Jemyis 4
4
Fye kwu əfyehni ga fyi n Shekwoyi akwnu
1Aknyiyi nu ɓe n ogwusnu n anyàwui fyi n əfye atasni a? Ɓa ta kwnuɓe ń əfye aɓəpwawo nu n ɓa gna fye gnagna fyi n əfye əmi nyi m? 2Anya wo fye əpwa lo, ama fye ta ɓwa lo m, ntulonu fya wu aza. Aza anya wo fye əpwa lo, ama fye ta ɓwa anya lo n fye ncei pma nyi m, ntucenu fya wuanya fyei snugwu. Fye ta ɓwa anya lo m, ntuge fye ta nya Shekwoyi əɓo lo m. 3She fye nyaɓo, to fya ɓwa m, ntuge fye nyaɓo n aɓəmwi nukwoii nu, nabai fya wu ɓa kpe n əfye anayi agbmada.
4Əfye anagbáizhniyi, fye ta kpəlo nge nugwnudo gyi n anyìi, kwo zhni nuɓai nu n Shekwoyii m? Ntucenu, zahozahoyi n wa knyi wa gyi nugwnudo n anyìi, wo la ze Shekwoyi nuwnui. 5Kwo fye gye nge ɓəgbəloi nu ń Nyakagyigyiyi ncei da nge wo kna əwo zafnu n əpwawo shewoi n wo ncei dna n əyi nyi? 6Ama Shekwoyi ga yi əwo shebmyashi n mwa. Cenuzhni Nyakagyigyiyi kwoi gna:
“Shekwoyi gnyiapaapa n tukwomwayii
ama wo wu atukwogbayi bmyashi.”
7Nlonu, fye kwu əfyehni ga fyi n Shekwoyi akwnu. Fye na shetam aɓo, njesnu wo ɓaa kpesiya n əfye aba. 8Fye yeɓe vyivyiwyi da Shekwoyi jesnu wo ɓa yeɓe vyivyiwyi da fye. Fye na əfye aɓwa, əfye aleifyizhniyi, jesnu əfye abwugba ngwnu-aba da fye la əfye adu pmya ɓa kwu zè atnaɓətuyi. 9Fye wnubwugba, fye zhni bwugbazhii, fye ciɓwi fyei ceawyi. Fye la əfye asnaɓwugyi shnado ɓa kwu zè bwugbawnu jesnu əfye agbmada ɓa kwu zè bwugbazhii. 10Fye kwu əfyehni tukwo gbà n Shekwoyi abye jesnu wo ɓa kwu fye kala zhi n agnyi.
11Əmiaje azanugbai n amapwii, yi to wnu aje əye ya m. Əza n wa daɓo nukwoi tu n əwodo tukwo, zanugbai kwo əwo mapwi, kwo wa da ɓa owa, wo kwu apaapagnyi n owa jesnu woi da owa n owai. She ho da owa n owai, ho ta shi kwo əɓwa nu m, ama ho sasetu n owada nu n kwoi. 12Owagayi ɓwasnu lo gbmanyi nu n Owadayii; əwo n wo ɓa myi wa gnyi jesnu wa zhniagbma. Ama əho, ho zhni nyika nu n ho ɓa da əho kwnuzhiyi owa a?
Gbegyi ntu ńsu ɓo
13Nsaiye knatnubwa, əfye n fye gna, “Nnaiye kwo ńsu yi ɓəi lo əzhi dəye kwo əzhi dəyi, yii ɓwa əye ɓwugyi fyi n ɓo, yii zeaɓwa ya ɓwa agyiwye.” 14Ntu knyiɓei a, kwo əhohni ho ta kpe əɓo əye lo n kwo ɓə zhni ńsu m. Əho wyewyeyi zhni knyiyi nu a? Əho wyewyeyi wulo ngye ɓwugye nu n kwo kpeyaɓe əsa fyewyi jesnu kwaa kpma nyi. 15N əkwoɓwi ho gwo ha gna, “Ngye kwo zhni Dagayi ɓəye nu, yi ɓa gyianyì jesnu yii zhni dəye kwo dəyi.” 16Ngye shi kwo gnyi nyi, ho gbma dna n əho tukwognanakwo nu. Gbegyi ye pya vnyanya kwo zhni ɓənukwoi nu. 17Nlonu, ngye əza lo n wo kpe əɓomanai ye n wo gwo wa zhni, to wa zhni kwo m, kwo zhni leifyi nu n əwo aba.
Actualmente seleccionado:
Jemyis 4: GNB
Destacar
Copiar
Comparar
Compartir
¿Quieres tener guardados todos tus destacados en todos tus dispositivos? Regístrate o inicia sesión
Gbagyi Nyizeyenya Baibwulu: Shekwoyi Ɓədagbma™, Ɓəgbeshì Woiwoyi
© 1997, 2025 Biblica, Inc.
Apmazhni n gbegai nu. Ɓəznu vnyanya wnafyi lo n anyìvnyanya.
Gbagyi Contemporary Bible™, New Testament
Copyright © 1997, 2025 by Biblica, Inc.
Used with permission. All rights reserved worldwide.