मत्ति 2
2
सिक्कुम्निबा खागे़इक्पाहाॽ मे़दाःॽ
1आल्ल ये़सुन् यहुदिया थुम्मोबा बेथले़हे़म पाङ्जुम्मो सावाःन्छिङ्बा ये़म्मो हे़रोद हाङ्ङिल्ले़ खे़प्मो हाङ् चोगुर वये़रो॥ ये़सुन् सावाःन्छिङ्ङाङ् नाम्गे़न् पिसाङ्बा लाजेॽलाम् सिक्कुम्निबा खागे़इक्पाहाॽ यरुसले़म्मो मे़द्ये़, हे़क्क्याङ् 2अक्खेलॽरिक् पान् सेःन्मे़दोसु, “यहुदिहाॽरे़#२:२ यहुदिहाॽ—अब्राहामरे़ कुमुॽइदाङ्साहाॽ यहुदि मे़मे़त्तुसिॽरो॥ खुनिॽ हाङ् के़बोङ्बाआङ् सागे़वाःन्छिङ्बान् आत्तो वाॽबे? आनिगे नाम्गे़न् पिसाङ् कुसावाःन्छिङ्माल्ले़न् मिक्सेन् के़बिबा खेःम्सिक्किन् निसुम्बे़आङ् खुने़ॽ कुसे़वा चोःक्से़ त्ये़ॽइगे़बारो॥”
3हे़रोद हाङ्ङिल्ले़ कन् पाःन्निन् खे़प्सुआङ् कुनिङ्वाॽबाल्ले़ साॽरिक् ये़ःक्खु, हे़क्केलॽरिक्के खुने़ॽनुए यरुसले़म्मोबा के़रे़क् मनाहाॽआङ् खुनिॽ निङ्वाॽबाल्ले़ साॽरिक् ये़ःक्खुसिरो॥ 4हे़रोद हाङ्ङिल्ले़ के़रे़क् तुम्निङ्वाॽफुसाम्बाहाॽ नु साम्योथिम्साम्बाहाॽ उःत्तुसिआङ् कन् निङ्वाॽफुमाङ्ङिल्ले़ सेःन्दुबा ख्रिस्त मे़प्मनाबान् आत्तो सावाःन्छिङ्मा के़बोङ्बा वाॽबे लॽरिक् सेःन्दोसुसि॥ 5खे़ङ्हाॽरे़ नोगप् मे़बिरु, “यहुदिया थुम्मोबा बेथले़हे़म्मो खुने़ॽ सावाःन्छिङ्मा के़बोङ्बा वाॽरो॥ थेआङ्भे़ल्ले़ माङ्निङ्वाॽपान् के़बाःप्पाल्ले़ अक्खेलॽरिक् साप्तुआङ् पत्—
6“‘यहुदिया थुम्मोबा बेथले़हे़म्मे,
खे़ने़ॽग यहुदियाबा पाङ्जुम्हाॽओ साॽरिक् के़ये़क्पा के़जोःक्लो,
थेआङ्भे़ल्ले़ खे़ने़ॽ के़बाङ्जुम्लाम् हाङ्युक्पाधिक् तारो,
खुने़ॽग मे़ल्लुक्कम्बा कुइसिक् पोङ्ङाङ् आमना इस्राइलिहाॽ कम्ब्राङ् के़मे़प्पा पोङ्लो॥’”#मिका ५:२
7हे़रोद हाङ्ङिल्ले़ खे़न् सिक्कुम्निबा खागे़इक्पाहाॽ स्वाःत्ताङ् उःत्तुसि हे़क्क्याङ् खे़ङ्हाॽलाम् खेःम्सिक्पान् थाःम्सिङ्बा कुजे़क् ये़म्मिन् निङ्वाॽ खोसु॥ 8हे़क्क्याङ् खे़ङ्हाॽ अक्खे मे़त्तुसिर बेथले़हे़म्मो पाङ्घुदेसुसि, “पेगे़म्मे़ॽआङ् अङे़ःक्वान् कोःत्ते़म्मे़ॽ॥ खे़न् अङे़ःक्वान् के़घोसुम्ने़ फाॽग्र फे़रे़म्मे़ॽआङ् इङ्गाॽ आमे़त्ते़म्मे़ॽओ॥ इङ्गाॽआङ् खुने़ॽ से़वा मे़त्तुङ्लो॥” 9हे़रोद हाङ्ङिल्ले़ पाःत्तुबा पाःन्निन् मे़घे़प्सुआङ् खे़ङ्हाॽ मे़धासिङ्लो॥ हे़क्क्याङ् खे़ङ्हाॽरे़ खे़न् खेःम्सिक्पान् याम्मो मे़निसु हे़क्क्याङ् खुनिॽ तगि तगि पेआङ् अङे़ःक्वा वये़बा हिम् कुदोःप्मा के़रे़आङ् फन्छिङ्लो॥ 10खे़ङ्हाॽरे़ खे़न् खेःम्सिक्पान् याम्मो मे़निसुआङ् साॽरिक् मे़सःत्ते़॥ 11हिम्सिगाङ् मे़लाःस्से़ल्ले़ अङे़ःक्वान् नु कुम्मा मरियम्मिन् मे़निसुसिरो॥ खे़ङ्हाॽरे़ साम्बोन्नाङ् अङे़ःक्वान् से़वा मे़मे़त्तु, हे़क्क्याङ् सुक्वान् मे़भाःक्खुआङ् साम्म्याङ्, थिक् परिक्पा इमे़ल्लुङ्बा साङ्सिङ् नु कुनाम् के़नुॽबा मुर्रहाॽ मे़दोन्दु मे़बिरुरो॥
12हे़क्क्याङ् से़प्माङ्मो माङ्लाइङ्बाल्ले़ खे़ङ्हाॽ हे़रोद हाङ्ङिल्लो मे़नुःक्खे़म् मे़बेगे़म्मिन्ने़ॽओ लॽरिक् साम्दिङ् पिरुसिबाल्ले़ खे़ङ्हाॽ वेॽलाम् आबाङे लाजेॽओ मे़नुःक्खे़ मे़बेरो॥
मिस्र लाजेॽओ मे़घे़त्छिङ् मे़बेःक्
13खे़न् सिक्कुम्निबा खागे़इक्पाहाॽ मे़बे हे़क्क्याङ् यहवे दाङ्बाल्ले़ कुमाङ्लाइङ्बाधिक् युसुफरे़ कुसे़प्माङ्मो थाःन्छिङ्ङाङ् अक्खे मे़त्तु, “पोगे़ॽआङ् अङे़ःक्वान् नु कुम्मान् तेॽरे़से़ॽआङ् मिस्र लाजेॽओ खे़त्छिङ् पेगे़ॽ, हे़क्क्याङ् इङ्गाॽ मे़म्मे़त्ते थारिक् खे़ने़ॽ खे़प्मोए वये़ॽओ, थेआङ्भे़ल्ले़ हे़रोद हाङ्ङिल्ले़ अङे़ःक्वान् से़प्मा फाॽआङ् कोःत्तुर वाॽरो॥” 14बा खे़न् से़न्दिक्सा युसुफरे़ अङे़ःक्वान् नु कुम्मान् तेॽरुसिआङ् मिस्रओ खे़त्छिङ् पेरो॥ 15हे़रोद हाङ्ङिन् मे़न्छिए थारिक् खुने़ॽ खे़प्मोए याःक्ते़रो॥ हे़क्केलॽरिक् यहवे दाङ्बाल्ले़ माङ्निङ्वाॽपान् के़बाःप्पालाम् इङ्गाॽ आस्सान् मिस्रलाम् लाःक्कात् उःत्तुङ्लो लॽरिक् उन्छेःन् पाःत्तुबान् के़रे़रो॥#होसे ११:१
16आल्ल हे़रोद हाङ्ङिल्ले़ सिक्कुम्निबा खागे़इक्पाहाॽरे़ हे़क्केलॽरिक् खुने़ॽ इङ्मे़ले़क्तुआङ् वेॽ लाम् मे़बेबा निङ्वाॽ खोसुआङ् साॽरिक् कुसिक् पोगे़रो॥ खे़ल्ले़चोगुल्ले़ थक्सुबाहाॽ पाङ्घुसिआङ् बेथले़हे़म नु खे़न् खिरिबा तङ्बे ने़त्छिआङ् योबा ये़म्बित्छाॽ अङे़ःक्वा साहाॽ के़रे़क् से़प्पाङ्घुसिरो॥ थेआङ्भे़ल्ले़ खे़न् सिक्कुम्निबा खागे़इक्पाहाॽलाम् खेःम्सिक्पान् तङ्बे ने़त्छिआङ्धो तगि थाःम्सिङ्बा निङ्वाॽ खोसुआङ् वये़रो॥ 17खे़ङ्ग यर्मिया माङ्निङ्वाॽपान् के़बाःप्पाल्ले़ अक्खेलॽरिक् उन्छेःन् पाःत्तुबा माङ्निङ्वाॽपान्निन् के़रे़बारो—
18“के़हाःप्मा के़भिःक्मा नु मे़रिङ् के़धक्मा यम्बा इक्लान् रामा पाङ्जुम्मो खे़म्दे़त्लो,
राहेलरे़ कुस्साहाॽ हाःप्तुसिॽरो॥ खे़ङ्ग हाङ्हाङ् मे़त्छिङ्मा मे़दे़न्ने़न्लो,
थेआङ्भे़ल्ले़ कुस्साहाॽ के़रे़क् मे़स्ये़रो॥”#यर्मि ३१:१५
नासरतओ नुःङ्सि थाङ्सिॽ
19आल्ल हे़रोद हाङ्ङिन् स्ये़आङ् मिस्र लाजेॽओ युसुफे़न्नु यहवे दाङ्बाल्ले़ कुमाङ्लाइङ्बान् कुसे़प्माङ्मो थाःन्छिङ्ङाङ् 20मे़त्तु, “पोगे़ॽआङ् अङे़ःक्वान् नु कुम्मान् इस्राइल लाजेॽओ तेॽरे़से़ॽओ, थेआङ्भे़ल्ले़ अङे़ःक्वान् से़प्मा के़गोःप्पे़न् स्ये़आङ् होप्लो॥” 21खे़ल्ले़चोगुल्ले़ युसुफरे़ अङे़ःक्वान् नु कुम्मान् इस्राइल लाजेॽओ तेॽरुसि॥ 22कर हे़रोद हाङ्ङिन् स्ये़आङ् खुने़ॽ कुले़क्वा कुस्सा अर्खिलाउसरे़ यहुदिया थुम्मो हाङ् चोगुर वाॽ के़लॽबान् युसुफरे़ निङ्वाॽ खोसुआङ् खुने़ॽ खे़प्मो पेःक्मा किसे़॥ हे़क्क्याङ् माङ्लाइङ्बाल्ले़ याम्मो से़प्माङ्मो साम्दिङ् पिरुबाल्ले़ चोगुल्ले़ खुने़ॽ गालिल थुम्मो पेआङ् 23नासरत पाङ्जुम्मो वाॽमा हेःक्ते़रो॥ कङ्ग माङ्निङ्वाॽपान् के़बाःप्पाहाॽरे़ “निङ्वाॽफुमाङ्ङिल्ले़ थुक्तुबाङ्ग नासरि मे़मे़त्तु”#यसै ११:१ लॽरिक् मे़बाःत्तुबा पाःन्निन् के़रे़बारो॥
Actualmente seleccionado:
मत्ति 2: LIF
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
© 2009, 2023, Wycliffe Bible Translators, Inc. All rights reserved.