भजनमैं 51
51
ओ परमेश्वर, ङए खों छ्याँब लमिंन्
दाऊदइ बेथसेबा न्होंवाबै लिउँइँ नाथन बिबै अगमबक्ता दाऊदए ङाँर ह्याइ।#२ शमू १२:१-१५ च त्हेर दाऊदइ क्वे प्रिंब्मैंए चिबए ल्हागिर भजन घ्रि प्ह्रिइ।
1ओ परमेश्वर, क्हिए खोंयोंइ आनुबै म्हाँयाइ
ङए फिर ल्हयो खमिंन्।
क्हिजी लबै थेबै म्हाँयाउँइँले
ङए पापमैं त्होमिंन्।
2ङइ लबै ताँन् आछ्याँबै केमैंउँइँले ङ फ्रेमिंन्,
धै ङए पाप त्होमिंसि ङ चोखो लमिंन्!
3तलेबिस्याँ ङइ लबै आछ्याँबै केमैं ङइ सेइमुँ,
ङइ लबै पाप खोंयोंइन ङइ मैंरिम्।#51:3 ङइ मैंरिम् हिब्रू, ङए ओंसों मुँ
4क्हिए बिरोधर्न ङइ पाप केमैं लइमुँ,
धै क्हिजी आखोबै केमैंन् ङइ लइमुँ,
छतसि क्हिजी ङने बिबै ताँ क्ह्रोंसेंन् ग,
धै क्हिजी लबै निसाफ ताँनए उँइँर ठिक मुँ।#रोम ३:४
5क्ह्रोंसेंन फिबै त्हे ओंनोंन् ङ पापि मुँल,
ङए आमाए फो न्होंर मुँब् ओंनोंन् ङ पापि मुँल।
6क्ह्रोंसेंन क्हिजी ङए खों छ्याँब् तरिगे ङ्हाँम्,
छतसि क्हिजी ङए सैंर ज्ञान-बुद्धिए ताँमैं झोंमिंम्।
7लुँडइ#51:7 लुँडइ हिब्रू क्युइर, हिसप बिबै छि भाँड् म्याबै सै ग ङए सैं म्यामिंन् धै ङए सैं छ्याँब तब्मुँ;
छले ख्रुमिंमा ङ चोखो तसि क्लिं भन्दा तार्ग्या तब्मुँ।
8ङलाइ सैं तोंबै ताँ नेरो आनन्द तबै ताँमैं थेल् पिंन्;
क्हिजी त्हुल भुँ लवाबै ङए ह्रिबमैं सरिगे धै ङ सैं तोंल् योंरिगे।
9ङइ लबै पाप केमैं क्हिजी आङ्ह्योद्,
धै ङइ लबै आछ्याँबै केमैं मेटिमिंन्।
10ओ परमेश्वर, ङए खों छ्याँब लमिंन्,
धै ङलाइ ठिक सैं पिंन्।
11क्हि ङाँइँले ङ आस्योमिंन्,
धै ङ ङाँइँले क्हिए पबित्र प्ल्ह आबोमिंन्।
12क्हिजी पिंबै मुक्तिउँइँले धबै ङ सैं तोंन् लमिंन्,
धै आछ्याँबै केमैं या लदा आङ्हाँबै सैं पिंन्।
13क्हिजी छ लमिंस्याँ आछ्याँबै के लब्मैंलाइ ङइ क्हिए क्ह्रोंसेंन्बै ताँमैं लोमिंब्मुँ,
धै आछ्याँबै के लब्मैं क्हि ङाँइ एब्मुँ।
14ओ परमेश्वर, ङलाइ जोगेमिंबै परमेश्वर, ङइ म्हि सैवाइ, च पापउँइँले ङ क्षमा पिंन्,
ङए पाप क्षमा लमिंबइले क्हिए मिं क्वेदै ङ क्वे प्रिब्मुँ।
15ओ याहवेह, ङलाइ पोंल् ह्रब् लमिंन्,
धै ङइ क्हिए मिंन् थेब् लब्मुँ।
16क्हि ख्रोर सैं तोंस्याँ क्हिए मिंर ङइ ख्रो पिंमल,
दिलेया मिर ख्रोंसि पिंबै ख्रोमैंरै या क्हि सैं आतों।
17ङ पापि ग बिसि मैंबै सैंन् परमेश्वरजी खोबै ख्रो ग;
ओ परमेश्वर, ङइ आछ्याँबै के लना बिसि न्हुँ लबै म्हिलाइ क्हिजी म्हाँया लम्।
18क्हिए सैंर मैंब् धोंलेन् सियोनए फिर ल्हयो खमिंन्;
यरूशलेमर्बै फुयाबै गारामैं धबै रुइमिंन्;
19धै क्हिए सैं तोंल् लबर म्हिमैंइ ठिक ख्रोमैं पिंखब्मुँ,
मिर ख्रोंसि पिंबै ख्रोमैं नेरो अरू पिंल् त्हुबै ख्रोमैं म्हिमैंइ पिंब्मुँ,
छले साँडेमैं क्हिए मिंर ख्रो पिंबै क्ल्ह्योर पखब्मुँ।
Actualmente seleccionado:
भजनमैं 51: GCMB
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
© 2020, Wycliffe Bible Translators, Inc. All rights reserved.
