Isaías 36

Senaqueribpa capitannin Dios Yayata manakaqman churanqan

2 Reyes 18.13-37; 2 Crónicas 32.1-19

1Chunka chusku wata Ezequías rey kaykaptinmi Asiria nacionpa mandakuqnin rey Senaquerib Judá nacionman soldädunkunawan chäyarqan. Chaykurmi alli murallashqa markakunata atacar qechuyarqan.

2Rey Ezequíaspa contran shärirmi Laquis markapita maytsikaq soldädunkunatawan capitanninta Jerusalénman Senaquerib kacharqan. Jerusalénman chaykurmi janaq kaq pözuman aywaq sekya lädunchö campamentuta rurayarqan. Tsayqa taqshakuna pampaman aywaq nänichömi karqan. 3Tsaymi tsay capitanwan parlayänanpaq Jerusalénpita aywayarqan Hilcíaspa tsurin Eliaquim, Sebna y Asafpa tsurin Joa. Eliaquimmi palaciuchö kaqkunata cuidaq, Sebnanam secretariu y Joanam Judáchö ima päsanqankunatapis qellqaq karqan.

4Chaykuyaptinmi capitán nirqan: <<Ezequíasman kutir Asiriapa mandakuqnin rey ninqanta willayay: <¿Piman confiakurtan yarpanki venciyämänaykipaq kanqanta? 5¿Alli parlaq kayllaykiwanku guërrachö venciyämayta yarpanki? ¿Piman confiakurtan conträ shäriykanki? 6Egipto runakunaman confiakuyaptikipis manam yanapayäshunkitsu. Mandaqnin Faraónpis tsillishqa shoqush makikikunata kallapaqnömi qamkunapaq kanqa.#2Rey. 18.21; Eze. 29.6-7. Payman confiakuqkunapaqqa imaypis tsaynöllam kaykan.

7<< < <<Diosnïllamanmi creyikuyä>> nimaptikipis manam paypis yanapashunkitsu. Markakunachö kaq altarkunata juchuskatsir Judá runakunata <<Jerusalénllachö Dios Yayata adorayay>> ninqaykipitam payqa rabyashqa kaykan> >>.

8<<Noqakunawan pelyayta munarqa mandamaqnï rey Senaqueribwan parlay. Bestia montayta yachaq soldäduykikuna kaptinqa noqam ishkay waranqa (2,000) bestiakunata pelyanapaq alistapäshayki. 9Guërra carrëtakunata y bestia montaqkunata Egiptupita apamurpis tsayraq yachakuq capitannïkuna mandanqan soldädunkunallatapis manam venciyta puëdiyankitsu. 10Kikin Dios Yayam nimashqa kay nacionta ushakätsiq shayämunäpaq. Ama yarpäyaytsu kikïkunapa yarpaylläkunapita kay nacionta ushakätsiq shayämunqäta>>.

11Tsaymi Asiria soldädukunapa mandakuqnin capitanta Eliaquim, Sebna y Joa niyarqan: <<Murälla jananchö kaykaq runakuna ima niyanqaykitapis mana tantiyayänanpaq ama hebreo idiömachö parlayaytsu. Tsaypa rantin arameo idiömachö parlapäyämay. Noqakunaqa arameo idiömatam yachayä>>.

12Tsaymi Asiria nacionpa capitannin nirqan: <<Manam patronnikillata ni qamkunallata willayänaqpaqtsu Asiria nacionpa mandakuqnin rey kachayämashqa, sinöqa murälla jananchö kaykaq runakunatapis willayänäpaqmi kachayämashqa. Atacayaptiqmi alläpa mallaqar rakchaykikunatapis mikuyanki y alläpa yakunarmi ishpanikikunatapis upyayanki>>.

13Tsaypitam Asiria nacionpa capitannin sharkur hebreo idiömachö jinchi nirqan: <<Shumaq cäsukuyay Asiria nacionpa mandakuqnin rey ninqanta. 14Paymi nin: <Rey Ezequías niyäshunqaykita ama cäsuyaytsu. Podernïpita manam pay salvayäshunkitsu. 15<<Dios Yayallaman confiakuyay>> niyäshuptikipis ama creyiyaytsu. <<Dios Yayam salvayäshunki>> niyäshuptiki ni <<kay markatam pay tsapanqa>> niyäshuptikipis 16ama cäsuyaytsu>.

<<Asiria nacionpa mandakuqnin reymi nin: <Conträ shäriyanqaykipa rantin shumaq chaskiyämay. Podernïchö karqa cada ünum üvaykikunatawan hïgusnikikunata tranquïlu mikur kawakuyanki. Tsaynöllam kikikikuna rurayanqayki pözupita yakutapis tranquïlu upyayanki. 17Tsaynö kawakuyänaykipaqmi juk nacionman apayäshayki. Tsay nacionqa kay nacionnikinömi kaykan. Tsaychömi tantata rurayänaykipaqpis atska trïgu. Vïnuta rurayänaykipaqpis allishmi üva wayun.

18<< <Dios Yayam salvamäshun> niyäshuptikipis Ezequíasta ama creyiyaytsu. Manam mayqan nacionpa diosninta mayjina mañakuyaptinpis podernïpita salvashqatsu. 19Hamat runakunata atacaptï ¿maychötan diosninkuna karqan? Tsaynölla Arfad runakunata y Sefarvaim runakunata atacaptï ¿maychötan diosninkuna karqan? Samaria markata atacaptïpis manam ni mayqan diospis salvashqatsu. 20Tsay nacionkunapa diosninkunapis manam salvayta puëdiyashqatsu. Tsaynömi ni imanöpa Jerusalénta makïpita Diosnikikuna salvayta puëdinqatsu>>.

21Tsaynö niptinpis murälla jananchö kaykaq runakuna manam ni imatapis parlayarqantsu. Paykunatam rey Ezequías yätsishqa karqan ni imata mana contestayänanpaq. 22Tsaymi Hilcíaspa tsurin Eliaquim, Sebna y Asafpa tsurin Joa alläpa yarpachakur llatapankunatapis rachiskiyarqan. Eliaquimmi palaciuchö imaykakunatapis cuidaq, Sebnanam secretariu y Joanam Judáchö ima päsanqankunatapis qellqaq karqan. Tsaypitam rey Ezequíasman aywayarqan Asiria nacionpa mandakuqnin runa imata ninqantapis willayänanpaq.

Actualmente seleccionado:

Isaías 36: qxn

Destacar

Copiar

Comparar