Isaías 26
26
Dios Yaya yanapanqanpita alabayanqan
1Tsay witsaymi Judá nacionchö kay cantuta cantar niyanqa:
<<Markantsikmi alli perqawan tsapashqa.
Dios Yaya tsapämashqaqa ishkay murällawan tsapashqanömi kaykantsik.
2¡Alli ruraq runakuna yaykayämunanpaq markapa punkunta kichapushun!
¡Dios Yaya munanqannö kawaq runakuna yaykayämutsun!#Sal. 118.19-20.
3<<Qamllaman creyikuqkunataqa alli kawakuyänanpaqmi imaypis yanapanki.
Qamllapaq yarparaqkunataqa mana llakikuyänanpaqmi imaypis tantiyatsinki.
4¡Dios Yayallaman imaypis confiakushun!
Payqa tsinkakunantsik rumim imayyaqpis kaykan.
5<<Dios Yayam orgullösukunata manakaqman churan.
Täkuyanqan markatam jankat juchutsir ushakätsin.
6Ushakätsiptinmi ñakaqkuna y waktsakuna tsay runakunata asipäyanqa.
7Peru alli ruraq runakunatam sïqa pitsashqa nänipanö puriyänanpaq yanapan.
Allillata ruraq karmi tranquïlu kawakuyänanpaq imaypis yanapan>>.
Dios Yaya salvananpaq shuyäyanqan
8 Dios Yaya, mandamientuykikunata cäsurmi salvayämänaykipaq shuyaykäyaq.
Qamllamanmi imaypis yarparäyämü.
9Paqaspapis qamllamanmi confiakayämü.
Patsa waraptinpis llapan shonqükunawanmi mañakayämü.
Runakunata castiganqaykita rikarraqmi wakin kaqpis llutan ruraykunata dëjayanqa.
10Peru mana alli ruraqkunam sïqa llakipaptikipis mana alli ruraykunata dëjayanqatsu.
Alli ruraq runakunapa lädunchö täkurpis mana allikunallatam rurayan.
Poderösu kanqaykita musyaykarmi mana allikunata rurayan.
11 Dios Yaya, tsay runakuna manam tantiyakuyantsu castiganaykipaqna kaykanqanta.
¡Kuyanqayki runakunapa favornin kanqaykita rikar penqakuyätsun!
¡Chikishuqnikikunata castigar nina ushaqnöraq ushakaykatsillay!#Heb. 10.27.
12 Dios Yayallä, tranquïlu kawakuyänäpaqmi qamlla yanapayämanki.
Qam permïtiptikim llapan imayka rurayanqäpis allilla.
13 Dios Yayallä, mandakuq juklä runakunam poderninkunachö katsiyämashqa.
Tsaynö kaptinpis qamllamanmi imaypis confiakayämü.
14Tsay mandakuqkunatam castigar ushakätsishkanki.
Paykunatam wañutsir illakätsishkanki.
Tsay runakunam kawayämunqanatsu.
Paykunapaqqa mananam ni pipis yarpanqanatsu.
15 Dios Yaya, bendicionnikiwanmi nacionnï jatunyashqa.
Mujunninkunatam mas washaman wititsishkanki.
Tsaynö ruranqaykipitam qamta alabayaq.
16 Dios Yaya, alläpa sufritsiyämaptikim ashiyarqaq.
Castigayämaptikim rugakayämurqä.
17Wachay nanaywan warmi qochpar qayaraykachaqnömi puntaykichö qayaraykachäyashkä.
18Juklä nación runakuna alläpa sufritsiyämaptinmi ni imanöpa salvakuyta puëdiyashkätsu.
Manam alli kawaytapis tariyashkätsu.
19Peru qamman confiakuqkunam sïqa kawayämunqa.
Pampaskiyaptinpis shäriyämunqam.
¡Allpaman tikrashqa kaqkuna, sharkur kushishqa cantayay!
Qamkunatam alli kawakuyänaykipaq Dios Yaya yanapayäshunki.
Shushalltanömi salvacionninta kachamunqa.#Eze. 37.
20Marka majikuna, wajikikunaman yaykuskir punkuykikunata wichqapakayämuy.
Dios Yayapa rabyaynin päsanqanyaq tsinkaräkuyay.
21Täkunqanpitam Dios Yaya yarqamunqa.
Kay patsachö täkuqkunatam jutsata rurayanqanpita castiganqa.
Runakuna pakayllapa wañutsiyanqantam kay patsapis upällakunqatsu.
Wañutsikuq kayanqanpita castigayänanpaqmi shimpinqa.
Actualmente seleccionado:
Isaías 26: qxn
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
© 2011, Wycliffe Bible Translators, Inc. All rights reserved.
