Matthew 14
14
John dune too be ꞌulhꞌen-un hizilhghi
1ꞋEt ꞌoh whuya whudizulh whe lerwe Herod Jesus yulh ꞌúdantsꞌo, 2ꞌinkꞌez Herod de ꞌustlenne ꞌubulhni, “Ndun ꞌen John dune too be ꞌulhꞌen-un, ꞌen ꞌuntꞌoh. Yaidlane toh nahítnaꞌ. ꞋEt huwa ꞌutꞌen hoolhtus teneꞌútꞌen.”
3ꞋOh daꞌ Herod John huyílhchoot huyulhghel ꞌinkꞌez ꞌahúyanꞌai. Bulhutsin Philip ooꞌat Herodias huyulhni, ꞌen la toh tsꞌe ꞌuyinla. 4John Herod yúlhni, “ꞋAw nyun mba tsꞌihꞌun unꞌa lheꞌhootꞌoh whe ꞌuyoon ooꞌat oozih sinda.” 5Herod yutuzilhghelh hukwaꞌ ninzun. ꞋEt hoontsꞌi dunene John ꞌen nus hooꞌen-un ꞌuntꞌoh huninzun, ꞌet huwa Herod bube nilhjoot.
6ꞋEt ꞌilhoh dzin Herod whuzdli dzin ꞌuhoontꞌoh ꞋEt Herodia ootseꞌ ꞌen bubut nídai. Herod ooba hoonzoo. 7ꞋEt ꞌaho yutsꞌu náhizya whe ꞌuyulhni, “Ndet stsꞌo hukwaꞌ ninzun-un stsꞌo hukwa dini.” 8Nyoon tsꞌeke ooloo, “Herod oodilhkut John dune too be ꞌulhꞌen-un ootsi lusyet be stlꞌa inkaih dóniꞌ,” yulhni. 9ꞋEt huwun lerwe oodzi únduda suliꞌ. ꞋEt yuzih dilhtsꞌine, ꞌenne tsꞌiyawh hidántsꞌo, ꞌet whe tsꞌekeyaz dughuni yutlꞌa idanꞌai. Whuz unꞌa ꞌuhuyooleh ubúlhni, ꞌinka nduhínla. 10ꞋEt ꞌadinꞌai tsꞌe whuz whe yálhꞌaꞌ, ꞌinkꞌez ꞌadinlane ghunline, John hitsi kꞌúnintsel. 11ꞋInkꞌez lusyet be whusahúyankai, ꞌinkꞌez tsꞌekeyaz tlꞌa húyankai. ꞋInkꞌez duloo yughi nínkai. 12Yugha hodulꞌehne, ꞌenne whusahandil. Hizi huyilhchoot ꞌinkꞌez ꞌahúyalhti. ꞋEt hukwꞌelhꞌaz Jesus tsꞌu whehandil ꞌinkꞌez hidániꞌ.
5,000ne dunene Jesus huyooꞌalh-i bugha nínꞌai
13Jesus whulh ꞌudantsꞌo whe buchꞌa násja ꞌinkꞌez tsꞌi beinya ꞌinkꞌez disoh tsꞌe whinínki. ꞋEt hoontsꞌi lhane dune tꞌehonanzin ibulh ntsꞌe nehúninki tsꞌe, whuz lhelhdun keyoh whutꞌenne hiyuwhenándil. 14Jesus tsꞌi bé hainya whe dune huldlai kꞌet ꞌaw ꞌuzdooniꞌ ꞌaitꞌoh, ꞌenne butilhꞌen. Bugha téꞌninzin ꞌinkꞌez ndudane cha tsꞌiyawh soo naꞌbinla.
15ꞋAwet hulhgha ꞌuhoontꞌoh. Yugha hodulꞌehne highu nindil ꞌinkꞌez huyulhni, “Njan disoh ꞌuhoontꞌoh. ꞋAwet yoo ꞌun hoozulh. Ndunne ꞌutsꞌun keyoh tsꞌe nabalhꞌalh, whuz la huyaꞌalh-i hoket.”
16ꞋEt hoontsꞌi Jesus ndubulhni, “ꞋAw nahutoodilh huba lheꞌhóotꞌoh. Nohni bugha nanahtꞌaih.”
17ꞋEt ꞌuhuyulhni, “Lhes kwulaiꞌ ꞌinkꞌez lho nanki, ꞌaw ꞌi za tsꞌutꞌi.”
18ꞋEt ꞌubulhni, “Diz stsꞌóhlelh!” 19ꞋIlhunaoosdilne, tlꞌoyaz kꞌut natlꞌa hudooltsꞌih ubúlhni. Kwulaiꞌ lhes ꞌinkꞌez nanki lho cha, ꞌi hitlꞌa húyanla whe ndo whúnalhꞌen, musi ni whe tenadidli. Lhes taidanyuz ꞌinkꞌez lho cha ꞌet ndiyinla ꞌinkꞌez yugha hodulꞌehne butlꞌa yánla, ꞌilhozdilne bugha húyoꞌalh ha. 20Tsꞌiyawh ꞌuhanꞌal ꞌinkꞌez ꞌuhunisdai. Chꞌutízkat-i tsꞌiyawh nahuyalhdzoo whe whunizyai ꞌon ꞌat nanki chalhyal dizbun. 21ꞋEt dunene, ꞌankwꞌus 5,000ne ꞌuhanꞌal, tsꞌoodunne ꞌinkꞌez tsꞌekoo tubulh.
Jesus too kꞌut nuya
22ꞋAho Jesus yugha hodulꞌehne tsꞌi bez whe nábalhꞌaꞌ whe, “Stso nyan ꞌahkelh,” ꞌubulhni. ꞋInkꞌez ꞌilhunaoosdilne, dukeyoh tsꞌe whe nábalhꞌaꞌ. 23Ndunne whe nábalhꞌaꞌ whe didutchꞌoh ndo dzulh kꞌuz whinya tenadutidli ha. Dichꞌoh ꞌet bé nadalhghel. 24ꞋEt ꞌawet tsꞌi bun kꞌut taniz ꞌoh whuya ukwus nilhtsꞌi tube búdudiztsꞌi, ꞌantsꞌi lhelhtsꞌú hudildus.
25ꞋAwet bundadaꞌ yutilhkai whe Jesus too kꞌut butsꞌu tizya. 26Khuntsul yugha hodulꞌehne hitilhꞌen whe hunílhjoot, “Dune tsin ꞌutꞌen!” hutni ꞌinkꞌez tsoya whe húnilhjoot.
27ꞋAho Jesus butsꞌu yatilhduk, “Nohdzi hóte! Si ꞌustꞌen! Whenulhjut íloh!”
28Peter yoodulhkut, “SMoodihti ꞌalha nyun ꞌintꞌen de, too kꞌut ntsꞌu toosyaꞌ-un stlꞌa hóonꞌaih.”
29ꞋEt ꞌuyulhni, “ꞋAnih!” Peter tsꞌi be hainya ꞌinkꞌez Jesus too kꞌut yutsꞌu tizya.
30ꞋEt nyo whunilhꞌen whe nilhtsi tube ulhtus ꞌinkꞌez whenilhjoot ꞌinkꞌez yo útizdlat whe, “SMoodihti, sla ꞌineh!” dija.
31ꞋAho Jesus yula súgooh whe ꞌuyulhni, “ꞋAw soo ꞌultsuk-i be ꞌalha ꞌuhoontꞌoh-i lhintꞌih. Di ha mba nawh ꞌuhoontꞌoh?”
32Tsꞌi be náhitꞌaz whe ꞌaho nilhtsꞌi kꞌoh ꞌúja. 33Tsꞌi bet dilhtsꞌine, tsꞌiyawh hibut nachánilya ꞌinkꞌez ꞌuhuyulhni, “ꞋAlhaꞌ nyun Yakꞌusda ooYeꞌ ꞌintꞌoh!”
Gennesaret whutꞌenne undudáne Jesus soo naꞌbulhꞌen
34Nyan Gennesaret tsꞌe yahuzki. 35ꞋEt keyoh whutꞌenne Jesus nahuyóolhtsꞌit whe lhtunuhúnihustꞌai. Tsꞌiyawh ndudane hitsꞌú boohoozdla. 36“Nyunaih naintsꞌuz-i ꞌantsꞌi yus tsꞌe ootꞌá tsꞌonalh,” huyulhni. Mbene yutꞌaiznaine, tsꞌiyawh soo náꞌhuja.
Actualmente seleccionado:
Matthew 14: crx
Destacar
Copiar
Comparar
Compartir
¿Quieres tener guardados todos tus destacados en todos tus dispositivos? Regístrate o inicia sesión
© 2019, Wycliffe Bible Translators, Inc. All rights reserved.