Mateo 13

Ang Palaanggiran nahanungod sa Manugsab-og

(Mar. 4:1-9; Luc. 8:4-8)

1Sa amo man nga adlaw naggwa si Jesus sa balay kag nagkadto sa higad sang linaw, sa diin nagpungko sia sa pagpanudlo. 2Tungod#Luc. 5:1-3. kay gintipunan sia sang madamo nga tawo, nagsakay sia sa sakayan kag nagpungko didto, samtang ang mga tawo nagtilindog sa higad sang linaw. 3Madamo nga mga butang ang gintudlo ni Jesus sa ila paagi sa mga palaanggiran nga subong sini:

“May isa ka tawo nga naglakat sa pagsab-og. 4Sang pagsab-og niya sang binhi, ang iban nagtupa sa dalan, kag ang mga pispis nagdapo kag nagtuka sini. 5Ang iban nagtupa sa batuhon nga mga lugar, sa diin hapaw lamang ang duta. Sa wala lang madugay nagtubo ang binhi tungod kay manabaw ang duta. 6Sang udtong adlaw na, nalayong ang bag-ong tubo nga mga tanom kag tungod kay indi gid madalom ang mga gamot sini, ang mga tanom madali nga nalaya. 7Ang iban nga binhi nagtupa sa duta nga may mga talungon nga nagtubo kag naglumos sang mga tanom. 8Pero ang iban nga binhi nagtupa sa maayo nga duta kag ang mga tanom namunga: ang iban sini nagpatubas sang 100 ka pilo, ang iban sini sesenta kag ang iban sini traynta.”

9Kag si Jesus nagsiling, “Gani, magpamati kamo kon may mga dulonggan kamo!”

Ang Katuyoan sang mga Palaanggiran

(Mar. 4:10-12; Luc. 8:9-10)

10Dayon ang mga gintuton-an nagpalapit kay Jesus kag nagpamangkot sa iya, “Ngaa nagahambal ka sa mga tawo paagi sa mga palaanggiran?”

11Si Jesus nagsabat, “Ang paghibalo sang mga tinago sang Ginharian sang langit ginhatag sa inyo kag indi sa ila. 12Kay#Mat. 25:29; Mar. 4:25; Luc. 8:18; 19:26. ang tawo nga may paghangop pagahatagan pa gid, agod nga magsulobra ang iya nahibaluan, pero ang tawo nga wala sing paghangop bisan ang diutay nga iya nahibaluan pagakuhaon pa. 13Naghambal ako sa ila paagi sa mga palaanggiran, tungod kay nagatulok sila pero indi makakita, kag nagapamati sila pero indi makabati ukon makahangop. 14Gani#Isa. 6:9-10 (LXX). natuman sa ila ining tagna ni Isaias nga nagasiling:

‘Ini nga mga tawo magapamati lang nga pamati, pero indi makahangop,

magatulok lang sila nga tulok, pero indi makakita.

15Tungod kay ini nga mga tawo matig-a sing mga ulo,

gintakpan nila ang ila mga dulonggan,

kag ginpiyong nila ang ila mga mata.

Kay kon indi nila paghimuon ini,

basi makakita ang ila mga mata,

makabati ang ila mga dulonggan,

makahangop ang ila mga panghunahuna,

kag magaliso sila sa akon,

kag ako magaayo sa ila.’

16“Kamo#Luc. 10:23-24. inyo malipayon gid! Kay ang inyo mga mata makakita kag ang inyo mga dulonggan makabati. 17Dumdoma ninyo ini! Madamo nga mga propeta kag mga tawo sang Dios ang naghandom gid sa pagtan-aw sang inyo nakita, pero wala sila makakita, kag luyag magpamati sa inyo ginapamatian pero wala sila iya makabati.

Ginsaysay ni Jesus ang Palaanggiran nahanungod sa Manugsab-og

(Mar. 4:13-20; Luc. 8:11-15)

18Gani, pamatii ninyo kag tun-i kon ano ang kahulogan sang palaanggiran nahanungod sang manugsab-og. 19Ang mga nagapamati sang mensahe nahanungod sang Ginharian pero wala makahangop sini, kaangay sila sang binhi nga nagtupa sa alagyan. Nagaabot ang Yawa kag nagaagaw sang ginsab-og sa ila mga tagipusoon. 20Ang binhi nga nagtupa sa batuhon nga duta amo ang mga nagapamati sang pulong kag sa gilayon nagabaton sini sing malipayon. 21Pero wala ini nagatudok kag nagadugay sa ila. Gani kon mag-abot ang pag-antos ukon paghingabot tungod sang mensahe nagabiya sila sa gilayon. 22Ang binhi nga nagtupa sa duta nga may mga talungon amo ang mga nagapamati sang mensahe, pero ang mga palaligban sang pangabuhi, kag ang paghigugma sang manggad nagalumos sang mensahe, kag wala ini nagapamunga. 23Ang binhi nga ginsab-og sa maayo nga duta amo ang mga nagapamati sang mensahe kag nagahangop sini. Nagapamunga sila kag nagapatubas ang iban sa ila sing 100 ka pilo, ang iban sesenta ka pilo, kag ang iban traynta ka pilo.”

Ang Palaanggiran Nahanungod sa mga Bugang

24Si Jesus nagsugid sa ila sing isa naman ka palaanggiran, “Ang Ginharian sang langit kaangay sang isa ka tawo nga nagsab-og sang maayo nga binhi sa iya uma. 25Isa ka gab-i, sang nagakatulog ang mga tawo, nag-abot ang iya kaaway kag nagsab-og man sang mga bugang nga nag-impon sa mga trigo, kag naglakat. 26Sang nagtubo ang mga tanom kag nagpamunga sang trigo, ang mga bugang nagtubo man. 27Ang mga suloguon sang tawo nagkadto sa iya kag nagsiling, ‘Sir, maayo nga binhi ang imo ginsab-og sa imo nga uma, pero diin bala maghalin ining mga bugang?’ 28Nagsabat sia, ‘Ginhimo ini sang kaaway.’ Nagpamangkot sila, ‘Luyag mo bala nga maglakat kami agod panggabuton ang mga bugang?’ 29Nagsabat sia, ‘Indi lang, tungod kay sa inyo pagtipon sang mga bugang, basi may magabot kamo nga mga trigo kaupod sa ila. 30Pabay-i lang ninyo anay nga magpamuhi ang mga bugang kag ang mga trigo tubtob sa tig-alani, kay kon tig-alani na singganon ko ang mga mangangani: ‘Gabuta anay ninyo ang mga bugang, bugkosa ini kag idap-ong sa kalayo. Dayon tipuna ninyo ang trigo kag isulod sa akon bodega.’”

Ang Palaanggiran Nahanungod sa Binhi sang Mustasa

(Mar. 4:30-32; Luc. 13:18-19)

31Si Jesus nagsugid sa ila sing isa naman ka palaanggiran, “Ang Ginharian sang langit kaangay sang binhi sang mustasa, nga ginkuha sang isa ka tawo kag ginpanggas sa iya uma. 32Ini ang labing diutay sa tanan nga binhi, pero kon magtubo ini magataas sia sa tanan nga kahuykahoy kag mangindaku nga kahoy, sa bagay nga ang mga pispis magadapo kag magapugad sa mga sanga sini.”

Ang Palaanggiran Nahanungod sa Lebadora

(Luc. 13:20-21)

33Si Jesus nagsugid sa ila sing isa pa gid ka palaanggiran, “Ang Ginharian sang langit kaangay sang lebadora. Ginakuha ini sang isa ka babayi kag ginalamas sa tatlo ka sukob nga harina, tubtob nga maghabok ang bug-os nga linamas.”

Ang Paggamit ni Jesus sang mga Palaanggiran

(Mar. 4:33-34)

34Si Jesus naggamit sang mga palaanggiran sa pagtudlo sini nga mga butang sa mga tawo. Wala sia sing may ginhambal sa ila nga indi paagi sa palaanggiran. 35Ginhimo#Sal. 78:2. niya ini agod matuman ang ginsiling sang propeta:

“Magahambal ako sa ila paagi sa mga palaanggiran,

magasugid ako sa ila sang mga butang nga wala pa mahibal-i, halin sa pagtuga sang kalibutan.”

Ginsaysay ni Jesus ang Palaanggiran Nahanungod sa mga Bugang

36Dayon ginbayaan ni Jesus ang mga tawo kag nagsulod sia sa balay. Ang iya mga gintuton-an nagpalapit sa iya kag nagsiling, “Sugiri kami kon ano ang kahulogan sang palaanggiran nahanungod sang mga bugang sa talamnan.”

37Si Jesus nagsabat, “Ang tawo nga nagsab-og sang maayo nga binhi amo ang Anak sang Tawo. 38Ang uma amo ang kalibutan kag ang maayo nga binhi amo ang mga anak sang Ginharian, ang mga bugang amo ang mga anak sang Yawa, 39kag ang kaaway nga nagsab-og sang mga bugang amo si Satanas; ang tig-alani amo ang katapusan sang panag-on kag ang mga mangangani amo ang mga anghel. 40Subong nga ang mga bugang tipunon kag sunogon sa kalayo, amo man ang mahanabo sa katapusan sang panag-on. 41Ang Anak sang Tawo magapadala sang iya mga anghel kag ila pagatipunon kag pagapagwaon sa iya Ginharian ang tanan nga nanginkabangdanan sang pagpakasala sang mga tawo kag ang tanan nga nagahimo sing malaut nga mga butang. 42Kag sila ihaboy sang mga anghel sa nagadabadaba nga kalayo, sa diin magahibi sila kag magabagrot sang ila mga ngipon. 43Dayon ang mga matarong magasilak subong sang adlaw sa Ginharian sang ila Amay. Gani, magpamati kamo kon may mga dulonggan kamo!

Ang Palaanggiran Nahanungod sa Nalubong nga Manggad

44“Ang Ginharian sang langit kaangay sang manggad nga ginlubong sa uma. Nasapwan ini sang isa ka tawo kag iya liwat gintampukan. Sa daku nga kalipay naglakat sia kag ginbaligya niya ang tanan niya nga mga pagkabutang, kag nagbalik sa pagbakal sadto nga uma.

Ang Palaanggiran Nahanungod sa Perlas

45“Subong man, ang Ginharian sang langit kaangay sang isa ka negosyante nga nagpangita sang malahalon nga mga perlas. 46Sang pagkakita niya sang isa ka perlas nga malahalon, naglakat sia kag ginbaligya niya ang tanan niya nga mga pagkabutang kag ginbakal ang amo nga perlas.

Ang Palaanggiran Nahanungod sa Pukot

47“Subong man, ang Ginharian sang langit kaangay sang isa ka pukot nga ginladlad sa dagat sang mga mangingisda kag nagkuha sang sarisari nga mga isda. 48Sang puno na ang pukot ginbutong ini sang mga mangingisda pa higad kag nagpungko sila sa pagpain sang mga isda: ang mga maayo ginsulod sa alat, kag ginpamilak ang mga malain. 49Manginsubong man sini sa katapusan sang panag-on: ang mga anghel sang Dios magaabot kag magapain sang malaut nga mga tawo sa mga matarong, 50kag ang mga malaut ila itagbong sa kalayo nga nagadabadaba. Didto magahinibi sila kag magabagrot sang ila mga ngipon.”

Ang Bag-o kag Daan nga mga Kamatuoran

51Si Jesus nagpamangkot sa ila, “Nahangpan bala ninyo ini tanan nga mga butang?”

Nagsabat sila, “Huo.”

52Gani si Jesus nagsiling, “Ini nagakahulogan nga ang tagsa ka manunodlo sang Kasugoan nga mangingintuton-an sang Ginharian sang langit, kaangay sang tag-iya sang balay nga nagakuha sang bag-o kag daan nga mga butang sa iya talaguan.”

Si Jesus Ginsikway sa Nazaret

(Mar. 6:1-6; Luc. 4:16-30)

53Sa tapos si Jesus makapanudlo sini nga mga palaanggiran, naghalin sia sa sadto nga lugar 54kag nagpauli sa iya ginaestaran nga banwa. Nagpanudlo sia sa ila sinagoga, kag ang mga nakabati sa iya natingala. Nagpamangkot sila, “Diin bala sia nagkuha sini nga kaalam kag paano bala sia makahimo sini nga mga milagro? 55Indi bala sia ang anak sang panday? Indi bala nga si Maria ang iya iloy, kag ang iya mga utod amo sanday Santiago, Jose, Simon kag Judas? 56Indi bala nga ang tanan niya nga mga utod nga babayi nagaestar diri? Diin bala niya ginkuha ini tanan?” 57Gani#Juan 4:44. indi sila magpati sa iya.

Si Jesus nagsiling sa ila, “Ang propeta ginatahod bisan diin, luas lamang sa iya ginaestaran nga banwa kag sa iya panimalay.” 58Wala sia maghimo didto sing madamo nga mga milagro tungod sang ila pagkadi-matinuohon.

Actualmente seleccionado:

Mateo 13: MBBHIL12

Destacar

Copiar

Comparar