GENESIS 25
25
I p'olbal Abraham yic'ot Cetura
(1 Cr. 1.32-33)
1Abraham tsi' pʌyʌ yambʌ i yijñam i c'aba' Cetura. 2Cetura tsi' yʌc'ʌ ti pañimil Zimram, i yalobil Abraham. Tsi' yila pañimil ja'el Jocsán, Medán, Madián, Isbac, Súa. 3Jocsán i tatʌch Seba yic'ot Dedán. I yalobilob Dedán jiñobʌch Asurim, Letusim, Leumim. 4I yalobilob Madián jiñobʌch Efa, Efer, Hanoc, Abida, Elda. I yalobilobʌch Cetura ti pejtelelob. 5Abraham tsi' yʌq'ue Isaac pejtelel i chubʌ'an. 6Abraham tsi' yʌq'ueyob i majtan tac jini ch'iton bʌ i yalobilob i majan ijñamob. Che' cuxul to Abraham tsi' chocoyob loq'uel ti' tojlel Isaac, ti lum ya' ti' tojel i pasibal q'uin.
Tsa' chʌmi Abraham, tsa' mujqui
7Tsa' ts'ʌctiyi jo'lujump'ejl i bolonc'al (175) i jabilel Abraham ti pejtelel. 8Tsa' chʌmi. Wen ñoxix tsa' chʌmi Abraham. Cabʌlix i jabilel. Tsa' pʌjyi majlel Abraham ba'an i pi'ʌlob tsa' bʌ chʌmiyob. 9Isaac yic'ot Ismael i yalobilob Abraham tsi' mucuyob ti ch'en i c'aba' Macpela am bʌ ti jamil tsa' bʌ i choño Efrón i yalobil Zohar jini heteo. Ya'an jini jamil ya' ti' tojel Mamre. 10Jiñʌch jini jamil tsa' bʌ i mʌñʌ Abraham ti' tojlel i yalobilob Het. Ya' tsa' mujqui Abraham yic'ot Sara i yijñam. 11Che' chʌmenix Abraham, Dios tsi' yʌq'ue i yutslel i t'an Isaac i yalobil Abraham. Tsa' caji ti chumtʌl Isaac ba'an jini pozo i c'aba' Jini Cuxul Bʌ Mu' bʌ i Q'uelon.
I p'olbal Ismael
(1 Cr. 1.28-31)
12Jiñobʌch i p'olbal Ismael. Jini Ismael i yalobilʌch Abraham yic'ot Agar. Ch'oyol ti Egipto Agar, jiñʌch i criada Sara. Tsi' yʌq'ue i yalobil Abraham. 13-15Jiñobʌch i c'aba' ch'iton bʌ i yalobilob Ismael c'ʌlʌl ti ascuñʌl bʌ c'ʌlʌl ti' xut ijts'iñʌl: Nebaiot, Cedar, Adbeel, Mibsam, Misma, Duma, Massa, Hadar, Tema, Jetur, Nafis, Cedema. 16Jiñobʌch ch'iton bʌ i yalobilob Ismael. Tsa' chumleyob ti colonia tac yic'ot i pi'ʌlob ti mojt ti mojt. Lajchʌntiquil yumʌlob ti' lumal tac. 17Ismael tsi' taja wuclujump'ejl i wucc'al (137) i jabilel. Tsa' chʌmi. Tsa' pʌjyi ba'an i ñojte'elob tsa' bʌ chʌmiyob. 18Ya' chumulob i pi'ʌlob ti Havila c'ʌlʌl ti Shur am bʌ ti' tojel Egipto che' mi lac majlel ti Asiria. Ismael tsa' chumle ti' ts'ejtʌlel i pi'ʌlob ti' tojel i pasibal q'uin.
Tsi' yilayob pañimil jini Jacob yic'ot Esaú
19Jiñʌch i p'olbal Isaac i yalobil Abraham. Abraham i tatʌch Isaac. 20An cha'c'al i jabilel Isaac che' bʌ tsi' pʌyʌ Rebeca ti' yijñam. Rebeca jiñʌch xch'oc bʌ i yalobil Betuel jini arameo ch'oyol bʌ ti Padanaram. I yijti'añʌch Labán jini arameo. 21Isaac tsi' c'ajti i yalobil ti lac Yum, come ma'anic i yalobil. Lac Yum tsi' jac'ʌ. Tsa' caji i cʌntan i yalobil Rebeca i yijñam Isaac. 22Che' cʌntʌbilob to i yalobilob Rebeca, tsi' cha'leyob leto yubil. Tsi' yʌlʌ i ña': ¿Chucoch che'ʌch woli' yujtel? che'en. Tsa' majli i c'ajtiben lac Yum. 23Lac Yum tsi' sube: Loj jini a walobilob am bʌ ti a ñʌc'. Mi caj i yochelob ti cha'mojt ñuc bʌ tejclum. Ñumen mi caj i taj i p'ʌtʌlel jump'ejl tejclum bajche' yambʌ. Jini ascuñʌl bʌ mi caj i yuman jini ijts'iñʌl bʌ, che'en. 24Che' i yorajlelix mi' lojtel tsi' q'ueleyob pañimil cha'tiquil alʌl, loj bʌ. 25Tsa' tili ñaxan bʌ, chʌchʌc i bʌc'tal. An i tsutsel che' bajche' i tsutsel alʌc'ʌl. Tsi' yotsʌbe i c'aba' Esaú. 26Ti wi'il tsa' tili i yijts'in, chucul i tuñ'oc Esaú ti' c'ʌb. Tsi' yotsʌbe i c'aba' Jacob. Anix uxc'al i jabilel Isaac che' bʌ tsi' q'uele pañimil i yalobilob Rebeca.
Esaú tsi' choño i yʌscunlel
27Tsa' coliyob jini ch'itoñob. Esaú wen yujil i yajñesʌntel bʌte'el. Tsa' ajni ti jamil. Jacob jiñʌch uts bʌ winic, tsa' chumle ti pisil bʌ otot. 28Isaac tsi' c'uxbi Esaú, come tsi' c'uxu we'elʌl chajpʌbil bʌ i cha'an. Rebeca tsi' c'uxbi Jacob. 29Ti jump'ejl q'uin Jacob tsi' ch'ʌxʌ i bʌl i ñʌc'. Esaú tsa' majli ti jamil. Tsa' cha' sujti tilel ti' yotot. C'un pañimil tsi' yubi cha'an cabʌl i wi'ñal. 30Esaú tsi' sube Jacob: La' j c'ux jini chʌchʌc bʌ i bʌl ñʌc'ʌl chajpʌbilix bʌ a cha'an, come c'unix pañimil woli cubin cha'an c wi'ñal, che'en. Jini cha'an tsa' otsʌbenti i c'aba' Edom, “Chʌchʌc bʌ”. 31Jacob tsi' yʌlʌ: Ñaxan chombeñon a wʌscunlel, che'en. 32Esaú tsi' yʌlʌ: Awilan, mi caj c chʌmel ti wi'ñal. ¿Chuqui to i c'ʌjñibal c cha'an jini cʌscunlel? che'en. 33Jacob tsi' yʌlʌ: Ñaxan aq'ueñon a t'an, che'en. Esaú tsi' yʌq'ue i t'an. Che' jini tsi' chombe Jacob i yʌscunlel. 34Jacob tsi' yʌq'ue Esaú waj yic'ot lenteja chajpʌbil bʌ i cha'an. Tsi' c'uxu. Tsi' japʌ. Tsa' ch'ojyi. Tsa' loq'ui majlel. Che'i tsi' ts'a'le i yʌscunlel Esaú.
Actualmente seleccionado:
GENESIS 25: ctuBI
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 1977, Wycliffe Bible Translators, Inc. All rights reserved.