1 TIMOTE 1
1
Gi deɓpa
1Ni an Pol sa vovoɗta vi Yesu Kristu, u gaɗta vi Lona ma suɗuygina u Yesu Kristu ma ay ka juɓumma. 2Maŋ Timote goron ma gasina hu vira. Ko Lona Buna u Yesu Kristu, Bu Suuna mayna, ɦaŋ oora, vaɗ huna, u heɓpa.
Gol taŋ jivi ko gaɗta ka u voɗoɗɗira
3Ko an daŋga na an a tuɗ Masedoin ni aŋ kak ka hu Efes. Hu wanni suu haɗ gaɗta cora kaa, aŋ gaɗasiya, asi hin haɗ ndaɗta. 4Dasi asi hin dlara njunjunda u sem somoyosi suu day daynara kiyo. Dla ndaɗta zulni ciwayra ɦawaa, ka tuɗ sunda suɗta vi Lona ta ay vi huri uɗta fokgi. 5U dlara vi gaɗ ndaɗta mbay ni minda vi hu ma jivina u dlara huruŋ saaraɗ fok jivira vira gasira. 6Suu ɦiw ni hoŋ ki dagan hu poy masira viɗ tasi ki hu ciwayra giniŋga. 7Asi hal a mbuɗ tasi ki malayaŋ gaɗta vi Lonara, asi ka hum u boy masinaɗi lay ka wi va ma asi dammaɗi lay.
8Lini aygi laɗ u voɗoɗu ni aygi wi ana gaɗta jiviya. 9Aygi wi ana gaɗta li ni ka kay suu ɗegeenaɗi, ni kay suu li cora, u suu hoŋ duu u ndaɗna, kay suu hurusi cona, u suu sulukŋa, kay suu ka hoŋ yasi kaŋga fok Lonaɗina lay, suu ka wi tlesuu vi Lonaɗi layna. Kay suu ci busi u susi kina, ci suu daŋŋa layna. 10Kay suu li zoŋga, suu buu u ndarayasi njufina, u suu gus suuna kina, u suu kaboyna, suu suu tasi kay dossa, suu li dlara daŋga ko ndaɗta nana, ka taɓ u gasira vi haɗtaɗina. 11Haɗta ndaɗta faɗ ki ni hu Boy ma Ayra ma ɦanna ki nana, Boy ma Ayra ma di ki kay Lona ma bibiŋilna ma sari jivira.
Gi deɓpa kay jivira vi Lonara
12An gi deɓ Yesu Kristu Bu Suuna mayna ma ɦan saɓakŋa kay sun manda, gam deɓpa kay ŋgara nam ŋgaan ana an ɗegee ndaki a sunumura. 13An ay jew ni sa ma duu u namma lay sa ma lasamma sa ma ŋgulumma lay ni nam Lona wan hahawan kay mege an ay jewni ka vi umbi ka wi dlara an a laɗtaɗi lay. 14Bu Suuna mayna kuluɓun oo mamba ka daɓ kiɗira kanu. Nam mbuɗun sa vina u minda aygi taɓi hu Yesu Kristu u ndaɗta. 15Gola wanni boy ma gasina ma sana ndak a vamma, Yesu Kristu mbay hu duliyara tani kay suɗ suu cona, dukusi halaŋŋi ma co saɓakina ni anu. 16Ni kay ndaɗta Lona wan hahawan ni na, kay Yesu Kristu mba tak lalam mamba ki egenu kay suu hin a vi ha um daganna mba fi iirira ka daɓ kiɗira. 17Mul ŋgol ma didinna ma miɗɗina, ma sa ka wam u irimbina ni Lona dew, geleɗta u ŋgolla ni mamba a fafatɗa Amin.
18Timote, goronna, an daŋ gaɗ ndaɗta ni maŋu, ni kay boy ma suu jok vun Lona dam ay ki kaŋ jewna aŋ col kay boy namma a duu duu ma jivina. 19Gol viiŋga u saa maŋga jivira, suu ɦiw ka hum u saa masiraɗi kay ndaɗta viisira ɓalak kiyo. 20Duk suu asina ni Hemenee u Aleksandre, an ɦasi ki maŋ Satanna kay asi mba gaɗ tasi a ŋgul Lona oloɗi.
Actualmente seleccionado:
1 TIMOTE 1: BMS
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
Bible Moussey © Bible Society of Chad, 2002.
