GENESIS 48
48
Jacob tsi' yʌq'ueyob i yutslel i t'an Efraín yic'ot Manasés
1Ñumenix cha'p'ejl uxp'ejl q'uin tsi' subeyob José: Awilan, c'am a tat, che'ob. José tsi' pʌyʌ majlel i yalobilob, i c'aba'ob Manasés yic'ot Efraín. 2Tsa' subenti Jacob: Talix a walobil José wʌ' ba' añet, che'ob. Israel tsi' cha'le wersa. Tsa' ch'ojyi. Tsa' buchle ti' wʌyib. 3Jacob tsi' sube José: Dios, Jini Mach bʌ Anic i P'isol i P'ʌtʌlel, tsi' yʌc'ʌ i bʌ ti cʌjñel tic tojlel ya' ti Luz, ti' lumal Canaán. Tsi' yʌq'ueyon i yutslel i t'an. 4Tsi' subeyon: “Mi caj c p'ojlesañet. Mi caj c p'ojlesan a walobilob. Che' jini mi caj a wochel ti' tat cabʌl winicob x'ixicob ti mojt ti mojt. Mi caj cʌq'ueñob ili lum yic'ot ja'el a p'olbal maxto bʌ anic tsi' q'ueleyob pañimil. I cha'añobʌch mi caj i yajñel ti pejtelel ora”, che'en Dios. 5C cha'añobix jini cha'tiquil a walobilob tsa' bʌ i yilayob pañimil ti' lumal Egipto che' maxto tilemonic ba' añet. Efraín yic'ot Manasés lajalobʌch bajche' Rubén yic'ot Simeón. C cha'añobʌch. 6A walobilob mu' bʌ caj i tilelob a cha'añobʌch. Mi caj i t'oxbentelob i chubʌ'an i tat ti' c'aba' Efraín yic'ot ti' c'aba' Manasés. 7Che' bʌ tsa' loq'uiyon ti Padanaram, tsa' chʌmi Raquel ti' lumal Canaán ya' ti bij che' ñajt to an Efrata. Tsac mucu ya' ti' bijlel Efrata, jiñʌch Belén, che'en.
8Israel tsi' q'uele i yalobilob José. Tsi' yʌlʌ: ¿Majquiyob? che'en. 9José tsi' sube i tat: Calobilob tsa' bʌ i yʌq'ueyon Dios wʌ'i, che'en. Israel tsi' yʌlʌ: Pʌyʌyob tilel ba' añon. Mu'to cʌq'ueñob i yutslel c t'an, che'en.
10Wolix ti yajpel i wut Israel come ñoxix. Ma'anix tsa' wen c'oti i wut. José tsi' pʌyʌ tilel i yalobilob ba'an Israel. Israel tsi' ts'ujts'ubeyob i wut. Tsi' tul meq'ueyob. 11Israel tsi' sube José: Tsac lon ña'ta ma'anix mic chʌn q'uelet. Wʌle Dios woli' yʌq'ueñon j q'uel a walobilob ja'el, che'en. 12José tsi' chucbeyob i c'ʌb i yalobilob. Tsi' ñucchoco i bʌ ya' ti' tojel Israel. Tsi' loc'sayob ti' pix. 13Che' jini José tsi' pʌyʌyob tilel ti cha'ticlel, Efraín ti ñoj bʌ i c'ʌb ba'an ts'ej bʌ i c'ʌb Israel, Manasés ti ts'ej bʌ i c'ʌb ba'an ñoj bʌ i c'ʌb Israel. Lʌc'ʌl tsi' pʌyʌyob tilel ba'an i tat. 14Israel tsi' rusi i c'ʌb. Tsi' c'ʌcʌ ñoj bʌ i c'ʌb ti jol Efraín jini ijts'iñʌl bʌ. Tsi' c'ʌcʌ ts'ej bʌ i c'ʌb ti' jol Manasés. Che'li tsi' jele i c'ʌb, anquese tsi' ña'ta ascuñʌl Manasés. 15Israel tsi' yʌq'ue José i yutslel i t'an. Tsi' yʌlʌ: Dios jiñʌch tsa' bʌ i tsajcayob majlel c tatob, Abraham yic'ot Isaac. Jiñʌch tsa' bʌ i we'sayon che' bʌ tsaj q'uele pañimil c'ʌlʌl wʌle. 16Jini Angel tsa' bʌ i mʌñʌyon loq'uel ti pejtelel jontolil, la' i yʌq'ueñob i wenlel jini ch'itoñob. La' i ch'ʌmbeñon j c'aba' jini ch'itoñob. La' i ch'ʌmob i c'aba' c ñojte'elob, Abraham yic'ot Isaac. La' p'ojlicob ti pañimil cha'an wen cabʌl mi' majlelob, che'en.
17Che' bʌ tsi' q'uele José woli' c'ʌc jini ñoj bʌ i c'ʌb i tat ti' jol Efraín, ma'anic tsi' mula. Tsi' chucbe loq'uel i c'ʌb i tat ti' jol Efraín. Tsi' c'axtesʌbe ti' jol Manasés. 18José tsi' sube i tat: Mach che'ic yom, come ascuñʌl jini Manasés. Ac'ʌ ñoj bʌ a c'ʌb ti' jol, che'en. 19Ma'anic tsi' jac'ʌ i tat. Tsi' yʌlʌ: Cujilix, calobil, cujilix. Jini ja'el mi caj i yochel ti' tat cabʌl winicob x'ixicob. Ñuc mi caj i majlel ja'el, pero ñumen ñuc mi caj i majlel i yijts'in. Mi caj i tilelob bajc'ʌl i p'olbal i yalobilob ti mojt ti mojt, che'en. 20Tsi' yʌq'ueyob i yutslel i t'an ti ili q'uin. Tsi' yʌlʌ: Jini israelob mi caj i yʌq'ueñob i yutslel i t'an i yalobilob ti la' c'aba'. Mi caj i yʌlob: La' i coltañet Dios che' bajche' tsi' colta Efraín yic'ot Manasés. Che'ʌch mi caj i yʌlob, che'en. Che' jini ñumen ñuc Efraín bajche' Manasés.
21Israel tsi' sube José: I yorajlelix mic chʌmel. Dios mi caj i yajñel la' wic'ot. Mi caj i cha' pʌyetla majlel ti' lumal la' ñojte'elob. 22Joñon mi cʌq'ueñet jumpejt lum ñumen bajche' mi cʌq'uen a wʌscuñob. Jiñʌch tsa' bʌ c chilbeyob amorreojob ti quespada yic'ot tic jalʌjb, che'en.
Actualmente seleccionado:
GENESIS 48: ctuBI
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 1977, Wycliffe Bible Translators, Inc. All rights reserved.