BILANGAN 31
31
Hataholi Israel-la latee-latati balas hataholi Midian-nala
1 Manetualain nafa'da Musa nae, 2“Matee-matati balas hataholi Midian-nala, nanahu sila tatao-nono'in la'eneu leoina Israel-la. Basa ndia soona, besak-ka mate o.”
3Boema, Musa nafa'da leoina Israel-la nae, “Maheheleaom leona, fo meu matee-matati; emi muse sapu-ma hataholi Midian-nala, fo tao matetu Manetualain huhukun-na neus. 4Neme leoina Israel-la, leon esa mai soona, emi muse sadia-ma solda'du lifun esa, fo leu latee-latati.”
5Boema, neme leoina Israel-la, leon esa soona, ala hele-la hataholi lifun esa, de basa-basan lala'en-na, hataholi lifun sanahulu dua, laheheleaon fo leu latee-latati. 6Musa nadenus, fo latee-latati sama-sama loo Pinehas, fo Imam Eleazar-ra anan-na. Pinehas ho'inini bua-lo'as malalao-malalafuk-kala, ma pupuuk-kala, fo ana fe ta'du-tana nenik pupuuk. 7Nandaa no Manetualain paletan neu Musa, de hataholi Israel-la sapu-la hataholi Midian-nala, de ala taolisa la'iesak toun-nala, 8fo Midian mane ka liman-nala lai dalek boe. Mane ka limak sila-la nde: Ewi, Rekem, Zur, hur ma Reba. Ala taolisa Bileam, fo Beor anan-na boe.
9Hataholi Israel-la foo leni basa inak-kala ma ni'iana Midian-nala, ma ala kalo leni la'iesak bana-manun-nala, boema su'i-beten-nala lala'en-na. 10Kotan-nala, ma lalaa oofun-nala boeo, nanahotu henik. 11Basa ndia boema, hataholi Israel-la ho'i-la basa buas kakalok sila-la, loo basa hataholi nanafook-kala, ma bana-manun-nala, 12de lenis leo Musa ma Imam Eleazar-ra ma basa hataholi Israel-la lala'en-na neu. Nai lelek ndia, ala bei ofu lai masadokek Moab-pa, nai Lee Yarden-na su'un-na, fo deka no kota Yerikho-a.
Solda'du Israel-la fali ma'is
13Boema Musa, Imam Eleazar ma basa hataholi Israel-la mauli-malanga fe'en-nala, kalua leme mamana oofuk-ka mai, de ala soluk solda'du Israel-la. 14Musa namanasa basa malanga solda'du manai lain-nala, ma basa malanga solda'du-la, ma malanga solda'du manai dae, fo besak-ka ala fali ma'is leme natee-natatik dale mai. 15Nafa'das nae, “Tao le'e de emi po'ilotak basa inak sila-la, laso'da? 16#Bil. 25:1-9 Ade inak sila-la, ta nde tunga Bileam nanoli-nafa'dan, de nalosa ala fufu'di-oodok hataholi Israel-la neme Peor, fo ala boso lilineka neu Manetualain hetu? De ndia nde neni soe neu Manetualain anan-nala! 17Nah, besak ia, taomisa ni'iana touanak lala'en-na, ma basa inak lala'en fo, ta matatema so'on. 18Tehu emi bole ho'i-ma basa inak fo bei matatema, fo emi soas. 19Ma basa emi fo, taomisa hataholi so, do koila'e mamates-sa, muse mahele meme lalaa oofuk-ka deak, faik hitu dalen-na. Neu faik-ka telun-na, ma faik-ka hitun-na soona, emi ma basa inak fo emi foo menik sila-la, muse tao feta tao nalalao-nalalafu aoinak-ka. 20Basa bua papakek ma su'di beek fo taon neme bana louk, neme bi'ihiik-ka bulun-na mai, do neme ai mai, muse tao nalalao-nalalafus boe.”
21Basa boema, Imam Eleazar-ra nafa'da hataholi fo, “Besak-ka ala fali ma'is leme natee-natatik dale mai sila nae, Manetualain fe Musa nakanenetek-kala nde ia. 22-23Basa hata lala'en fo, ha'i ta na'a fan, sama leo lilopilas, lilofulak, liti, besi, tima fulak ma tima nggeok, muse tao nalalao-nalalafus, nenik nulis nenik ha'i. Basa soona, bua-lo'as sila-la boeo, muse nanatao nalalao-nalalafuk nenik oe malalao-malalafuk-ka. Basa buas fo ha'i bisa na'an, muse tao nalalao-nalalafus nenik oe malalao-malalafuk-ka. 24Neu faik-ka hitun-na soona, emi muse safe emi bua papakem-ma, fo besak-ka emi ta manggenggeok so'on, de bole meu leo lalaa oofuk dale meu.”
Ala baba'e bua-lo'a kakalok-kala
25 Manetualain nafa'da Musa nae, 26“O ma Imam Eleazar-ra, sama-sama moo hataholi Israel-la mauli-malangan fe'ek-kala, muse leke la'iesak bua kakalok sila-la, loo basa hataholi nanafook-kala, ma bana-manu. 27Emi muse ba'e bua kakalok sila-la neu baba'ek dua ma muse beke dede'uk; fe baba'ek esa leo solda'du fo leu latee-latati, ma baba'ek esa leo hataholi Israel-la neu. 28Au, fo Manetualain, baba'e heheling-nga neme solda'du sila-la mai, metema natun lima soona, o muse ho'i-ma esa, nau neme hataholi nanafook-kala mai, do neme sapi, keledei, bi'ilopo ma bi'ihiik-kala mai boe. 29Fe basa sila-la leo Imam Eleazar-ra neu, fo da'di leo tunu-hotu hehelik soaneu Au, fo Manetualain. 30Neme hataholi Israel-la baba'en-na mai soona, metema limahulu soona, o muse ho'i-ma esa, nau neme hataholi nanafook-kala mai, do neme sapi, keledei, bi'ilopo, ma bi'ihiik-kala mai boe. Fe basa sila-la, leo hataholi Lewi fo, manaito-ato Au Lalaa Temang-nga.” 31Musa ma Imam Eleazar-ra, taon sama leo Manetualain paletan-na.
32-35Fe'ek neme solda'du-la baba'en-nala mai, bua kakalok sila-la, basa-basan, bi'ilopo bi'ihiik 675.000, sapi lifun hituhulu dua, keledei lifun neehulu esa, ma anafe'oana matatema lifun teluhulu dua. 36-40Ala fe basa sila-la seli leo solda'du-la leu, de dede'un-na nde ia: bi'ilopo bi'ihiik 337.500, de ala kalua heni natun nee hituhulu lima soaneu tunu-hotu hehelik ba'eneu Manetualain; sapi lifun teluhulu nee, de ala kalua heni hituhulu dua soaneu tunu-hotu hehelik ba'eneu Manetualain; keledei lifun teluhulu natun lima, de ala kalua heni neehulu esa soaneu tunu-hotu hehelik ba'eneu Manetualain; anafe'oanak matatema lifun sanahulu nee, de ala kalua heni teluhulu dua soaneu tunu-hotu hehelik ba'eneu Manetualain. 41Boema Musa fe tunu-hotu hehelik sila-la, leo Imam Eleazar-ra neu, fo soaneu tunu-hotuk ba'eneu Manetualain, sama leo Manetualain paletan-na.
42-46Laun-na no solda'du-la baba'en-nala beke dede'uk fo nde: bi'ilopo bi'ihiik beke 337.500, sapi beke lifun teluhulu nee, keledei beke lifun teluhulu natun lima, ma anafe'oanak matatema beke lifun sanahulu nee. 47Sama leo Manetualain paletan-na, de metema hataholi nanafook ma bana-manu limahulu soona, Musa ho'in-na esa, fo ana fen leo hataholi Lewi, fo manaito-ato Manetualain Lalaa Teman-na neu.
48Basa boema, basa malanga solda'du manai lain-nala, leu leo Musa leu, 49de lafa'dan lae, “Tuan, ami leke basa ami solda'du anam-mala so. Te se'kona lamadai, ta mopo esa boen. 50Hu ndia de, ami meni esa-esak ho'in-na lilopilas, sue limak, sue eik, ndeli, lolo'ek ma faneti-la leo Tuan mai. Basa sila-la, ami fes leo Manetualain neu, da'di leo ami tunu-hotum, fo ela Ana nasulu-nahapa nehele ami.” 51Boema Musa no Imam Eleazar-ra, sipo-la basa bua-lo'as lilopilas sila-la. 52Malanga solda'du manai lain sila-la, tunu-hotun belan-na, hihii nae kilo natun dua. 53Tehu solda'du anak-kala esa-esak, ho'i falik ndia bua kakalon sila-la, fo nanuun. 54Boema, Musa no Imam Eleazar-ra, leni lilopilas sila-la leo Manetualain Lalaa Teman-na neu, fo ela Manetualain nasulu-nahapa leoina Israel-la.
Actualmente seleccionado:
BILANGAN 31: twu
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
