BILANGAN 30
30
Nakanenetek la'eneu nasar
1Musa fe nakanenetek ia-la, neu basa leoina Israel-la. 2#Ul. 23:21-23; Mat. 5:33 Metema touk esa fe nasar, do naheluk no Manetualain nenik soo-supak, nalosa ana pa'a aoinan-na neu hehelu-balataak esa, soona muse ana tao natetu hehelu-balataan ndia, fo ta bole nalelesi seluk hala-kokolan-na fa.
3-4Metema anafe'oanak esa, ana leo nai aman uman, fo ana fe nasar leo Manetualain neu, ma ana pa'a aoinan-na neu hehelu-balataak esa, de aman namanene dede'ak ndia boema, ta nahala nae le'e esa boen, soona anafe'oanak ndia, muse tao natetu nasar fo ana heluk ndia. 5Tehu metema, nai lelek aman namanene dede'ak ndia boema, ana ta nau fa, soona anafe'oanak ndia, natapo'i neme nasar ma hehelu-balatan ndia mai. Neukose Manetualain fen do'o do ampon neun, nanahu aman ta nau fa.
6-7Metema anafe'oana sao beitak esa, ana fe nasar do ana pa'a aoinan-na neu hehelu-balataak esa, fafa'kama ana tai-dodoo nakahuluk-kana, do ka'da leondiak mesak-kana, soona anafe'oanak ndia, nanapa'ak no nasar ma hehelu-balataan ndia. Metema nai fai makabuin, ana saoana soona, anafe'oanak ndia nanapa'ak no nasar ma hehelu-balataan ndia, sa'di nai lelek saotoun-na namanene dede'ak ndia, te ta nahala nae le'e esa boen. 8Tehu nai lelek saotoun-na namanene boema, ana kena-ka'in, soona natapo'i neme nasar ma hehelu-balataan ndia mai. Neukose Manetualain fe do'o do ampon neun.
9Metema inafalu esa, do ina maela saok esa, ana tao nasar, do hehelu-balataak fo nanapa'ak no aoinan-na soona, inak ndia nanapa'ak no nasar do hehelu-balataan ndia, de muse ana tao natetun.
10Metema ina masaok esa, ana tao nasar, do hehelu-balataak fo nanapa'ak no aoinan-na soona, 11muse ana tao natetu basa hata lala'en fo, ana helun ndia, sa'di nai lelek saotoun-na namanene dede'ak ndia, te ta nahala nae le'e esa boen. 12Tehu metema, nai lelek saotoun-na namanene dede'ak ndia boema, ana kena-ka'in, soona inak ndia natapo'i neme nasar, do hehelu-balataan ndia mai. Neukose Manetualain fen do'o do ampon, nanahu saotoun-na kena ka'in. 13Saotouk-ka nanuu haak, soaneu nakaheik, do ana ta sipok nasar lala'en-na, do hehelu-balataak fo saoinan-na taok-ka 14Tehu metema, nai lelek saotoun-na namanene dede'ak ndia, te nahala nae le'e esa boen soona, inak ndia muse tao natetu basa nasar lala'en-na, do hehelu-balataan-na. Saotoun-na nakaheik nasar do hehelu-balataak ndia, nanahu nai lelek namanene, te ta nahala nae le'e esa boen. 15Metema nai fai makabuin, saotoun-na ta sipok saoinan-na nasar do hehelu-balataan ndia fa, soona saotoun-na nde muse lu'a-lepa tatao-nono'in nininin-na.
16Nakanenetek sila-la nde Manetualain fen neu Musa, la'eneu nasar do hehelu-balataak, fo anafe'oanak esa taon, nai lelek ana bei leo nai aman uman, do ina masaok esa, ana taon.
Actualmente seleccionado:
BILANGAN 30: twu
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
