GENESIS 39
39
José ti' yotot Potifar
1Tsa' pʌjyi majlel José ti Egipto. Tsa' ochi ti' wenta juntiquil egipto i c'aba' Potifar, i capitán xcʌntayajob am bʌ i ye'tel cha'an Faraón. Potifar tsi' mʌñʌ José. Jini ismaelob tsa' bʌ i cʌchʌyob majlel tsi' chombeyob. 2An lac Yum yic'ot José. Uts'at tsa' majli i ye'tel José ya' ti' yotot i yum chumul bʌ ti Egipto. 3I yum José tsi' q'uele an lac Yum yic'ot. Lac Yum tsi' wen colta ti pejtelel chuqui tsi' mele. 4José tsi' tajbe i yutslel i pusic'al Potifar. Tsi' melbe i ye'tel. Potifar tsi' yʌq'ue i ye'tel ti xq'uel e'tel ti' yotot. Tsi' yotsa ti' wenta pejtel i chubʌ'an. 5Ti jini ora che' bʌ tsa' aq'uenti i ye'tel ti xq'uel e'tel cha'an pejtel i chubʌ'an, tsa' caji ti p'ojlel i chubʌ'an jini egipto ti' yotot yic'ot ti' lum. Lac Yum tsi' yʌc'ʌ ti p'ojlel cha'an xuc'ul José. 6Potifar tsi' yʌc'ʌ ti' wenta José pejtel i cha'an bʌ. Ma'anix tsi' chʌn ña'ta Potifar come an ti' wenta José, jini jach tsi' ña'ta i c'ux i bʌl i ñʌc'.
José wen i t'ojol jax, wen ch'ejl. 7I yijñam i yum tsa' caji' mulan José. Tsi' sube: La' pi'leñon, che'en. 8José ma'anic tsi' jac'be. Tsi' sube i yijñam i yum: Awilan, mach yujilic c yum chuqui an quic'ot ti' yotot. Tsa'ix i yʌc'ʌ pejtelel i chubʌ'an tic wenta. 9Ma'anic yambʌ ñuc bʌ ti' wenta c yum. Ma'anic chuqui tsi' loto ti' bajñel p'ʌtʌlel, cojach jatet, come i yijñamet. ¿Bajche' mi mejlel c cha'len jini ñuc bʌ mulil? ¿Bajche' mi mejlel c cha'len mulil ti' contra Dios? che'en.
10Ti jujump'ejl q'uin tsi' pejca José cha'an mi' ñoltʌl yic'ot, pero ma'anic tsi' jac'ʌ i pʌyol cha'an mi' yajñel yic'ot. 11Ti jump'ejl q'uin che' bʌ tsa' ochi José ti' yotot cha'an mi' mel i ye'tel ma'anic x'e'telob ya' ti yotot. 12Jini x'ixic tsi' wats tujc'a majlel i bujc José. Tsi' sube: La' ti wʌyel quic'ot. Pero José tsi' cʌyʌ i bujc ti' c'ʌb. Tsa' puts'i loq'uel. 13Ili x'ixic che' bʌ tsi' q'uele tsa'ix i cʌyʌ i bujc José ti' c'ʌb, che' puts'emix loq'uel José, 14tsi' pʌyʌ tilel x'e'telob ti yotot. Tsi' subeyob: Awilan, c ñoxi'al tsi' yotsa jini hebreo ti lac tojlel cha'an mi' wajleñonla. Tsi' ñochtayon cha'an yom i pi'leñon. Tsac cha'le oñel ti c'am bʌ t'an. 15Che' bʌ tsi' yubi woliyon ti oñel tsi' cʌyʌ i bujc. Tsa' puts'i loq'uel ti cotot, che'en. 16Ili x'ixic tsi' lotbe i bujc José jinto tsa' c'oti i ñoxi'al ti' yotot. 17Ili x'ixic lajal tsi' sube: Jini hebreo tsa' bʌ a pʌyʌ tilel ti lac tojlel cha'an mi' melbeñet a we'tel tsa' yʌlʌ i pi'leñon cha'an mi' yʌc'on ti quisin. 18Pero che' bʌ tsac cha'le c'am bʌ t'an tsi' cʌyʌ i bujc. Tsa' puts'i, che'en.
19Che' bʌ tsi' yubibe i t'an i yijñam, tsa' wen mich'a i yum José. 20Tsi' chucu José. Tsi' yotsa ti mʌjquibʌl ya' ba' mʌcʌlob jini ñup'ulo' bʌ i cha'an rey. Ya' tsa' ajni José ti mʌjquibʌl. 21Pero ya'an lac Yum yic'ot. Tsi' pʌsbe i yutslel i pusic'al. Tsi' yʌc'ʌ ti c'uxbintel i cha'an jini xcʌnta mʌjquibʌl. 22Jini xcʌnta mʌjquibʌl tsi' yotsa ti' wenta José pejtelel xmʌjquelob año' bʌ ti mʌjquibʌl. Chuqui tac jach tsa' mejli ya'i i wentajʌch José. 23Jini xcʌnta mʌjquibʌl ma'anix tsi' chʌn q'uele chuqui tac an ti' wenta José. Uts'at tsi' mele come ya'an lac Yum yic'ot. Tsi' yʌc'ʌ ti loq'uel ti uts'at pejtel chuqui tsi' mele José.
Actualmente seleccionado:
GENESIS 39: ctuBI
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 1977, Wycliffe Bible Translators, Inc. All rights reserved.