Isaías 35
35
Siónman runakuna kutiyänanpaq ninqan
1Tsay witsaymi tsunyakuna y tsaki pampakuna kushikuyanqa.
Qara patsakunachömi tukuyläya qewakuna llullurraq tuktunqa.
2Waytakunapis pushuqarraqmi tuktuyanqa.
Pampakunapis kushishqam cantayanqa.
Muntikunapis Líbano jachakunanö kuyakuypaqmi kayanqa.
Chakrakunapis kuyakuypaq Carmelunö y Sarónnömi kayanqa.
Tsaymi Diosnintsik poderyuq kanqanta pïmaypis tantiyayanqa.
3Manärayaptiki makikikuna warkakaqnö kaptin
y alalaychö qonqurnikikuna watakaqnö kaptinpis valorakuyay.#Heb. 12.12.
4Mantsakaqkunata nishun:
<<¡Ama mantsakäyaytsu!
¡Valorakuyay!
¡Diosnintsikmi yanapayäshunki!
Ñakatsiyäshuqnikikunatam castiganqa.
Kikinmi shamur salvayäshunki>>.
5Tsaymi qaprakunapis rikäyanqa.
Mana wiyaqkunapis wiyayanqa.
6Ratakunapis lluytsunöraqmi saltaykachäyanqa.
Mana parlaqkunapis shiminkuna pashtaptinmi kushikur cantayanqa.#Mat. 11.5; Luc. 7.22.
Desiertukunachömi atska yaku pashtamunqa.
Tsaki patsakunapam mayunöraq yaku aywanqa.
7Tsaychömi qochakunapis kanqa.
Yakukunam pashtamunqa.
Chacalkuna pärayanqanchömi shoqushkunawan ututukuna jeqayämunqa.
8Tsaymanmi nänipis chanqa.
Tsay nänipam shutin kanqa: Diosman Chäna Sagrädu Näni.
Jutsa ruraq runakuna manam tsay nänipa puriyanqatsu.
Mana yachayyuq runakuna manam tsay näniman jaruyllapis jaruyanqatsu.
Dios Yaya munanqannö kawaq runakunallam tsay nänipa puriyanqa.#Isa. 41.18; 43.19-20; 44.3-4.
9Tsay nänipaqa leonkunapis manam puriyanqatsu.
Jatusaq chucaru wätakunapis manam yaykuyanqatsu.
Tsaypaqa salvashqa kaq runakunallam puriyanqa.
10Tsay nänipam Dios Yaya salvanqan runakunalla Jerusalénman kutiyämunqa.
Kushishqa cantaraykarmi Siónman yaykayämunqa.
Tsaychömi imaypis kushishqalla kawakuyanqa.
Imaypis kushishqa alli kawakuyaptinmi llakikuywan waqaypis kanqanatsu.#Isa. 51.11.
Actualmente seleccionado:
Isaías 35: qxn
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
© 2011, Wycliffe Bible Translators, Inc. All rights reserved.
