Bikambwa Biniki Bikima 27
27
1Ko enek’iy’osangyak’oka tongocoa Italia, baolekya Paulo la basungu bamoi eneyali capitaine ena soldats onotangama Yulio, on’oloi bona Kaisala. 2Ko toyookela en’asua bana Adulamutiona banasokosemwa lacin’eho bacu en’enyanga bena ndelo ina Asia, ko tosemwa. Alisitaluko bise Tesalonike ena Makedonia ayaaki l’iso. 3Ko en’ina bona loi tosema ena Sidona; ko Yulio aotuma Paulo isei, amofa etelo lacin’eho acu eneka bifili binande, ko bamokikya. 4Koko lakina tosemwa, tocoa mbolimboli la Kupulio, lacin’oka lofongo lotofekya. 5Ko enek’is’oetaka lose loneloyali mbolimboli la Kilikia la Pampulia, tosema ena Mula, bonyang’omoi bona Lukia. 6Ko capitaine ena soldats aosungya meho basua bana Alesandulia banacoa Italia; ko aototadya en’asua’aho. 7Ko enek’is’ocoaka bekolo bike nko bokokya mene, ko ten’ino mene ena njela ena mbolimboli la Kinido, lacin’oka lofongo lona locili lotatof’iso mboka, tecoa mbolimboli la Kulete, nko ndendana la Salami; 8ten’ino mene ena njeta mbolimboli l’okili, yengoko toyela edye emoi enetangama Bisemelo bin’olotsi; ko bonyanga bona Lasea boyaaki mbolimboli l’eho.
9Ko enek’is’oenak’oka tomokinda ena bokita, ko lokendo lomoyalama losomo, lacin’oka esike ena nkila ena toma emeta, Paulo amalaka, ate, 10Bifili, emi len’oka bokit’one bongoyalama bokita bona bino mene ko la mbeha bike, ef’ena toma la basua kei, nde ena liiko lonisoamene nkoho. 11Ohonde capitaine ena soldats aolofa baoyi bana capitaine en’asua l’ana bomene basua, ko atalofa baoyi banaki Paulo otendaka. 12Ko enetaonga esemelo eho lacina bayale meho en’esike ena lifia, bato banaleki bike bail’oka basemodya basua, ko baokanela yombo bangoyela Poinike, ko bayalame meho en’esike ena lifia en’esemelo emoi ena Kulete enalenda Nord-Est la Sud-Est. 13Ko eneki ifofongo ina Sud oyaka, baokanel’oka bamolata yoi linalik’iy’olangaka, baosemodya basua, ko baocoa mbolimboli la Kulete. 14Koko efan’olingolingo bofongofongo bon’okolo bonotangama Eulakulu bokumba en’ekolo eho; 15ko eneki basua osimbamaka, ko bataonga lacina bafomane la lofongo, tocika baho lacina batolame la lofongo. 16Ko enek’is’ocoaka mbolimboli mene l’ekolo ena sali enetangama Kauda, ten’ino l’osala lacina tokakela boatu bon’osali; 17ko enek’iy’osangyaka boho ena liko, baotamba besinga ben’ekolo mene, ko baetsa beho en’ase ban’asua, ko baokakela beho; ko enek’iy’oangaka batongofusama en’ekongo ena lose, baokitsa bisenda bin’asua, ko baotolama yok’osamb’oho. 18Ko eneki basua olidyamaka bike la lofongo, en’ina bona loi baomatsa lioka toma tomoi mboka; 19ko en’ina bon’esaso baoka toma ton’asua l’akas’aniyoamene 20Ko enetenya bina la tooto beco la biane bike, ko bofongofongo mene bokusa likumba bik’ike, iso totalengedy’oka tongika lakina tu. 21Koko enek’iy’okindaka likila toma elela mene, Paulo aemala ena ntoto eniyo, aila, ate, Bifili, yombo bolofaki yoi linami, ko botasemwa ena Kulete, tumbe toten’ino ko la mbehya ena toma yok’osamb’one. 22Ohonde isanga lakoond’ino lacina bokiky’etema; lacina efaataki boto’omoko’onino onongowa: basua kei kongoehyama. 23Lacin’oka ekima ena Yakomba, onoyali Bomene’onami ko onasael’emi, aemala l’emi l’oco’one, 24ko aila, ate, Paulo, taangake; akoli lacina oemale en’oso bona Kaisala; ko lenda, Yakomba amokof’iyatu banayakende l’e en’asua. 25Lacin’eho, bifili, bonyangelaka! lacin’emi limedya Yakomba, limedy’oka yoi lingilama yok’onoki’m’osumolamaka liho. 26Koko tongofusama en’ekolo emoi.
27Ko eneki boco bona jo l’inei oyelaka, kuma toyatolame bili l’ili ena lose lona Adulia, yok’en’esike ena kelekele en’oco basali ban’asua baokanel’oka toolama mbolimboli l’okili’omoi. 28Ko enek’iy’omekaka nginda, baosungya baboko ntuk’ife; ko enek’iy’olindak’isisali, ko baomeka lakina, baosungya baboko jo l’atano. 29Ko baanga, totongofusama ena loko lona baufe, ko baofusa mboko inei en’okuta bona yenda lin’asua, ko baolengedya ekedyo en’ina la mposa. 30Ko basali ban’asua basokolanga lacina balote basua, baokitsa boatu bon’osali nk’eyoka bayafuse mboko en’elongi en’asua. 31Koko Paulo aosumola capitaine ena soldats ko la soldats mene, ate, Nko bato’ane bafayale en’asua, ino bofikaki tu. 32Nkwaho soldats baokeka, besinga bena boatu bon’osali, ko boho bokwela basi 33Ko en’esike enakel’ina, Paulo amaond’iyatu lacina bale toma, ate, Bin’one boyali yoka bina bona jo l’inei bonatombany’ino, ko bonakil’ino toma, ko botal’iyema 34Lacin’eho, lakoond’ino lacina bole toma tomoi; lacina toma tone tongokokiky’ino; lacin’oka efaataki bese bomoko bon’ete’enino bonongowa. 35Eneki’nd’otendaka yok’osamb’oho, aotamba mampa, aokanga Yakomba lokango en’oso’on’iyatu, aokes’eho ko aomatsa lila. 36Nkwaho iyatu baokika en’etema, ko iyoamene baola toma nkoho. 37Isatu banayaaki en’asua toyaaki bato bekam’efe la ntuku nsambo l’ato botoa. 38Enek’iy’olaka toma ko baokinda, baoka bepunga ena lose lacin’eho baumole bolito bon’asua. 39Ko eneki bina okyaka, bateya bokili’oho; ohonde baena likoto limoi linaliyali l’esemelo, ko baokanela yombo engonga lacina bacinde basua nko meho. 40Baokeka besinga bena mboko, ko baocik’iho en’asi, baolitola bekoli benek’iy’olitaka yenda, baosangya esenda en’asua en’oso bona lofongo, ko baomeka lacina basemya basua. 41Ohonde baoyela en’edye enukana bembanda befe, ko baokakya basua en’ekongo; elongi en’asua eokakatela la locili mene ko etalila lakina, koko bokuta bona yenda bomatsa limunya la nkele ena bafukumo ban’asi. 42Ko soldats basokolanga lacina bayake basungu, batongokwel’asi ko batongolota. 43Ohonde capitaine ena soldats amafekya ena eango eniyo, lacin’oka aolanga lacin’eho aikya Paulo; ko aila, ate iy’aney’asi bayofusake en’asi ko bayele en’okili; 44ko banaciki bacoake, bamoi en’ambaya, bamoi ena toma tomoi ton’asua. Koko yok’osamb’oho bato bahatu baoyela en’okili nko l’olotsi.
Actualmente seleccionado:
Bikambwa Biniki Bikima 27: BBY62
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
Bokanda Bona Yakomba Bon’ototo © Alliance Biblique de la R. D. Congo, 1962
