भजनमैं 50
50
परमेश्वरजी ठिक निसाफ लम्।
आसापए भजन घ्रि।
1ताँन् भन्दा थेब शक्ति मुँबै याहवेह परमेश्वर पोंम्,
त्हिंयाँ प्योबै क्ल्ह्योउँइँले त्हिंयाँ लिबै क्ल्ह्यो समा
ह्युलर्बै ताँन् म्हिमैंलाइ खीजी हुइम्।
2बेल्ले छ्याँबै सियोनउँइँले
बेल्ले म्हारल्ले परमेश्वर चारइमुँ।
3ङ्योए परमेश्वर युसिन् मुँ, युसि खी च्याँले टिरिब् आरे;
खीए ओंसों लुँबै मि मुँ,
खीए कारर्ग्युले नाँ-खैंमैं मुँ।
4ह्रोंसए म्हिमैंए निसाफ लबर
खीजी मु नेरो पृथ्बीलाइ हुइब्मुँ:
5“ख्रो पिंसि ङने बाछा फैब नेरो
ङलाइ क्वेंबै म्हिमैं ङ ङाँर पखो।”
6“खीजी ठिक के लम्,” बिसि मुइ बिमुँ,
“तलेबिस्याँ ठिक निसाफ लबै परमेश्वर क्हिन् ग। तिस्याँदे मैंन्
7“ओ ङए म्हिमैं, ङ पोंमुँ, ङए ताँ थेद्!” बिसि परमेश्वरजी बिम्।
“ओ इस्राएल, ङ परमेश्वर ग, ङ क्हिए परमेश्वर ग।
ङ क्हिए बिरोधर पोंब्मुँ:
8दिलेया क्हिइ पिंबै ख्रोमैंए ल्हागिर ङइ क्हिलाइ दोष आपिं,
ङए मिंर मिर ख्रोंसि पिंबै ख्रोमैं क्हिइ खोंयोंन् बिलै पखब ङइ म्रोंइमुँ।
9दिलेया क्हिए धिंर्बै साँड्मैं
नेरो क्हिए प्ह्रोंर्बै र बुग्यामैं ङलाइ आचैदि।
10तलेबिस्याँ क्ह्योंर्बै ताँन् खेदोमैं
नेरो ताँन् कोंजरेबै खेदोमैं ङलन् ग।
11कोंजरेबै ताँन् नमेमैं
नेरो सर मुँबै सो प्ह्याबै सैमैं या ङइ ताँन् ङो सेम्।
12ङ फोतेन् तलेना क्हिने ह्रिल् आत्हु,
तलेबिस्याँ पृथ्बी नेरो चर मुँबै तोन्दोंरि सैमैं ङलन् ग।
13साँड्मैंए से ङइ चम्मा?
धै रए को थुँम्मा?
14बरु ङलाइ धन्यबाद पिंसि ङए मिं क्वेद्! चुन् पिंल् त्हुबै ख्रो ग।
धै ताँन् भन्दा थेबै परमेश्वए मिंर लबै भकल पूरा लद्।
15धै दुःख तबै त्हेर ङने ग्वार ह्रिद्;
ङइ क्हि दुःखउँइँले फ्रेमिंब्मुँ,
झाइले क्हिइ ङए मिं थेब् लब्मुँ।”
16दिलेया दुष्टमैंने बिस्याँ परमेश्वरजी बिमुँ,
“ङए ठिम खेब
नेरो ङइ फैबै बाछाए ताँमैं बारेर पोंब क्हेमैंल तोए हग मुँ?
17ङइ लोमिंबै ताँमैं क्हिइ आखो,
धै ङइ ल्हैदिबै केमैं क्हिइ आल।
18ह्यो त्होमा क्हि चनेन् त्हुँयाम्,
धै ब्यभिचार लबै म्हिमैं त्होमा क्हि चमैंनेन् क्ह्रियाम्।
19“क्हिए सुँइ आछ्याँबै ताँमैं पोंमुँ,
धै क्हिए लेइ फिब्लो पार्दिब ताँमैं लम्।
20क्हि खोंयोंन् बिलै ह्रोंसए अलिए बिरोधर पोंम्;
धै ह्रोंसए अलिलाइन क्हिइ स्यारम्।
21क्हिइ चु ताँन् आछ्याँबै केमैं लइमुँ दिलेया ङ तोइ आपोंन्ले टिइ;
छतसि ङै या क्हि धोंन् तब्मुँ बिब क्हिए सैंर ङ्हाँमै।
छ आङिं! ङइ क्हि हौदिब्मुँ
धै क्हिइ खैबै केमैं लइमुँ बिब क्हिए ओंसोंन् ताँन् उँइँमिंब्मुँ।
22“ओ परमेश्वरलाइ आमैंब्मैं, छेनाले मैंन्।
आमैंस्याँ ङइ क्हि कुदु-कुदु लवाब्मुँ,
क्हिलाइ फ्रेमिंब खाबै तरिब् आरे!
23धन्यबादए ख्रो पिंबै म्हिइन ङए मिं थेब् लब्मुँ।
धै ठिक घ्याँर प्रब्मैंलाइन ङइ जोगेमिंब्मुँ,”
बिसि फरमेश्वरजी बिइमुँ।
Actualmente seleccionado:
भजनमैं 50: GCMB
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
© 2020, Wycliffe Bible Translators, Inc. All rights reserved.
