يُونُس 1
1
يُونُس يدَوْر يجْري بعيد من اللّه
1يَوْم وَاحِدْ، اللّٰهْ حَجَّى لِيُونُسْ وِلَيْد أَمِتَّايْ وَ قَالْ: 2«قُمّ أَمْشِي فِي نِينَوَى، الْمَدِينَةْ الْكَبِيرَةْ دِي. وَ خَبِّرْ نَاسْ الْمَدِينَةْ كَدَرْ الْفَسَالَةْ الْهُمَّنْ قَاعِدِينْ يِسَوُّوهَا دِي، أَنَا شِفْتَهَا. خَلِّي يِنْقَرْعُوا!» 3خَلَاصْ، يُونُسْ قَمَّ عَرَّدْ وَ أَبَى مَا يِشِيلْ دَرِبْ هَنَا نِينَوَى لَاكِنْ شَالْ دَرِبْ هَنَا حِلَّةْ تَرْشِيشْ أَشَانْ يِدَوْر يَجْرِي مِنْ اللّٰهْ. وَ وِصِلْ فِي حِلَّةْ يَافَا فِي خَشُمْ الْبَحَرْ الْأَبْيَضْ الْمُتَوَسِّطْ وَ لِقِي سَفِينَةْ مَاشَةْ تَرْشِيشْ. خَلَاصْ كَفَّى أُجُرْتَهْ وَ رِكِبْ مَعَ خَدَّامِينْ السَّفِينَةْ لِيَمْشِي تَرْشِيشْ، بَعِيدْ مِنْ اللّٰهْ.
4وَ وَكِتْ مَاشِينْ فِي الْبَحَرْ دَا، اللّٰهْ رَسَّلْ رِيحْ شَدِيدَةْ وَ شَلَّالْ شَدِيدْ قَمَّ لَحَدِّي يِدَوْر يِكَسِّرْ السَّفِينَةْ. 5وَ خَدَّامِينْ السَّفِينَةْ خَافَوْا بِلْحَيْن وَ أَيِّ وَاحِدْ مِنْهُمْ قَمَّ يَصْرَخْ لِإِلٰـهَهْ أَشَانْ يِنَجِّيهُمْ. وَ دَفَّقَوْا الْخُمَامْ الْفِي السَّفِينَةْ فِي الْبَحَرْ أَشَانْ تَبْقَى خَفِيفَةْ. وَ يُونُسْ كَمَانْ دَلَّى تِحِتْ فِي لُبّ السَّفِينَةْ رَقَدْ وَ نَايِمْ نَوْم شَدِيدْ. 6وَ مَسْؤُولْ السَّفِينَةْ جَاءْ قَالْ لَيَّهْ: «هَايْ دَا! مَالَكْ نَايِمْ؟ قُمّ أَسْأَلْ إِلٰـهَكْ! أَكُونْ يِفَكِّرْ فَوْقنَا وَ يِنَجِّينَا مِنْ الْمَوْت.»
7وَ خَدَّامِينْ السَّفِينَةْ قَالَوْا أَمْبَيْنَاتْهُمْ: «تَعَالُوا نِسَوُّوا أَمْ عِيَيْدَاتْ أَشَانْ نَعَرْفُوا يَاتُو الْجَابْ لَيْنَا الْمَصِيبَةْ دِي.» خَلَاصْ سَوَّوْا أَمْ عِيَيْدَاتْ وَ وَقَعْ فِي يُونُسْ. 8وَ فِي الْبَكَانْ دَا، هُمَّنْ قَالَوْا لَيَّهْ: «أَوْرِينَا شُنُو الْجَابْ لَيْنَا الْمَصِيبَةْ دِي. إِنْتَ جَايِ مِنْ وَيْن؟ وَ جِيتْ تِسَوِّي شُنُو؟ وَ بَلَدَكْ وَيْن وَ نَفَرَكْ شُنُو؟» 9وَ يُونُسْ رَدَّ لَيْهُمْ وَ قَالْ: «أَنَا عِبْرَانِي وَ نَعَبُدْ اللّٰهْ رَبّ السَّمَاوَاتْ، الْخَلَقْ الْأَرْض وَ الْبَحَرْ. 10وَ أَنَا مُعَرِّدْ مِنْ اللّٰهْ.» وَ وَكِتْ هُمَّنْ سِمْعَوْا كَلَامَهْ دَا، خَافَوْا خَوْف شَدِيدْ. وَ قَالَوْا لَيَّهْ: «مَالَا سَوَّيْت شَيّءْ مِثِلْ دَا؟»
11وَ الشَّلَّالْ قَاعِدْ يَطْلَعْ بِزِيَادَةْ. وَ قَالَوْا لَيَّهْ: «هَسَّعْ دَا، نِسَوُّوا لَيْك شُنُو أَشَانْ الشَّلَّالْ يَقِيفْ لَيْنَا؟» 12وَ يُونُسْ قَالْ لَيْهُمْ: «شِيلُونِي وَ أَزْقُلُونِي فِي الْبَحَرْ وَ الشَّلَّالْ يَقِيفْ لَيْكُو. أَشَانْ أَنَا نَعَرِفْ كَدَرْ الرِّيحْ الشَّدِيدَةْ دِي جَاتْ فِي شَانِي أَنَا بَسْ.» 13وَ لَاكِنْ خَدَّامِينْ السَّفِينَةْ حَاوَلَوْا يِقَبُّلُوا السَّفِينَةْ فِي خَشُمْ الْبَحَرْ. وَ مَا قِدْرَوْا أَشَانْ الشَّلَّالْ قَاعِدْ يَطْلَعْ بِزِيَادَةْ.
14وَ قَمَّوْا يَشْحَدَوْا اللّٰهْ وَ قَالَوْا: «يَا اللّٰهْ! مَا تَهْلِكْنَا فِي شَانْ الرَّاجِلْ دَا وَ مَا تُخُطّ فَوْقنَا دِمَّةْ بَرِي. يَا اللّٰهْ! إِنْتَ سَوَّيْت الشَّيّءْ التِّدَوْرَهْ.» 15خَلَاصْ، شَالَوْا يُونُسْ وَ زَقَلَوْه فِي الْبَحَرْ وَ طَوَّالِي الشَّلَّالْ وَقَفْ. 16وَ الْخَدَّامِينْ خَافَوْا خَوْف شَدِيدْ مِنْ اللّٰهْ وَ قَدَّمَوْا لَيَّهْ ضَحِيَّةْ وَ عَاهَدَوْا اللّٰهْ أَشَانْ يَعَبُدُوهْ بِزِيَادَةْ.
17 # 1:17 الفصُل 1 آية 17 بالعربي هو الفصُل 2 آية 1 بالفرنساوي. لاكن ما زاد و لا نقص شيّء إلّا النِمر بس ألبدّلوا. وَ فِي الْبَكَانْ دَا، اللّٰهْ رَسَّلْ حُوتَايْ كَبِيرَةْ زَرَطَتْ يُونُسْ. وَ خَلَاصْ، يُونُسْ قَعَدْ فِي بَطُنْ الْحُوتَايْ تَلَاتَةْ يَوْم وَ تَلَاتَةْ لَيْلَةْ.
Actualmente seleccionado:
يُونُس 1: ع.د.ت19
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
La Bible en arabe tchadien © Alliance biblique du Tchad, 2019