et til louwa ai en e, Allah olot hettak pil lasulom erlige owan om erlakhweat de, ap ai iak yogun yogunat il lasu lemagoluk, ukpaik o. 37At ap ’gain ai en e, “An nak e elit welegi,” oluk, epasu lemama re, at aiklak enasua erliktagalat, is hwami enasua erliktogu lema a’ge ano ogo, erliktiselat, di asua yu asua ’berlegat erlik enebiselat, tua modok erlagat o. 38At ap ai aiklak enasua eneperlak en erliktu erlakma en helep pak werik a’ge ’gwelakharok welagai a’ge ebano a’ge de erliktagalat, ebaget emas emin, perak emin, helep o’go lok amolit a’ge emin, di a’ge yu a’ge op a’ge emin, wogese lema ani o. 39Is aphwami mu a’ge enasua erliktagalat, helep pak wogo a’ge modok anni a’bik oruakhweat de, moluk-melaksogo pasulat, “Nue ’gain harat o,” oluk, eragam ’gonu oluk ’gogwi holuk e, logo enebasulat, is di aphwami yu aphwami tenentarok welemagoluk, edik enebasulat, ye, at eragam ’gu agai a’ge o’go ’gwiang ’balogo wogentasulat, taga lema o.
40A’geat de, o arat ologun ’gobok horok lau wago erlige at ap o sogweik ogwe hegit a’ge onue ’gain ano en at o erabu akhit o’gwe a’ge onue ai, e’birek weim tik oluk, wagoma re, at ap o o’borl akhit o’gwe a’ge onue ’gain ano osilak enebe esan enemin en ik ebe wago ai ’gela’ge, kuda weim togwi a’ge pam emin, Kereta weim togwi a’ge pam di kapal yu kapal a’bik a’ge pam emin hurotluk libagalat, di owi yu owi ’berlegat sebelil laga lema ani o. 41O ’Gwiang op modok welagokhwe ogo sebelil lagalat, aphwami enebe a’bigat wusogo enebi lagalat, tua a’geat de, o Edom emin, Moab emin, is aphwami Amon a’ge onuelak emin, ebano nak e, at e’gikmu ema erlagat o. 42At en di owi yu owi ’berlegat sebel lil lasulat, o Mesir ogo re, sebel nagat louwa o. 43O Mesir sebeliselat, emas welaga a’ge emin, perak welaga a’ge emin, di a’ge yu a’ge o’go lok a’ge enede hwedik welagai a’ge ’berlegat at nak sebelhwerlasulat, is aphwami Libia a’ge emin, is Kus a’ge emin, at e’bek wagaiam enemin otluk, til lasulat, taga lema ani o. 44Ai, til lasukhwe, o mo orlu ago hegit eba akhit en o erabu akhit o’gwe eba en wene il lagalom a’ge ’berlegat, esa’go hwelise lemarik olot het modok a’bigat agalat, aphwami enebe a’bigat warenebil wagalat, ena’guluak erlagapsogo enebaik oluk, o eba wema o. 45Wotluk, ik lok ye’gelak a’ge laut ano pema welat, ye, dom op a’ge omu pulik a’ge ano pema welat, tak oruakhwe, ’burl eba at anni a’bik a’ge atma, owirabo modok op a’ge worua a’geat de, at erlak om a’ge o ologun lau wago ai en e, aphwami logon en at lethogwi erlakhwe, a’goluak erlak ema o, oluk, egei.
Actualmente seleccionado:
Daniel 11: Wul
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
