SAKALIA 5
5
Te takaiga tohi
1Nee au toe hiki ake leva oku mata, o sio: Koeni, nee i ai he takaiga tohi ae nee lele. 2Pea nee ui mai leva e te aselo kia au: Kotea te mea ae e ke sio ki ai? Nee au tali leva: E au sio ki he takaiga tohi ae e lele; nee meta hogofulu tona loa, pea nee meta nima tona laulahi. 3Nee ina ui mai leva kia au: Ko te tohi aena o te malaia ae e mafola anai ki te fenua katoa. Koteuhi e tuu i te tahi fahai e kapu anai te u tagata kaihaa fuli mai te fenua aeni, pea e tuu i te tahi fahai e toe kapu foki natou fuli ae nee faifakapapau loi mai te fenua aeni. 4E ui e te Eteleno o te atu fua tau: E au liligi ia ia, o tupu ke ulu ia ia ki te fale o te tagata kaihaa pea mo ia ae e fakapapau loi i toku huafa, o tupu ke ina fakatuu i ai tona nofoaga, pea ke ina maumaui ia ia mo te papa pea mo te u maka.
Te agakovi a Suta
5Nee fakaovi mai leva kia au te aselo ae nee palalau mai kia au, o ui mai kia au: Hiki ou mata, o sio ki te mea ae e malaga mai he. 6Nee au tali leva: Kotea? Pea nee ina ui mai leva: Ko te kulo aena. Pea nee ina toe ui leva: Ko te kulo aena kua tanaki ai te u agahala o te fenua katoa. 7Pea koeni, nee malaga ake leva he potu pulu mamafa ae nee tapunu aki ai te kulo, pea nee au sio leva ki he fafine ae nee lala i lotomalie o te kulo. 8Pea nee ui mai leva e te aselo kia au: Ko te agakovi aia. Pea nee ina humuki leva te fafine ki te loto kulo, pea nee ina si leva ki te gutu o te kulo te potu pulu mamafa.
9Nee au hiki ake leva oku mata, pea nee au sio leva: Koeni, nee ha mai leva ni fafine e toko lua ae nee felelei i te matagi. Koteuhi nee i ai ni ona pakakau o hage ko te u pakakau o te motuku. Nee na too leva te kulo o ave ki te vaha o te kele mo te lagi.
10Nee au ui leva ki te aselo ae nee palalau mai kia au: E na ave leva ki fea te kulo? 11Nee ina tali mai leva kia au: E na olo o fakatuu he fale kia ia i te fenua o Sinea; pea ka osi anai ia ia, e na hili anai te kulo ki tona tuuaga.
Actualmente seleccionado:
SAKALIA 5: WB2011
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
