SADEONG 86
86
Sambeang makabian tulungan
1Daud nasambeang.
Oh Temeneno, lengelekai dakusambeang, tukon timbiliyakukai,
sabab yaku nia talalais tukon muyuko kobutonggo.
2Sabab Ikoo seseangaku, tobikon doiya dagaiyokai dakutuboan,
tukon salamatenekai Komuata momaangga doi-Koo.
3Ikoomokai daku Mian Bisa, seseangaku oh Temeneno,
sabab popupuson kooloyo daku sambeangan doi-Koo.
4 Temeneno, labakenekai Komuata noano,
sabab tongo doi-Koo dakuotukano konoanggu.
5Oh Temeneno, Ikoo monondok, tukon yase moompuniyo komian nasala,
komian mosambeang doi-Koo tataap Ikoo seseange tukon seang molobi-lobian.
6Oh Temeneno perhatikanggenekai dakusambeang,
lengelekai dakuponguang makabi tulungan.
7Doi tempo kukasulitanan yaku sambeang doi-Koo,
sabab Ikoo timbiliyaku.
8Oh Temeneno, akiyo ko temeneno pokakana Ikoo,
akiyo komo moola lakukene oila Komulinakukon.
9 #
Ink. 15:4
Oh Temeneno, sasaibino kobangsa Ikoo tealikene naikon lubat,
sulano nasosubaiyo Ikoo tukon nanggaale Komubabasalan.
10Sabab Ikoo tambongan barani tukon lakukene kolangge-langge minasaindinggon,
tongo Ikookai ko Mian Bisa.
11Oh Temeneno, otunggukanakukai komumongiasan doiyaku,
sulano kuloingiyo tukon tutuu;
tealikanakukai mian matakutene ko Temeneno tukon tootubo konoanggu.
12Yaku basyukul doikoo tukon tootubo konoanggu,
oh Temeneno ku Mian Bisa;
yaku nggaale Komubabasalan sidutu-posidutukon.
13Sabab Ikoo tataap seseangaku tukon seang mobabasal;
Ikoo lapamo sodiiyo dakutuboan luwedoi kubur leengo.
14Oh Mian Bisa, komian babanggal abali lubat tukon lobosiyaku,
meeng kotambuno komian molokis yase moakateyaku;
yanila aki napopusinggon Ikoo.
15Bai Ikoo, oh Temeneno, Mian Bisa mobabasal kona neaasi tukon peseseang,
sabar, moono seang tukon nasetiaan.
16Perhatikanggenekai tukon mamaasikanakukai,
kobukuanggenekai tukon salamatanakukai,
sabab pokakana kotinanggu,
yakukai lakukanggene Komuaturan tukon tutuu.
17Beekanakukai kopaloosan Mumonondokan, oh Temeneno,
sulano komian momosikitanaku teali mamaa,
kalu yanila kitayo Ikoo motulungiyaku tukon hiburaku.
Actualmente seleccionado:
SADEONG 86: LAIBGZ
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
