SALMOS 140
140
Ti mucul jach woli' chijtañob
1C Yum, pʌyʌyon loq'uel ti' c'ʌb jini jontol bʌ winicob.
Coltañon loq'uel ti' p'ʌtʌlel jini yomo' bʌ i t'uchtañon.
2Mi' wʌn ña'tañob bajche' mi caj i melob jontolil.
Ma'anic mi' cʌyob i tech guerra.
3C'ux i yej che' bajche' i yej lucum.
An i venenojlel i yej yilal.
4C Yum, mach ma' cʌyon ti' tojlel ili jontolo' bʌ.
Loc'sañon ti' tojlel jini mich'o' bʌ
Tsa' bʌ i comol ña'tayob i yʌc'on ti yajlel.
5Jini mu' bʌ i chañ'esañob i bʌ tsi' yʌc'ʌyob yac ba' mach tsiquilic.
Xotbilix chij ya' ba' mic ñumel ti bij.
Chajpʌbilix yac cha'an mi' chucoñob.
6Tsac sube c Yum: C Dios,
C Yum, ñich'tañon che' mic pejcañet ti wocol t'an.
7C Yum Dios, caj coltayajet. Cabʌl a p'ʌtʌlel.
Tsa' cʌntayon che' ti yorajlel guerra.
8C Yum, mach a wʌq'ueñob chuqui yomob jini jontolo' bʌ.
Mach yomic mi' loq'uel ti uts'at chuqui mi' ña'tañob i mel
Ame ch'ejl'acob ti jontolil.
9Jini mu' bʌ i joyoñob mi' chañ'esañob i bʌ.
La' sujtic ti' tojlelob jini jontolil tsa' bʌ i meleyob.
10La' yajlic i nich c'ajc ti' jol che' woli ti lejmel.
La' chojquicob ochel ti c'ajc.
La' chojquicob ochel ti tam bʌ ch'en ba' mach mejlicob ti loq'uel.
11La' jilicob jini mu' bʌ i cha'lenob p'ajoñel cha'an ma'anic mi' chʌn p'ojlelob.
La' i bʌc' taj wocol jini winic yujil bʌ jontolil.
12Cujil cʌntʌbil i cha'an lac Yum jini tic'lʌbilo' bʌ. Woli' coltañob.
Mi caj i tsictesʌbeñob toj bʌ i pusic'al jini p'ump'uño' bʌ.
13Melel, jini tojo' bʌ mi caj i subob i ñuclel a c'aba'.
Jini tojo' bʌ mi caj i chumtʌlob ti a tojlel.
Actualmente seleccionado:
SALMOS 140: ctuBI
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 1977, Wycliffe Bible Translators, Inc. All rights reserved.