Isaías 34
34
Edom nacionta castigananpaq ninqan
1Maytsay nacionchö täkuqkuna, wiyayämänaykipaq shayämuy.
Maytsay markachö täkuqkuna, qorikäyämuy.
Kay patsapis y kay patsachö kaqkunapis, llapayki wiyayämay.
2Llapan nacionpaqmi Dios Yaya rabyashqa kaykan.
Nacionkunapa soldädunkunapaqmi rabyashqa kaykan.
Paymi llapan nacionkunata ushakätsinqa.
3Wañuqkunapa ayankuna ismurmi alläpa asyar jitaräyanqa.
Jirkakunachömi yakunöraq yawar kanqa.
4Ciëluchö kaqkunapis tsullurmi ushakäyanqa.
Röllu lluyllukaqnömi ciëlupis lluyllukanqa.
Qoyllurkunapis tsakishqa rapranömi shikwayämunqa.
Üva jachapa y hïgus jachapa tsakishqa raprannömi shikwayämunqa.#Apoc. 6.13-14.
5Ciëlupita Dios Yayapa espädan shamurmi Edom nación runakunata ushakätsinqa.
Paykunatam castigar ushakätsinanpaq Dios Yaya destinashqa.
6Runakunata ushakaskatsirmi Dios Yayapa espädan yawarllana y wirallana kanqa.
Bosra markachö runakunata wañutsirmi Dios Yayapaq sacrificiuta pishtapakuqnö kayanqa.
Dios Yayapa espädanmi üshakunapa y chïvukunapa yawarninwan pichukashqa kanqa.
Carnërukunapa rurunninpa wiranwanmi pichukashqa kanqa.
7Tsaychömi törunöraq kallpasapa runakunapis ushakäyanqa.
Törunö valienti jövinkunatapis jankatmi wañutsiyanqa.
Maytsaychömi yawar mashtaranqa.
Allpapis wirawan pichukashqam kanqa.
8Tsay witsaymi Sión runakunapa chikiqninkunata Dios Yaya ushakätsinqa.
9Llapanta ushakätsiptinmi chikiqninkuna täkuyanqan nacionchö raqrakunapa yaku aywanqanpa rantin breallana#34.9 Breaqa yana qetänömi. Breapaq, azufripaq y chakrakuna rupayänanpaq parlarmi desgracia päsananpaq parlan. aywanqa.
Allpakunapis azufrimanmi tikranqa.
Chakrakunapis breanömi rupanqa.
10Paqasta junaqta mana upiypa rupaptinmi qoshnillana shärinqa.
Tsaynö ushakätsiptinmi imayyaqpis tsunya tikranqa.
Tsaypaqa manam pipis purinqanatsu.#Apoc. 14.11; 19.3.
11Tsaychömi pärayanqa pelïcanuwan erïzullana.#34.11 Erïzuqa lechón tamäñum wätanchö kashayuq.
Tukuwan akakallanam qeshunkunapis rurayanqa.
Dios Yaya jankat ushakätsiptinmi tsay nacionchö ni ima kanqanatsu.
12Manam rey ni autoridäkunapis mandakuyänanpaq kayanqanatsu.
13Palaciukunachöpis shirakallanam juntanqa.
Murallashqa markakunachöpis shinwäwan cardón kashakunallanam juntanqa.
Chacalkuna pärayänan y avestruzkunapa chipshankuna puñukuyänanllanam kanqa.
14Chucaru wätakunawan hienakunallanam tsaychö pärayanqa.
Chucaru cabrakunallanam tsaychö waqapänakuyanqa.
Chushiqkunapis ni pï mantsatsishqam kayanqa.
15Tukukunam tsaychö oqllayanqa.
Pashtatsiyanqan chipshankunatam oqllayanqa.
Wiskulkunapis chinan orqum tsaychö pärayanqa.
16Tsayta musyayänaykipaq Dios Yaya qellqatsinqan rölluta liyiyay.
Tsaychö qellqashqa kanqannöllam llapanpis chinan orqu kayanqa.
Dios Yaya ninqannöllam tsay wätakuna tsaychö pärayanqa.
Tsaychö pärayänanpaqmi Espïritun qorinqa.
17Kikinmi tsaychö täkuyänanpaq tsay wätakunata churanqa.
Tsaymi imaypis tsaychö täkuyanqa.
Actualmente seleccionado:
Isaías 34: qxn
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
© 2011, Wycliffe Bible Translators, Inc. All rights reserved.
