رَوْمَا 12
12
العِبادة الواجْبة
1يَا أَخْوَانِي، نِوَصِّيكُو بِسَبَبْ رَحْمَةْ اللّٰهْ اللِّقِيتُوهَا، أَيِّ وَاحِدْ مِنْكُو يِقَدِّمْ جِسْمَهْ لِلّٰهْ ضَحِيَّةْ حَيَّةْ وَ مُقَدَّسَةْ الْاللّٰهْ يَرْضَى بَيْهَا. وَ دِي هِي عِبَادِتْكُو الْوَاجْبَةْ. 2آبَوْا مَا تِتَابُعُوا فِكِرْ نَاسْ الدُّنْيَا لَاكِنْ خَلِّي اللّٰهْ يِغَيِّرْكُو وَ يَنْطِيكُو عَقُلْ جَدِيدْ الْبَيَّهْ تَقْدَرَوْا تِمَيُّزُوا الشَّيّءْ الْاللّٰهْ يِدَوْرَهْ وَ تَعَرْفُوا الشَّيّءْ الْعَدِيلْ وَ الشَّيّءْ الْاللّٰهْ يَرْضَى بَيَّهْ وَ الشَّيّءْ التَّمَامْ.
3وَ بِالنِّعْمَةْ الْاللّٰهْ أَنْطَاهَا لَيِّ، نِوَصِّي أَيِّ وَاحِدْ مِنْكُو مَا يِسْتَكْبَرْ. خَلِّي أَيِّ وَاحِدْ مَا يِنْغَشَّ لَاكِنْ يِشِيفْ نَفْسَهْ حَسَبْ قُدْرَةْ الْإِيمَانْ الْاللّٰهْ أَنْطَاهْ لَيَّهْ. 4شِيفُوا، أَيِّ وَاحِدْ مِنِّنَا عِنْدَهْ فِي جِسْمَهْ أَعْضَاءْ كَتِيرِينْ وَ كُلَّ عُضُو مَا يِسَوِّي نَفْس الْخِدْمَةْ. 5بِمِثِلْ دَا، أَنِحْنَ نَاسْ كَتِيرِينْ لَاكِنْ بِقِينَا مِثِلْ جِسِمْ وَاحِدْ فِي الْمَسِيحْ. وَ أَيِّ وَاحِدْ مِنِّنَا، هُو عُضُو فِي الْجِسِمْ دَا وَ بِقِي أَخُو لِلْآخَرِينْ كُلُّهُمْ.
6عِنْدِنَا عَطَايَا شِقْ شِقْ حَسَبْ نِعْمَةْ اللّٰهْ. وَ كَنْ اللّٰهْ أَنْطَى نَادُمْ قُدْرَةْ لِيِحَجِّي كَلَامْ نَازِلْ مِنْ اللّٰهْ، خَلِّي يِحَجِّي حَسَبْ الْإِيمَانْ. 7وَ كَنْ اللّٰهْ أَنْطَى نَادُمْ قُدْرَةْ لِيَخْدِمْ فِي أُسْط الْأَخْوَانْ، خَلِّي يَخْدِمْ. وَ كَنْ اللّٰهْ أَنْطَى نَادُمْ قُدْرَةْ لِيِعَلِّمْ النَّاسْ، خَلِّي يِعَلِّمْهُمْ. 8وَ كَنْ اللّٰهْ أَنْطَى نَادُمْ قُدْرَةْ لِيِشَجِّعْ الْأَخْوَانْ، خَلِّي يِشَجِّعْهُمْ. وَ كَنْ اللّٰهْ أَنْطَى نَادُمْ قُدْرَةْ لِيَنْطِي، خَلِّي يَنْطِي بِجُودْ. وَ كَنْ اللّٰهْ أَنْطَى نَادُمْ قُدْرَةْ لِيُقُودْ أَخْوَانَهْ، خَلِّي يُخُطّ بَالَهْ وَ يُقُودْهُمْ عَدِيلْ. وَ كَنْ اللّٰهْ أَنْطَى نَادُمْ قُدْرَةْ لِيِحِنّ فِي النَّاسْ، خَلِّي يِحِنّ فَوْقهُمْ بِفَرَحْ.
9حِبُّوا أَيِّ نَادُمْ بِمَحَبَّةْ صَحِيحَةْ. أَكْرَهَوْا الشَّرّ مَرَّةْ وَاحِدْ وَ أَكُرْبُوا الْخَيْر قَوِي. 10أَرَّايَدَوْا أَمْبَيْنَاتْكُو مِثِلْ أَخْوَانْ وَ خَلِّي أَيِّ وَاحِدْ يِشِيلْ نِيَّةْ أَشَانْ يِحِبّ أَخُوهْ بِإِحْتِرَامْ. 11تَابُعُوا رَبِّنَا بِنِيَّةْ وَاحِدَةْ وَ بَلَا كَسَلْ. أَنْكَرْبُوا فِي خِدْمَةْ الرَّبّ. 12أَفْرَحَوْا أَشَانْ عِنْدُكُو عَشَمْ فِي رَبِّنَا. أَصْبُرُوا فِي التَّعَبْ وَ صَلُّوا دَايْماً بَلَا كَسَلْ. 13سَاعُدُوا الصَّالِحِينْ الْمُحْتَاجِينْ وَ ضَيُّفُوا بِفَرَحْ الضِّيفَانْ الْيَجُوكُو.
14بَارُكُوا النَّاسْ الْيِتَعُّبُوكُو. أَيْوَى، بَارُكُوهُمْ وَ مَا تَلْعَنَوْهُمْ. 15أَفْرَحَوْا مَعَ الْفَرْحَانِينْ وَ أَحْزَنَوْا مَعَ الْحَزْنَانِينْ. 16أَسْتَفُقُوا أَمْبَيْنَاتْكُو وَ خَلِّي أَيِّ وَاحِدْ مَا يَجْعَلْ نَفْسَهْ كَبِيرْ لَاكِنْ خَلِّي يَجْعَلْ نَفْسَهْ صَغَيَّرْ. مَا تِسَوُّوا نُفُوسْكُو عِنْدُكُو عِرْفَةْ كَتِيرَةْ.
17كَنْ نَادُمْ سَوَّى فَوْقكُو شَيّءْ فَسِلْ، مَا تِسَوُّوا فَوْقَهْ شَيّءْ فَسِلْ. فَكُّرُوا وَ سَوُّوا الشَّيّءْ الْكُلَّ النَّاسْ يَرْضَوْا بَيَّهْ. 18جَاهُدُوا بِأَيِّ دَلِيلْ أَشَانْ تِعِيشُوا بِسَلَامْ مَعَ كُلَّ النَّاسْ.
19يَا الْمَحْبُوبِينْ، مَا تِشِيلُوا التَّارْ. خَلُّوا غَضَبْ اللّٰهْ يِشِيلْ لَيْكُو التَّارْ أَشَانْ مَكْتُوبْ فِي الْكِتَابْ: <التَّارْ هَنَايِ. أَنَا بَسْ النِّشِيلَهْ.>#12:19 الكلام دا تلقوه في تَثْنِية 32:35. دَا بَسْ كَلَامْ اللّٰهْ. 20أَخَيْر كَنْ تِتَابُعُوا الْكَلَامْ الْبُقُولْ: <كَنْ عَدُوكْ جِيعَانْ، أَنْطِيهْ يَاكُلْ. وَ كَنْ هُو عَطْشَانْ، أَنْطِيهْ يَشْرَبْ. كَنْ تِسَوِّي مِثِلْ دَا، الْعَيْب يَكُرْبَهْ وَ يَبْقَى مِثِلْ جَمُرْ الصَّبَّوْه فِي رَاسَهْ.>#12:20 الكلام دا تلقوه في أمْثال 25:21-22. 21مَا تِخَلُّوا الشَّرّ يِنَّصِرْ فَوْقكُو لَاكِنْ أَنَّصُرُوا فِي الشَّرّ بِالْخَيْر.
Actualmente seleccionado:
رَوْمَا 12: ع.د.ت19
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
La Bible en arabe tchadien © Alliance biblique du Tchad, 2019