Afyilibyiyi 1
1
1Bwulus n Timwoti, Kirisiti Yeisu atnutnuyi.
Kwo lo da Shekwoyi aza agyigyiyi nu vnyanya fyi n Kirisiti Yeisu n ɓa fyi n Fyilibyi nyi, ɓədo n atukwoda-awyednayi n adikin.
2Shebmyashi n bwugbafui ɓa ɓe da fye, n ɓa kwnu n Shekwoyi əyi Dada aba ɓədo n Dagayi Yeisu Kirisitii.
Amisa n aduwazhnii.
3Mi sa əmi Shekwoyi ami lo nsahosahoi n ma pa əfye əɓo ncei. 4Dna n əmi aduwazhni ga fye vnyanya mi zhni ɓa n agbmadai nu ciici 5ntu n əfye ɓwadodna ɓo ń nabagyi manai tnutnu, ənya n kwo ɓə laka n nyipyei kpmisnui kwoi ɓe nsaiye, 6mi n agwui dnakalá lo ntu ɓəye ɓo, nge əwo ń wo ɓə ya tnutnu manaizhni fyi n əfye nyi, wo ɓa gwodu n kwoi lo əkwo zozo, kwoi nya Kirisiti Yeisu nyipyei.
7Kwo bmyalo á wo mi nlonu ntu əfye ɓo vnyanya, shikwonyi, mi ǹ əfye əɓoi dnalo n əmi ədu, kwo a mii fyiagbma nu, kwo mii snukwnú nu ntuge ma gbmi nabagyi manai əɓo, əfye vnyanya n əɓwai kwnudna lo n mii n Shekwoyi shebmyashi. 8Shekwoyi ɓa gbmi mi əɓo shi awyekwo mi lo ntu əfye ɓo vnyanya n Kirisiti Yeisu yeyei.
9Njesnu əmi aduwazhni nu nyi: nge əfye yeye ɓa myi kwa mwamwaɓe dna n ɓəyekpe, ɓədo n awyega loloyii. 10Nabai n fye ɓa myi fya kpe əɓo ye n kwo gnabmya jesnu fya myi fya kwu zhi n tnadodnai n tnaɓətui kwa nya Kirisiti nyipyei, 11n nunui n gyigyiga ɓəfyecezhni nyai, n kwo ɓə dna n Yeisu Kirisiti nu, kwa ɓe Shekwoyi n latui ɓədo n cicii.
Bwulus agbmafyi zhni nabagyi manai kwoi gyiabye
12Nsaiye əmi azaje azanugbai n anyikwozai, mi ye fya kpe nge əɓo n kwo ɓə ɓwa mi nyi, ɓəhnihnii kwo la ɓe n bmazhnii n mwa ntu n nabagyi manai abyegyi ɓo. 13Ntucenu, agalukwo abagwuyi vnyanya ɓa kwu əkwo əɓo kpe ɓədo n azai n ɓa ce nyi, nge mi dna n agbma ntu Kirisiti ɓo nu. 14Njesnu ntu n əmi agbma ɓo, əmi azaje azanugbai n anyikwozai ɓa kwu agwumyizhi ɓwa n Dagayi ɓai gna kwnukwnuya ɓai zhni waazi nabagyi manai nya n tna ədna.
15Kwo zhni gaiciya nu nge, azaho zhni Kirisiti waazi ntu nuwnu ɓo nu ɓədo n shewoi, ama azaje zhni waazi kwoi kwnu n bwugba manai nu. 16Okwu kpmaknayi zhni kwo dna n yeye nu, ɓai kpe nge, a n mii dna n ya ntu n okwnusnu ɓo nu ga nabagyi manai. 17Okwu kpmisnuyi zhni Kirisiti waazi ntu n gnahohni bwugbaɓəye ɓo nu, toge dna n gaiciya m, ɓai zhninubwo nge, ɓa ɓá ɓe mi azhnìgye əsa n mi dnalo ncei n agbma. 18Ama kwo n knyiɓei nu lo a? Əɓo kpokəloi əkwo nu nge, kwo dna n knyi zokwoi nù a, kwo kwoi gbmi n bwugba kwocedna nya nu, kwo kwoi gbmi n bwugba gaiciya nya nu, a kwu Kirisiti waazizhni. Njesnu ntu dəye ɓo, mi nya agbmada lo. Əə, mi ɓa gyiabye n agbmada nyai, 19ntuge mi kpəlo nge ntu əfye aduwazhni ɓo nu n Yeisu Kirisiti Zafnui n Shekwoyi ga nyi, əɓo n kwa ɓwa mi nyi, kwo ɓaa zè əmi gnyignyi nya. 20Mi pmignyi lo n awyeyai njesnu mi n awyetui lo nge ɓəho taa zhni vnyinkwo kwoi wo mi m, ama mi ɓə ɓwa bwugbakala n kwnuce nabai nsaiye ngye she kwo shnisnu ciici nyi, n Kirisiti ɓe ɓwa latu n əmi nayi kwo gnyi n wyewyeyii kwo dna n əfyí. 21Ntuge n əmi aba, anyìgyi zhni Kirisiti nu, njesnu n ma fyi gyiba nu. 22Ngye mi ɓa gwodu ma gyianyì nu dna n nayi, kwo ɓaa zhni tnutnu gyigyiga nya nu n əmi aba. Dudulonu, mi ɓa knyi knyidei nu a? Mi ta kpəlo m! 23Mi kwu jeje dna n aɓo ye ngwnu-aba: A wo mi lo ngye mi laka ma lo mii kwnusnu n Kirisitii, ntuge əkwo nu dulo shaasha; 24ama kwo n apmai gnasnu lo n əfye aba mi ye la dna n nayi. 25Shi kwo la kadna n əmi ədu nyi, mi kpəlo nge mi ɓaa dna njesnu mi ɓə ye la kwnusnu n fyei vnyanya, ntu n əfye abyegyi ɓo ɓədo n agbmadai fyi n gaiciyaga. 26Nabai nge əsa n mi yee je kwnusnu lo n fyei, əfye gbegyi dna n Kirisiti Yeisu kwo mwamwaɓe ntu əmi ɓo.
Wyewyeyi n kwo kwnucelo n nabagyi manaii
27Kwo knyiɓei nu ɓa zhni a, fye gyianyì fyi n zokwo n kwo kwnucelo n nabagyi manai Kirisiti nyai. Kwo n ma ɓe nu ma gye fye, kwo n ma ɓwa əfye əɓo wowo nu n tagnyi, mi ɓə kwu kpe nge fye myizhi lo n agnyi dna n Zafnu gbmanyi n əfyehnii kwukwui n kwnusnu n ajei ngye zaknayi ntu n gaiciyaga ɓo n nabagyi manai 28to azai fyi fye ədna n zokwo dəhodəhoi n ɓa gnyiapaapa n əfyei nyi m. Dəye zhni əznù nu n əɓa aba nge a ɓə kwu ɓa zhniagbma, ama nge fye ɓə kwu pwo; ama Shekwoyi nu zhni kwo. 29Ntuge a la kwo ga əfye dna n Kirisiti apitaɓwi, nge fye to ɓwa gaiciya nu gà ga n əwo m, ama fye gyeazhnì ce ntu n əwo ɓo. 30Shikwonyi fye fyilo n gnyagwnugnya gbmanyigbmanyi nu n fye ɓə kwu gye mi mii tusnunu n kwoi nyi, jesnu nsaiye fye kwu wo nge mi yee dna lo n kwo.
Actualmente seleccionado:
Afyilibyiyi 1: GNB
Destacar
Copiar
Comparar
Compartir
¿Quieres tener guardados todos tus destacados en todos tus dispositivos? Regístrate o inicia sesión
Gbagyi Nyizeyenya Baibwulu: Shekwoyi Ɓədagbma™, Ɓəgbeshì Woiwoyi
© 1997, 2025 Biblica, Inc.
Apmazhni n gbegai nu. Ɓəznu vnyanya wnafyi lo n anyìvnyanya.
Gbagyi Contemporary Bible™, New Testament
Copyright © 1997, 2025 by Biblica, Inc.
Used with permission. All rights reserved worldwide.