Akwolosiyi 4
4
1Adagayi, fye ga əfye afyenu anya n ɓa bmya, ntnagyifyi, ntuge əfyehni ce, fye kpəlo nge fye n Dagayii dnalo ń əshemi.
Agbega aje
2Fye kwu əfyehni ga fyi n aduwazhni ciici, fye kwu zhigwu jesnu fyei sa Shekwoyi ami. 3Njesnu fye zhniaduwa ntu əyi ɓo ce, nabai n Shekwoyi ɓa gwú abwokwnumi ya ntu n əyi waazi ɓo, nabai ya myi ya wú asigyi Kirisiti nya ń mi dna n agbmà ntu əkwo ɓo nyi. 4Fye zhniaduwa ń mi ɓa myi ma wú kwo n səsəiya, shi kwo gwo ma wú. 5Fye gyianyì ń cecei əsa n fye zhni aɓo n abmyida aba; əsa dəhodəhoi n fya ɓwa, fye zhniapma n kwoi n nunui. 6Ciici fye fa əfye azata ɓa kwu nu ǹ shebmyashii, n dadai, nabai n fye ɓa kpé shi fye ɓa dna zahozahoyi ɓəgbe.
Gnaɓyi kpmasnui
7Ticikwus wo ɓa wu fye nabagyi vnyanya ntu əmi ɓo. Wo zhni əyido yeyei nu, tnutnuyi gbenui jesnu n tnutnu kwnuzhniyii dna n Dagayi. 8Mi tnu n əwoi nu n əfye aba, n shnisnusnu, nabai fya kpe shi aɓo wulo n əyi aba ń ya, jesnu n wo ɓa kwu əfye adu myizhi. 9Wo ɓe lo n kwnusnu n Onisimwusii əyido yeyeyi n gbenuyii, n wo gbmi n əfye əmi nu nyi. Ɓa ɓə gna fye aɓo vnyanya n ɓa zhni lo ń ya.
10Əmi zhaluda ədo Arisitakwus, wo tnu fye lo n əwo gnaɓyii, ɓədo n Marukwusii ce, Banaba zhalu. (Fye ɓə la agbega gwo ntu n əwo ɓo; n wa ɓe əfye aba, fye gwo wo). 11Yeisu, ń a yi wo nge Justus nyi, əwohni ce tnu fye lo n gnaɓyii. Ayahudiyi nu ɓwasnu nyi, n ɓa zhni əmi atnutnu kwnuzhniyi ntu Shekwoyi əbemi ɓo, jesnu ɓa kwu əɓahni wu nge əmi atnazhniyi nu. 12Epafras, n wo gbmi n əfye aba nu nyi jesnu Kirisiti Yeisu tnutnuyi, wo tnu fye lo n gnaɓyii ce. Wo fyiabwa lo ciici dna n aduwazhni ntu n fye ɓo, nabai fya kwu gnyiagnyi zhi n kalái dna n Shekwoyi ɓəmwi vnyanya, jesnu ǹ akpii-kwokwoi n nunui n agwumyi. 13Mi gbmi əwo əɓo lo nge wo zhni tnutnu lo n kalái ntu fye ɓo, jesnu ntu n aza yi ɓo n Lawudisiya, ɓədo n Hirapwolisii. 14Əyi nugwnudo yeyeyi Luka, likita, ɓədo n Dimasii ɓa ɓyi fye gna lo. 15Fye kwu əmi gnaɓyi ga əmi azaje azanugbai n anyikwozai n ɓa fyi n Lawudisiya nyi, jesnu ga Nimfa, ɓədo n ikilisiyai n kwo dna n əwo pwuwa nyi.
16Shi a ɓə la paka ye ba ga fye, fye ɓə gye ge a la kwo ba ga ikilisiya Alawudisiyi nya ce, əfyehni ce fya ba paka n kwo gbmi ń Lawudisiya nyi.
17Fye gna Akyipwus, “La əwyewna nabai ha kwu tnutnu zozhni n ho la gwo dna n Dagayi nyi.” 18Əmi Bwulus nu na ka gnaɓyi ye n əmihni aɓwai. Fye pá əmi agbma ɓo. Shebmyashi ɓa kwnusnu n fyei.
Actualmente seleccionado:
Akwolosiyi 4: GNB
Destacar
Copiar
Comparar
Compartir
¿Quieres tener guardados todos tus destacados en todos tus dispositivos? Regístrate o inicia sesión
Gbagyi Nyizeyenya Baibwulu: Shekwoyi Ɓədagbma™, Ɓəgbeshì Woiwoyi
© 1997, 2025 Biblica, Inc.
Apmazhni n gbegai nu. Ɓəznu vnyanya wnafyi lo n anyìvnyanya.
Gbagyi Contemporary Bible™, New Testament
Copyright © 1997, 2025 by Biblica, Inc.
Used with permission. All rights reserved worldwide.