Malasi 3
3
1Ŋɔi Aɔ̃ Lafɛ̃ɛi lele do ilɛ í jɛ í ni, an bɛ amaacɛm wa ku na ku teesem kpãa. Lafɛ̃ɛ iyi ì waa dɛdɛ ŋau á lɔ si kpasɛ̃ɛu anu akã. Amaabɛ iyi ì bi ŋau wa naa ku na ku fɔ idei akabuum. 2Yooi á yɔkɔ ku leekĩ dim dim si ajɔ iyi á to wa. Mà yooi á yɔkɔ ku leekĩ waati iyi á faata wa, domi á yɛi bɛi ina iyi wa yɔ isɔ. Nɔ ku yɛ bɛi acɛ jiidai woo fɔ jĩnɛ ŋa. 3Á na ku bubai bɛi inɛ iyi wa yɔ isɔ fũfũ ku ba ku nya riisiɛ. Á jɔ̀ inɛi Levii ŋau a maajui sãa sãa bɛi wura do isɔ fũfũ iyi à yɔ à nya riisi nŋa. Aŋai aa ya cea Aɔ̃ Lafɛ̃ɛ kuwee si dee dee bɛi wooda wa fɔ. 4Waati nŋu, Aɔ̃ Lafɛ̃ɛ á gba kuweei inɛi Zudaa ŋa do ti inɛi Zeruzalɛmu ŋa do inɔ didɔ̃ bɛi ti adɔ̃ ŋa iyi à lɔ ŋau. 5An naa si ŋɛi n na n kiiti ŋɛ. An dede si woo ce dobu dobu ŋa do woo ce sakara ŋa, do woo ce kugbasi si ibo ŋa do si inɛ ŋa iyi à waa taa woo ce icɛ ŋa iyi à nɛ a ba isã do jaaɔ̃ ŋa do kɔyɔ ŋa do isɛ mmu ŋa gbugbã, nɔ a kù mà bɛɛrɛm. Amu Aɔ̃ Lafɛ̃ɛi lele do ilɛi ǹ fɔ bɛɛbɛ.
I nyi wa bi Aɔ̃ Lafɛ̃ɛ ŋa
6Amu Aɔ̃ Lafɛ̃ɛ, n ci ya n kpaasi. Nɔ iŋɛ, dimii Zakɔbu ku jɛ nŋɛu kaa nɛ kɔɔ. 7Hai si waatii bala nŋɛ ŋa wai i kù saalu ikɔm ŋa i kù ceò ŋa icɛ ŋa. Na nŋu, amu Aɔ̃ Lafɛ̃ɛi lele do ilɛ ǹ ni, i sinda wa bi titom nɔ amu mɔ n sinda wa bi tu ŋɛ. Amma ì waa ni ŋa, na mii aa ka sinda wa bi titɛɛ. 8Ŋɔi ǹ jɛ nŋɛ ǹ ni, amanɛ á yɔkɔ ku lɛlɛ Ilaaɔ̃? Ntɔ ntɔ, iŋɛ ì waa lɛlɛm ŋai. Nɔ ì fɔ ì waa ni ŋa, si mii à waa lɛlɛɛ. Nɔ ǹ jɛ ǹ ni, si amua nŋɛ ku naaò wa do si akã iyi ì nɛ i ya naam wa si mɛɛwa fei ŋau. 9Ikpei í jɛ ti iŋɛ inɛi Izirɛli ŋa fei, domi ì waa lɛlɛm ŋai. 10Mii iyi ì nɛ ŋa fei i timbiɛ ikɔ mɛɛwa nɔ i ko ikɔ akã i naam wa bi ku jilɛ amanim ŋa. Nɔ kpasɛ̃m kú nɛ amaajɛ kosĩa. I cɔ laakaim ŋa nɔ i cɔ bii í jɛ n kaa n cĩ nŋɛ lelei Aɔ̃ nɔ n wee nŋɛ ntɔ ntɔ. 11An lele kɛtɛngbo ŋa hai si ilɛ nŋɛ ŋa, ku ba a maà bɛjɛ amaajɛ nŋɛ ŋa. An jɔ̀ jĩi ndii rezɛ̃ɛ nŋɛ ŋa iyi a ci ya so ŋau a so si iko nŋɛ ŋa. Amu Aɔ̃ Lafɛ̃ɛi lele do ilɛi ǹ fɔ bɛɛbɛ. 12Dimi mmu ŋa fei aa ni, iŋɛ ilu inɔ didɔ̃ ŋai, domi kuwɛɛ á dɔ̃ si ilɛ nŋɛu. Amu Aɔ̃ Lafɛ̃ɛi lele do ilɛi ǹ fɔ bɛɛbɛ.
Ajɔ iyi Aɔ̃ Lafɛ̃ɛ á nyisi dee dee kú jɛɛ
13Aɔ̃ Lafɛ̃ɛ í ni, ide ŋa iyi ì waa fɔ na irim ŋa kù sĩa. Nɔ ì beem ì waa ni ŋa ide laalɔ yoomai ì waa fɔ na irim ŋa. 14Ì fɔ ì waa ni ŋa bii iŋɛ ì waa tɔɔ amu Aɔ̃ Lafɛ̃ɛ ngbɛi. Ì ni iŋɛ ì waa jirima woodam ŋa nɔ ì waa ce bukii iku ŋa ku ba n ce nŋɛ didɔ̃, amma i kù ba nkãma ŋa. 15Wee nsɛi ì waa fɔ ì waa ni ŋa ì waa yɔɔ woo tɔɔ fufu ŋa do woo ce laalɔ ŋai à ya maa bɔ waju. Ì fɔ ì waa ni ŋa baa bii à waa cɔ laakaii amu Ilaaɔ̃, ǹ ya n jɔ̀ ŋai n ci ya n ce nŋa nkãma.
16Ŋɔi inɛ ŋa iyi à waa jirima Aɔ̃ Lafɛ̃ɛ ŋa à fɔ si njɛ. Aɔ̃ Lafɛ̃ɛ í de si ŋa itĩ í gbɔ ide nŋa. Nɔ à jilɛ tia gɔ iyi í jɛ ti gigi ku ye si wajuɛ si bii à kɔ irii inɛ ŋa iyi à mà bɛɛrɛɛ nɔ à waa jirimaɛ. 17Ŋɔi Aɔ̃ Lafɛ̃ɛi lele do ilɛu í ni, aŋai aa jɛ inɛm ŋa ajɔ iyi an nyisi yiikom nɔu. An ce araare nŋa bɛi baa í ya ce araarei ama inɛmɔkɔɛ iyi wa jirimaɛ. 18Waati bɛɛbɛi aa nyi i yɛ mii iyi í nya inɛ jiida do inɛ laalɔ ikã ŋa do mii iyi í nya inɛ iyi wa jirima Ilaaɔ̃ do inɛ iyi kù waa jirimaɛ ikã má ŋa. 19Ajɔ wee wa naa, ajɔu á yɛi bɛi inai bi ku sɔ̃ pɛ̃ɛ. Ajɔ nŋu, ilu faau ŋa do woo ce laalɔ ŋa aa joi bɛi fɔfɔ. Nkãma kaa gbe nŋa. Amu Aɔ̃ Lafɛ̃ɛi lele do ilɛi ǹ fɔ bɛɛbɛ. 20Iŋɛ iyi ì mà bɛɛrɛm ŋa, iyi ǹ wa n sɔ̃ ŋɛ wee. An jɔ̀ dee dee ku jɛm ku naa si ŋɛi bɛi inunu nɔ ku faaba ŋɛ. Waati bɛɛbɛ aa nɛ ara nŋɛ nɔ aa fo i maa dingaa do inɔ didɔ̃ ŋa bɛi ama kɛtɛ ŋa iyi à waa fita wa hai bi ku so. 21Ajɔ nŋu bɛ, an nyisi gbugbãm, aa tɛɛsɛ inɛ laalɔ ŋau ŋa. Inɛ ŋau aa yɛi bɛi ilulu si isɛ nŋɛ. Amu Aɔ̃ Lafɛ̃ɛi lele do ilɛi ǹ fɔ bɛɛbɛ.
Kubaai Elii
22I jɔ̀ i ye gigii wooda do asaiya iyi ǹ na Moizi woo ce icɛm si iri kutai Ɔrɛbu na irii iŋɛ inɛi Izirɛli ŋa fei.
23Ajɔi amu Aɔ̃ Lafɛ̃ɛu í la nɔ í nɛ njo. Amma hee ajɔu ku maa to wa, an bɛ walii Elii wa. 24Á jɔ̀ baa ŋa do amu ŋa a dɔ̃, a maa gbɔ si njɛ. Nɔ do yaase bɛɛbɛ, n kaa n naa si ilɛu n ce nfeɛ má.
Actualmente seleccionado:
Malasi 3: MKL
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
2021, SIM International et UEEB