भजनमैं 68
68
परमेश्वरजी खीए शत्तुरमैं सग्याँ-प्हुँग्याँ लवाब्मुँ
क्वे प्रिंब्मैंए चिबए ल्हागिर दाऊदए भजन घ्रि, क्वे घ्रि।
1परमेश्वर रेब्मुँ, खीए शत्तुरमैं सग्याँ प्हुँग्याँ लवाब्मुँ,
धै खीलाइ आखोब्मैं खीउँइँले न्हेयाब्मुँ!
2खैले खैंइ मिगु बोमु, छलेन क्हिइ चमैंलाइ बोब्मुँ;
मिए ङाँर क्योलों युलियाब् धोंले
परमेश्वरए उँइँर आछ्याँबै के लब्मैं नास तयाब्मुँ!
3दिलेया ठिक के लब्मैं बिस्याँ सैं तोंरिब्मुँ;
चमैं परमेश्वरए उँइँर सैं तोंरिगे;
चमैं सैं तोंबै कै तेरिगे!
4परमेश्वरए मिंर क्वे प्रिंन्, खीए मिं थेब् लबै क्वे प्रिंन्;
न्हाँम्स्योमैंए फिर क्रेसि स्युरबै परमेश्वरलाइ थेब् लद्;
खीए मिं याहवेह ग;
खीए उँइँर सैं तोंन्!
5ह्रोंसए पबित्र क्ल्ह्योर टिबै परमेश्वर
आबा आरेब्मैंए आबा ग,
धै खीजी म्हरेस्योमैंलाइ रक्षा लमिंम्।
6खाबै आरेबै म्हिमैंलाइ खीजी परवा पिंम्;
झेलर मुँब्मैंलाइ तेसि सैं तोंल् पिंम्;
दिलेया परमेश्वरजी बिब् आङिंब्मैं बिस्याँ त्हिंयाँइ ख्रोंबै क्ल्ह्योर टिम्।
7ओ परमेश्वर, क्हिजी ह्रोंसए म्हिमैं खैले डोरेमिंजी,
छलेन क्हि तोइ आरेबै क्ल्ह्योउँइँले तसि ओंसों ह्याइ। तिस्याँदे मैंन्
8च त्हेर सिनै बिबै कोंर युबै परमेश्वरए उँइँर,
इस्राएलए परमेश्वरए उँइँर,
पृथ्बी त्हारइ, मुउँइँले नाँ युइ। #प्रस १९:१८
9ओ परमेश्वर, क्हिजी नाँ कुलसि
कारबै क्ल्ह्यो क्योसि छ्याँब् लमिंइमुँ।
10क्हिए म्हिमैं च क्ल्ह्योर टिइमुँ,
धै खीजी ङ्हाँदुमैंलाइ छ्याँबै सैमैं पिंसि सैं तोंल् पिंइ।
11ल्हडें लबर ह्याद् बिसि याहवेहजी ताँ लइ।
धै “म्रुँमैं नेरो चमैंए सिपाइमैं युनन् न्हेयाइ!”
बिसि ल्हें च्हमिरिमैंइ ताँ लइ।
12धिंर पखबै सैमैं च्हमिरिमैंइ चुम्।
13चमैंइ पखबै सैमैं न्होंर कोइ चाँदिइ म्होरबै तोंगुए प्ह्यागोंमैं
नेरो छ्याँबै माराइ म्होरबै चए प्ह्यागोंमैं मुँल।
(दिलेया क्हेमैं को-कोइ मुँयुँमैं ल्हडें लबै त्हेर तले क्यु प्ह्रोंर टिरिल?)#68:13 हिब्रू क्युइरि चु पद स्पस्ट आरे।
14तोनदोंरि लल् खाँबै परमेश्वरजी म्रुँमैंलाइ ह्युलर खन्तोदोंन् प्हुँवामा
साल्मोन बिबै कोंर क्लि झोंब् धों तल।
15बाशान बिबै कों बेल्ले छ्याँब् मुँ;
च कोंर क्लिं क्हाँ मुँबै च्होमैं ल्हें मुँ!
16ओ ल्हें च्होमैं मुँबै कों, परमेश्वरजी ग्याल्स लल् म्हैबै सियोन बिबै कोंउँइँ
तले आछ्याँबै सैंले ङ्ह्योल?
चर याहवेह खोंयोंन् बिलै टिब्मुँ।
17परमेश्वरए रथमैं लाख लाख
करोड करोड मुँ!
सिनै कोंउँइले प्रभु ह्रोंसए पबित्र क्ल्ह्योर युइमुँ।#व्य 33:2
18क्हि नुबर क्रे ह्यामा
क्हाइ बोब्मैंलाइ क्हिए लिलि बोइ,
क्हिजी म्हिमैंउँइँले क्होल्सै किंइ,
ओं, क्हिजी बिब् आङिंब्मैंउँइँले या किंइ।
छलेन याहवेह पारमेश्वर चर टिम्।#एफि ४:८
19प्रभुए मिं थेब् तरिगे!
ङ्योलाइ जगेमिंबै परमेश्वर खीन् ग,
त्हिंइ ह्रोंसे ङ्योए दुःख खीजी नोमिंम्। तिस्याँदे मैंन्
20ङ्योए परमेश्वर जोगेमिंबै परमेश्वर ग।
याहवेह ङ्योए प्रभु ग,
खीजीन् ङ्योलाइ सिबउँइले सोगों लमिंम्।
21क्ह्रोंसेंन ह्रोंसए शत्तुरमैंए क्र परमेश्वरजी तिवाब्मुँ,
पापर प्ररिब्मैंए क्र कोच्याब्मुँ।
22“क्हेमैंइ ह्रोंसए प्हले ङए शत्तुरमैंए कोर प्ल्हुँरिगे,
धै क्हेमैंए नगिमैंए लेइ चमैंए को ल्हेंल् योंरिगे बिसि
23ङजी च शत्तुरमैं बाशान बिबै क्ल्ह्योउँइँले एपखब्मुँ;
ङजी चमैं मा ङ्युँइए न्होंउँइँले पखब्मुँ,” बिसि याहवेहजी बिल।
24ओ परमेश्वर, क्हिजी ट्होसि खब ताँनइ म्रोंइमुँ!
ङए परमेश्वर ङए म्रुँ ग! क्हिजी ट्होसि पबित्र क्ल्ह्योर युइ।
25ओंसों ओंसों क्वे प्रिंब्मैं मुँ, चमैंए लिलि बाज ह्राब्मैं,
चमैंए म्हाँजोर खैजरि ह्राबै छमिमैं मुँ।
26“ल्हें म्हि च्होंबै क्ल्ह्योर परमेश्वरए मिं थेब लद्;
इस्राएली म्हिमैंए म्हाँजोर याहवेहए मिं थेब लद्,” बिसि चमैंइ बिइमुँ।
27चमैंए लिउँइँ ताँन् भन्दा च्योंबै बेन्यामीनए कुलइ अरूमैं डोरेइमुँ,
चए लिउँइँ यहूदए कुलए चिब्मैं खइमुँ,
धै जबूलून नेरो नप्तालीमैंए कुलमैं या खइमुँ।
28ओ परमेश्वर, ह्रोंसए शक्ति उँइँन्,
धै ओंसों ङिए ल्हागिर लब् धोंले ह्रोंसए शक्ति उँइँमिंन्।
29यरूशलेमर क्हिए मन्दिरर
ह्रेंगोउँइँले खबै म्रुँमैंइ क्हिए ङाँर बालि फोखब्मुँ।#मत्ती २:१-१२
30काँसए घारिर टिबै च खेदो धों तबै मिश्र ह्युललाइ हौदिद्,
मे प्हसेमैंए म्हाँजोर साँडेइ थाब् धों तबै च ह्रेंलाइ हौदिद्!
चाँदिए भेटि पखसि चमैंइ क्हिलाइ कुरसि फ्योबर ल्हैदिद्।
ल्हडें लदा ङ्हाँब्मैं खन्तोदोंन् प्हुँवाँन्।#68:30 हिब्रू क्युइरि चु पद स्पस्ट आरे, छेनाले क्होल् आखाँ।
31मिश्र ह्युलउँइँले थेबै म्हिमैं खब्मुँ,
कूश ह्युलर्बै म्हिमैं ह्रोंसए योमैं क्वेसि परमेश्वरने प्राथना लब्मुँ।
32ओ पृथ्बीर्बै म्हिमैं, परमेश्वरए मिंर क्वे प्रिंन्;
खीए मिं थेब् लदै क्वे प्रिंन्। तिस्याँदे मैंन्
33खी स्योंम् ओंनोंन् स्वर्गर स्युरम्;
मु ङ्हेब् धोंले खी ह्रोंसए कै तेम्।
34परमेश्वरए शक्तिए बारेर बिप्रद्!
खीजी इस्राएलए फिर ग्याल्स लमुँ,
खीए शक्ति ताँन् म्हिमैंइ मुर म्रोंमुँ।
35ओ परमेश्वर, क्हि पबित्र क्ल्ह्योउँइँले युमा क्हि म्रोंसि ताँन् म्हिमैं ङ्हिंम्;
इस्राएलए परमेश्वरजी ह्रोंसए म्हिमैंलाइ शक्ति नेरो भों पिंम्।
परमेश्वरए मिं थेब् तरिगे!
Actualmente seleccionado:
भजनमैं 68: GCMB
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
© 2020, Wycliffe Bible Translators, Inc. All rights reserved.
