Lagyo 8
8
Hpúng Byû Lé Sholuq Zing-rî É Hkyô
1Sholuq gi, haú má nyi to mù, Sitehpan lé sat pyâm é múzó má myìt bo huî ri.
Haú nyí mai, Yerusalem wà mó mâ é noqkuq hpúng gi, zing-ri mó huî lo é nghut mù luî, lagyô pé mai lai luî, lùmjíng bang lhúnglháng gi, Yuda mau eq Samariq mau jowò hkangmó má byo myín ló bekô. 2Nghut kôlhang, târâ hkúnggâ é bang gi, Sitehpan lé yhûm pyâm é htâng má, yhâng é yánmai iyon mó huî nyi akô nghut ri. 3Sholuq kúm gi, rayhum htâng rayhûm wàng mù, myiwe yùqgè lé she hkyut htoq yû luî, htóng má lhûng tô é dông mai, noqkuq hpúng haû lé lhoqhpyoq ló nyi ri.
Samariq Wà Má, Gabú Danglù Hko Kyô É Hkyô
4Byo htoq ló é bang kúm gi, jé é jowò hkangmó má mungdang lé hkô kyô ló akô. 5Haú hkûn, Hpilip gi, Samariq mau mâ é wà mó rawà shut e ló mù, Hkrisidùq é hkyô lé hkô kyô ri. 6Byù ajùm ayò gi, Hpilip taî kyô é hkyô lé wó gyô é eq, yhang tûn shit é maúhpo alhô agàn lé myàng kôjáng, i‑myìt rahkat zâ èq yhâng é dang chôm gyô nyi bum akô. 7Nàt wang júng é byù myo myô pê chyáng mai, agè ashop é nàt pé wùt garu uchyang htoq ló byùq bum akô; gùngjum shi é bang eq hkyî htên é bang myo myo le, ge ló byùq bum akô. 8Haû mù luî, wà mó haú má gabú hkyô gyai yhang wó bekô nghut ri.
Myòqheq Sará Simun É Hkyô
9Simun gâ é byù rayùq gi, hí lé haú wà mó má myòqheq hpàqchyî kut shit mù, Samariq byu pé lé lhoqmaú luî, yhâng gùng lé yhang, làklaí sû nghut lhê gâ ri. 10Byù tiq ko bànshoq le, “Byù shí yùq gi, ‘haû a-tsam mó’ gâ é, Garaî chyáng mai hpungwup a-tsam wó yû sû nghut ri.” ga luî, yhâng é dang lé gyô bum akô. 11Haú yùq gi, myáng myáng yhâng é myòqheq hpàqchyi èq yhángmòq lé lhoqmaú lo é yánmai, yhâng dang lé chôm lum bum akô. 12Nghut kôlhang, Hpilip hko kyô é Garai Gasâng é mîngdán hkyô eq, Yesuq Hkrisidùq é myìng eq sêng é gabú danglù hkyô lé, lùmjíng kôjáng, myiwe yùqgè wuìmyhup hkâm yu bum akô. 13Simun yhang yhang le lùmjíng mù luî, wuìmyhup hkâm yù mù, Hpilip htâng châng wún ri. Hpilip é alhô agàn mó eq làklaí alhô agàn pé lé myàng jáng, yhang gi, gyai maú byùq ri.
14Garai Gasâng é mungdang lé Samariq byu pé, lhom hàp yù bê hkyô lé, Yerusalem wà mó má nyi é lagyô pé wó gyô bùm kôjáng, yhángmòq gi, Petiruq eq Yohan nhik lé haú má nhang kat akô. 15Yhángnhik gi, lé jé jáng, byù haú bang Chyoiyúng Sô wó yû râ matú kyûdung byî akô. 16Hkâsu mù gâ le, Chyoiyúng Sô gi, yhángmòq chyáng ó yùq é ahtoq má le, a gyó lô shi; Yhûmsîng Yesuq é myìng mai wuìmyhup hkâm yu é za ru nghut bùm ashî. 17Haû mù luî, lagyô nhik yhángmòq é ahtoq má lòq ke byi jáng, yhángmòq gi, haû Chyoiyúng Sô lé wó hkam yù bekô nghut ri.
18Lagyô nhik é lòq kê kat jáng Chyoiyúng Sô wó hkam yu é lé, Simun myàng jáng, yhang gi, yhángnhik lé ngùn ê byî wú mù, 19“Hká yùq é ahtoq má nghut kôlhang, ngò lòq ke byi jáng, haú yùq gi, Chyoiyúng Sô wó yû râ matú, haú sû é a-tsam ngo lé le byi kó laq.” ga dûng ri.
20Petiruq kúm gi, “Garai Gasâng é chyûnghuq lé ngun èq wó wui yù râ nghut lhê ga luî, myìt é yánmai, náng é ngùn gi, nàng eq rahá htên byòq byùq sháng gàq. 21Nàng gi, Garai Gasâng é hí má myìt a díng sû nghut é yánmai, shí hkyô má nàng wó bo lòm râ a nghut. 22Haû mù luî, shî agè ashop é hkyô mai myìt lhîng mù, Yhûmsîng Garaî chyáng dûng tôngbán aq. Haú hkûn, náng é ûnghkaû má myìt pyâm é hkyô lé, mara hkyut pyám byi âbe. 23Nàng gi, ladu lai shoq nhikhko zo mù, yubàk marâ èq tuî zing to huî é lé, ngò myang ri.” ga yhang lé taî ri.
24Haú hkûn, Simun gi, “Núngnhik taî é hkyô haî le ngá chyáng a jé sháng gàq, ngá é matú haû Yhûmsing chyáng kyûdung byi kó laq.” ga tû taî ri.
25Yhángnhik kúm gi, haû Yhûmsing é mungdang lé sàksé hkám mù ban hko kyo jáng, Samariq byu pê é wà myo myo má, haû gabú danglù lé hko kyo uchyang, Yerusalem wà mó shut dum taû lò bekô nghut ri.
Hpilip Eq U-nuk Nhik É Hkyô
26Ahkuî, Yhûmsing é maumang lagyo gi, Hpilip lé, “Toq àq, Yerusalem wà mó mai Gaza shut ló é hkyô jé shoq, maupyî shut nyâng za e ló aq. Hkyô haû gi, yòso hkyô nghut lhê.” ga taî ri. 27Haú hkûn, yhang toq mù e ló ri. Haú u lé, Ehti-opi ming lé ùp é hkóhkâm myhí Kandake é hí má ahko ahkáng mó wó mù, yhâng é sùtzè bànshoq lé zûm é, Ehti-opi byù u-nuk rayùq gi, noqkuq râ ga Yerusalem wà mó má ê mù, 28dum taû lo é hkûn, yhâng é myanglhêng má zùng luî, myìqhtoi Esai-a laiká lé nghap nyi ri. 29Sô gi, Hpilip lé, “Myanglhêng shut chyâng e ló aq.” ga taî ri.
30Haû mù, Hpilip gi, din ê mù, myìqhtoi Esai-a laiká nghap nyi é lé wó gyo jáng, “Nàng nghap nyi é hkyô lé sê gyô ri lhú?” ga luî, yhang lé myî ri.
31Haú yùq gi, “Mhoqshit sû yùq a nyi le, ngò hkâsu kut sê gyo râ lhú?” ga tû taí mù, yhang eq rahá lo dòq zùng àq ga Hpilip lé lung ri.
32Yhang nghap é Chyúmdang gi,
“Sat râ sau lé su, Yhang lé she e ló bê nghut ri;
sau zo gi, saumaú wùq su é hí má zim za nyi tô é su, Yhang le nhut a hpông é za nyi tô ri.
33Yhânggùng lé lhoqshôm pyâm to huî é hkûn, Yhang lé a târa é dông dòqdân pyám bekô;
Yhâng é chyungxe lé myigùng htoq mai yu pyám bekô nghut mù luî, Yhâng é awùt ashín lé ó yùq wó gôn kyo râ lhú?”#Esai 53:7-8
gâ ri.
34Haú hkûn, haû u-nuk hpó gi, Hpilip lé, “Haû nghut le gi, ngo lé taî kyo laq! Myìqhtoi shí yùq gi, ó lé lhoq-ang luî, taî é nghut lhê lhú? Yhânggùng lé taî é nghut lhê lhú? Haû a nghut jáng, góyùq é hkyô lé taî é nghut lhê lhú?” ga myî ri. 35Haú hkûn, Hpilip gi, Chyúmdang haû lé yù mù, Yesuq eq sêng é gabú danglù lé taî kyô ri.
36Haû su e ló kô le, wuì jòq é má jé jáng, haû u-nuk hpó gi, “Wú aq, shî má wuì jòq tô ri, wuìmyhup hkâm yù râ matú ngo lé hkúm râ jang haî jòq ashî lhú?” ga taî ri. 37Hpilip gi, “Náng i‑myìt bànshoq èq, nàng lùmjíng bê nghut le gi, hkâm yu le ge lhê.” ga taî ri; yhang le, “Yesuq Hkrisidùq gi, Garai Gasâng é Yhangzo nghut é lé, ngò lùmjíng bê.” ga tû taî ri.#8:37 Bun zo 37 shí lé Chyúmlaiká ra-am má gi, bo lhê; ra-am má gi, a bò. 38Haú hkûn, yhâng é myanglhêng hkying nhâng mù, yhángnhik wuì má gyó wâng luî, Hpilip gi, u-nuk hpó lé wuìmyhup hkám byî ri. 39Wuì hkaû mai htoq ló kô é hkûn, haû Yhûmsing é Sô gi, Hpilip lé myhik za shuî ló byùq mù, u-nuk hpó le Hpilip lé dum a myàng lo; nghut kôlhang, yhang gi, e ló é hkyô shut gabú myìt èq xoq sô e ló bê nghut ri. 40Hpilip kúm gi, Azutu wà má lo htoq jé kat mù luî, Kesare wà mó jé shoq haú mau mâ é wà hkang wà mó má gabú danglù hkô kyô wún ri.
Actualmente seleccionado:
Lagyo 8: znot
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2025, Wycliffe Bible Translators, Inc.