SADEONG 71
71
Mian momotuamo tuuno nasambeang
1Oh Temeneno, yaku soop doi-Koo,
inai batadikanaku kuinakamaa.
2Oluputaku, sabab Ikoo adil;
lengelekai tukon salamatanaku.
3Tealikai doi yaku pokakana kobunggul batu daku lipu dungolan,
mogampang daku laatano sidutu.
Sabab Ikoo putusemo sulano musalamatanaku;
Ikookai daku lipu soopan tukon sapitan.
4Oh daku Mian Bisa, oluputakukai luwedoi mian molokis
luwedoi mian-mian molokis kona kokubai tukon moakiyo konaseang.
5Oh Temeneno, Ikookai daku moinian,
Temeneno, yaku maangga doi-Koo salataa doi kutabokonan.
6Yaku potubokon tongo yaku sosinggalang doi-Koo;
salataa yaku sosuung Ikoo osoopakumo
tobikon doiya yaku nggaale Ikoo posidu-sidutukon.
7Daku tuboan teali sonto doi mian mobadaang,
sabab Ikoomokai daku soopan mobukuan.
8Yaku sidutu ngaale Ikoo,
sasamba kooloyo kubabilitakene Komu babasalan.
9Inaikai Mosakukanaku doi tempo kumotuaan
inai mootinggalaku kalu daku bukuanan kabuso,
10sabab daku musuh-musuh basalitakanaku
komian-mian moiyase akateaku yanila pomenggono.
11Kona pobantilano, “Yana Mian Bisa tinggalemo;
mai ndalelenggene tukon ndalakoyo yana,
sabab akiyono komo salamatene yana.”
12Oh Mian Bisa, inaikai Mododonggong doiyaku,
oh daku Mian Bisa, tulungakukai soisobit.
13Batadikenemokai komian molubotiiyaku tukon yase akateaku,
napo inakamaa tukon napo inakate kabus.
Batadikenemokai komian moiyase osilakaaku
napo pusing tukon napo tinotulai.
14Bai yaku naikon sidutu moini doi-Koo,
tukon momeenggon badaang luunggon kunggaale Ikoo.
15Sasamba kooloyo naikon yaku basalitakene
Komu kokubai-kokubai moadil,
tukon kokasalamatan moluwe doi-Koo moaki natangait.
16Yaku nggaale Komu kokubai motambongan oh Temeneno Mian Bisa,
yaku babontilanggene Komuadilan,
Komuadilan tolong.
17Oh Mian Bisa, Ikoo otunggulakumo salataa doi kutabokonan,
polong budodoiya daku basalitakanano Komu limang mominasaindinggon.
18Oh Mian Bisa, inai mootinggalaku,
polong doi tempo kumotuaan tukon mbombolo dakubuuk,
sulano kubabontilanggene Komu kuasa tukon Mubaranian
doi sasaibino katulunan naikon molubat.
19Oh Mian Bisa, Komuadilan pokakana kotimbu konakatandakan;
babasalkai Komu kokubai-kokubai;
indee komo moola pokakana Ikoo?
20Ikoo benggu badaang kosakisaa babalat,
bai Ikoo naikon abalinggene kobukunggu
tukon otuboiyaku luwedoi kibul lalomo.
21Ikoo naikon kubaiyaku teali inodotii lobian,
tukon Ikoo hiburaku koidan.
22Yaku yase nggaale Ikoo tukon gambus,
sabab Ikoo tulu-tulutan, oh ku Mian Bisa.
Yaku yase manyanyikene kopanggaal doi-Koo tukon kacapi,
oh Mian Bisa moliyous doi Israel.
23Yaku kokuweis tukon laba-laba tuuno,
tukon yaku manyanyikene konggalano doi-Koo.
Kobutonggu sasaibino manyanyi tukon laba-laba,
sabab Ikoo salamatanakumo.
24Sasamba kooloyo yaku naikon babontilanggene Komuadilan,
sabab komian-mian moyase silakayo yaku
lapamo linunggui tukon inakamaamo.
Actualmente seleccionado:
SADEONG 71: LAIBGZ
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
