SALMOS 91
91
Dios mi' cʌntañonla
1Jini mu' bʌ i chumtʌl yic'ot jini C'ax Ñuc Bʌ
Mi' yajñel ti' yʌxñʌlel jini Mach bʌ Anic i P'isol i P'ʌtʌlel.
2Mi caj c sub: Lajalʌch lac Yum bajche' ts'ajquibil bʌ otot ba' mic puts'el.
C Diosʌch, woli bʌ c ñop, cho'on.
3Dios mi caj i cʌntañet ame chujquiquet ti yac che' bajche' mut.
Mi caj i loc'sañet ti c'amʌjel mu' bʌ ti tsʌnsa.
4Dios mi caj i cʌntañet ti' yebal i wich' yilal che' bajche' mi' luts' i yal i ña'al mut.
I xuc'tʌlel i pusic'al jiñʌch lac mʌctijib ba' mi laj cʌntʌntel.
5Ma'anic mi caj a bʌc'ñan jini bʌbʌq'uen tac bʌ ti ac'ʌlel,
Mi jinic jalʌjb mu' bʌ i julet che' ti q'uiñil.
6Mi jinic p'ʌtʌl bʌ c'amʌjel mu' bʌ i ñumel ti ac'ʌlel,
Mi jinic mu' bʌ ti jisaya che' ti xinq'uinil.
7Anquese tsa' tsʌnsʌntiyob jump'ejl mil ti a t'ejl
Yic'ot lujump'ejl mil ya' ti ñoj bʌ a c'ʌb, ma'anic mi caj i tajet.
8Ti a wut mi caj a q'uel i chobejtʌbal jini jontolo' bʌ.
9Come lac Yum jiñʌch lac puts'ib.
Jatet ja'el tsa'ix a wʌc'ʌ a bʌ ti' wenta jini C'ax Ñuc Bʌ.
10Jini cha'an ma'anic mi caj a wubin wocol.
Ma'anic mi caj i tajet jini c'amʌjel mu' bʌ ti tsʌnsa ya' ba' chumulet.
11Come jini C'ax Ñuc Bʌ tsa'ix i yʌq'ue mandar i yángelob,
Cha'an mi' cʌntañet baqui jach ma' majlel.
12Mi caj i chuquet ame a jats' a woc ti xajlel.
13Mi caj a t'uchtan jini bajlum yic'ot lucum.
Mi caj a tsʌnsan jini jontol bʌ bajlum yic'ot lucum.
14Dios mi' yʌl: Mi caj j coltan loq'uel ti wocol jini ochem bʌ tic wenta come c'ux mi' yubiñon.
Mi caj j cʌntan come mi' cʌñon. Mi' pejcañon tij c'aba'.
15Che' mi' c'ajtibeñon, mi caj c jac'ben i t'an.
Mi caj cajñel yic'ot che' ti' yorajlel wocol.
Mi caj cʌc' ti colel. Mi caj cʌq'uen i ñuclel.
16Mi caj c tijicñesan ti cabʌl i jabilel.
Mi caj j coltan, che'en Dios.
Actualmente seleccionado:
SALMOS 91: ctuBI
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 1977, Wycliffe Bible Translators, Inc. All rights reserved.