SADEONG 69
69
Sambeang doi kasulitan lalomo
1Tuuk mokatuaiyo konyanyian. Loingiyo kolagu: Bakung bungano. Luwedoi Daud.
2Oh Mian Bisa, salamatanakukai,
sabab kopaisu libamo polong doi bulunggu.
3Yaku topolos doi lapetak moatean,
akiyo kotampat bakanggian.
Yaku molomos doi paisu moatean,
maka kobokol lalinakumo.
4Yaku masa-masadai sampe pakadak
tukon kobulunggu kayungo motuul.
Komatanggu poloon mototiili daku Mian Bisa Nabatuan.
5 #
Sad. 35:19; Yoh. 15:25 Komian momosikitene yaku akiyo konaalasan,
lobian konakadaang luwedoi buuk doi olunggu.
Komian-mian mobukuan yase kulokisene yaku;
yanila nggimal bapitanaakene yaku.
Yaku pinakisaa moabalinggene
kobuat moaki kurampase.
6Ode Mian Bisa, Ikoo toiyo daku kasalahan-kasalahan
daku lalim aki natosookon doi-Koo.
7Inai mosobiyaku molubatene komaa
doi mian-mian momoinikene doi-Koo,
ode Temeneno, Mian Bisa Mo Balakuasa.
Inai mosoobiyaku molubatene kosilakaan
luwedoi mian-mian mososubaiyo doi-Koo,
oh Mian Bisa doi Israel!
8Sabab Ikoomokai maka yaku tinotulai,
sabab Ikoomokai maka yaku sinosibolii.
9Yaku teali buno mian lulubaton tuuk doi kumontolutusan,
bunokai mian bailon tuuk doi utusonggu langgongo utusonggu pioto.
10 #
Yoh. 2:17; Rm. 15:3 Yaku samangat tuuno sabab kukilakanano Komu Bonua,
komian mototulaiyo Ikoo pisayo kobutonggu.
11Yaku kokiil tukon bapuasa,
bai yanila tolongo lotulaiyaku.
12Yaku bangotoik karung salaku palosan mosusa,
bai yanila tongo sindiraku.
13Doi mian napototongian tongo yaku komo sinalita,
pokakanamo komian momalangu nakokubai konapo manyanyikanano yaku.
14Bai yaku sambeang doi-Koo, oh Temeneno,
oh Mian Bisa, timbiliakukai doi tempo mo monondok.
Tulungakukai sabab Mumaasi mobabasal
tukon tobikon Mutulut-tulutanan.
15Inai batadikanaku tanggalaup doi lapetak lalomo,
tobikon doiya salamatanakukai luwedoi mian-mian momosikitanaku
tukon luwedoi paisu moatean.
16Inai batadikanaku kulinalin bokol mobabasal,
tukon yaku teali tombul polong doi buta modaano doi tobun lalomo
kai kinibul doi leng lalomo.
17Oh Temeneno, timbiliakukai,
sabab Ikoo monondok tukon tataap meseseang.
Sanangkai mombalengaku
sabab babasalkai Komuseang.
18Inaikai moseekene kobutomu luwedoi Muata nia,
sabab yaku susah,
tobikon doiya basadiakai mutulungaku.
19Lubatkai mosalamatanaku,
oluputanakukai luwedoi kumusuh-musuh.
20Ikoo toiyo bulaando daku piniadaan, tinotulai tukon sinangol,
Ikoo kitayo sasaibino dakumusuh.
21Kopototulai lapamo kubaiyo moloto konoanggu,
tukon akimo kutoyo oilamo daku kinubai.
Kumongumbalkai seang, bai aki kumalaat,
kumongumbal mian mohiburaku, bai aki kumalaat.
22 #
Mat. 27:48; Mrk. 15:36; Luk. 23:26; Yoh. 9:28-29 Tongo yaku binee lasum teali kukinaan;
doi tempo kumolouan, yaku binee cuka sulano kuinume.
23 #
Rm. 11:9-10
Sobiyomokai konapo lamean nalubatene kosilakaan,
tukon nateali talong doi mian nakinolo.
24Sobiiyomokai komatanoila teali piit
tukon kobukutoila namuyuk.
25Kundongikenekai Komungginalan doiyanila,
sobiiyomokai napotinepak Munggimalan mokolot-kolot.
26 #
Kis. R. 1:20
Sobiiyomokai konapo basandungan teali kiis tuuno,
tukon konapo sandung-sandung akiyo komian molubat.
27Sabab yanila sakisayo komian Ikoo moukume,
tukon basalitakene komian-mian Ikoo mosakisaayo.
28Batadikenemokai konapo kasalahan natosuungi badaang,
inai molisakene yanila.
29 #
Tob. 32:32; Ink. 3:5, 13:8, 17:8 Sobiiyomokai kosambunoila nainapus luwedoi mian motubo nabuku;
tukon aki natinulis doi mian momoloyos konoano natinulisan lalomo.
30Bai Yaku tataap linailainggon tukon tataap komasakitan,
oh Mian Bisa, bingkatakukai tukon salamatanakukai.
31Maka yaku naikon nggaale ko Mian Bisa,
moakabasale yana tukon nyanyian sukuur.
32Doiya komo pokokonoi tuuno doi Temeneno kalu baino sosubakon saapi,
doiyamo sosubakon saapi langgilo mobabasal.
33Kalu andeno yanila kitayo doiya, komian molinailainggon labalaba,
komian mososubaiyo ko Mian Bisa teali babasal konoano.
34Sabab ko Temeneno lengele komian motalalis nakakabi;
tukon Yana aki nabatadikene Konamian doi talunggu lalomo.
35Ponggaalekai ko Mian Bisa, eh sasaibino komotubo doi timbu tukon doi dunia,
tukon sasaibino komotubo doi lalomo.
36Yana naikon salamatene ko Yerusalem
tukon kekendenge koi-koidan kokota-kota doi Yehuda.
Ko Temeneno namian naikon dungol indaa;
butadoo tealimo konila.
37Konapau tumbu naikon komo pusakaiyo,
komian-mian mokilayo ko Temeneno naikon komodungoliyo.
Actualmente seleccionado:
SADEONG 69: LAIBGZ
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
