GHLƆMÖÖ NƖKPAA 'BƆGƲ 7
7
Gbö 'nɩ -Lagɔgwie nyini
1-Dagwieyi, a 'bhï -ji -Lagɔɔ gböö bhle'ee yɛ, a -ji sɛ naa nɩkpɛ -yɛ -bhla -bhlɩ-ɛ, -Lagɔɔ gbö nyinio, ɔ -yɛ-a 'mö tlɩ ɩ 'nɩɔ-a 'mö nyini 'sɔ. 2-Sɩbha gbö gwanɩ-a nglɔ -ɔ -wʋ-a ghlɩ -bha ɔ 'luwli yawʋ, 'n -mɔ la'a -yɛ -bhla -bhlɩ. 'N 'luwli -yɛ tlɩ-ɛ, gbö la'a -ɩ gwanɩɔ la-a ɔ 'luwli yawʋ 'nɩɔ-a 'mö nyini. 3Ɔ 'luwli -yɛ -bhla -bhlɩ ɔ -yɛ kabönɩkpɛɛ 'nglɔ zʋ-ɔ, gbʋyɩlɩnglɔ wa jio-a laa. 'N ɔ 'luwli -yɛ tlɩ-ɛ, ɔ'ɔ-a 'mö 'ma gbaa gbʋ -gömö -ka. Ɔ -yɛ kabönɩkpɛɛ 'nglɔ zʋ ɔ'ɔ gbʋyɩlɩnglɔ glɩnɩ. 4-Dagwieyi, -sɩbha a 'tlɩɔ 'yɛ-a -Lagɔɔ gböö de, a -yɛ Zezwi 'Klie 'gblʋ 'sɔ 'yɛ -bhlʋ zʋ, Zezwi la'a -ɔ -Lagɔ -sa-a glu, a 'yɛ ɔ -lʋa glɩnɩ, -a 'yɛ -Lagɔɔ 'nglɩ 'mö -lie -li nʋnʋ. 5-Ma ɩ 'mö, la -a -su la-a -bhla -aa -dagwalɩdlɩ, 'jinyloli -ɩ ɛ -sunʋya-a 'wʋ, -ɩ -Lagɔɔ gbö nʋ-a -a 'na-a nʋ -nɩ, 'mɩ gbö vɩvlɛnɩ-ɛ -ma -aa nɩma 'mö, 'n -a nʋ-a -li -ɩ -jiya la-a sɛsabhɛyɩ kwa. 6-Sɩka'a-a 'mö, -Lagɔɔ gbö -ɩɩ -diengwa -a glɩnɩ la-a, -bha ɩ de -tlɩ a 'tlɩɔ-a 'mö -bha. -Lagɔɔ Zuzu mʋ-ʋ -zʋya-a nɩkpa -lili 'wʋɔ yɛ, -aa-a 'mö -sɩka'a gböö -li -sakasɩɛ bhʋ namö 'le -wʋ.
-Lagɔɔ gbö 'nɩ -sa nɩkpɛ 'jinyloli 'mö
7Sa -a ji-a -ɩ la'aa de gba 'nɩ? 'Jinyloli -Lagɔɔ gbö glɩnɩ-a 'nɩ-ɩ? 'Bhëbhë! Ɛ'ɛ -lɛ mɩ-ɩ 'bhë-ë, -Lagɔɔ gböö yɛ n jɩblɩnɩ-a 'jinyloli. -Lagɔɔ gbö nɩ la nʋ naa:
“-Na linɩkpɛɛ -lie 'tʋ 'na -lɩbhamö -nɩ” nʋ-ɔ,
'manɩ wa la -mʋmɔɔ -lie 'tʋ n 'na 'kɩ la jɩblɩnɩ. 8-Ɩ -Lagɔɔ gbö gba-a la'a, -ma ɩ 'mö 'jinyloli 'plɩnɩ-a 'n ɩ ji-e -ma na dlɩ zɔmö 'jinylolie -gɔpö 'bhuoo 'tʋ yena. -Wʋʋ yɛ-a, -Lagɔɔ gbö nɩ la -bhlɩ-ɛ, 'jinylolie gbʋ 'na la nɩkpɛ ghlɩ. 9Na -nɩ de, la -Lagɔɔ gbö 'nɩ la-a -bhla sɛ -wʋ-ɔ, n -tɔnʋ -bhlɩ n -bhlɩ la. -Lagɔɔ gbö ji-a 'mö-a, 'jinyloli 'libhï-a 'bhle 'wʋ, 10sa n 'tlɩɔ -bha -Lagɔ 'ji 'klʋ, sɛ n jɩblɩnɩ -bha. Gba la'a -a kwa la-a 'pʋpʋbhɛyɩ, ma-a zʋ-ɔ 'mö-a na -nɩ de tlɩtlɩbhɛyɩɛ kwakwagba. 11-Wʋʋ yɛ-a, -ma -Lagɔɔ gbö 'mö 'jinyloli 'plɩnɩ-a 'n ɩ ji'i-a yʋlʋ nʋ, 'n ɩ ji'i-a 'lɩbha.
12'Dɛdɛ'ɛ -Lagɔɔ gbö 'wlawla ɩ -wʋ -bha, 'n ɩ slɛnɩ-a 'mö, 'n ɩ -ga-a cɛ. 13-Ɩ -ga-a la 'mö-a cɛ-ɛ, mɩ-ɩ zʋ-a na de tlɩtlɩɛɛ? Ɛ'ɛ -lɛ mɩ-ɩ! -Ma ɩ 'mö, 'jinyloli 'yɛ ɩjɩ tuluaa yɛ ɩ 'plɩnɩ-a -ɩ -ga-a cɛ 'mö, 'n ɩ ji-e -ma na 'pɩ 'mö tlɩtlɩɛ -la. Ɩ 'plɩ-ɛ -sɩbha, -ɩ -Lagɔ nʋ-a nɩkpa nʋ -ma ɩ 'mö sa 'jinyloli -wʋ-a 'tɩ ɩ 'yɛ -sɩbha zɩkpa pönɩɛ yɛ -bha.
Nɩkpɛ 'jinyloli bhɛlɩɔ -bha
14-A -ji sɛ naa -Lagɔɔ gbö -Lagɔswɩ'ɩ ɩ -wʋ -bha. -Ma ɩ 'mö, -amöö -nɩ, nɩkpɛ n glɩnɩ-ɛ na-a, 'n n glɩnɩ-a 'jinylolie gïyi. 15-Wʋʋ yɛ-a, -ɩ n nʋ-a na 'bhë 'nɩ 'nʋɩ 'mö. -Ɩ n 'jɩbha-a n'n nʋɩ, -ɩ nyu'u-a dlɩ yawʋ, 'mɩ n nʋ -bha. 16-Ɩ la'a n'n -lɛ-a 'jɩbha n -kɩɩ nʋ 'lee 'bhë -wʋ oo, -bha n jɩblɩnɩ-a sɛ naa, -Lagɔɔ gbö -lie -li -bha. 17-Bhaa do'o, na 'bhë 'nɩɩ-a 'mö nʋ 'le -wʋ, 'jinyloli -ɩ -wʋ-ɔ -ma na dlɩ zɔmö, mɩ-ɩ -wʋɩ-a nʋ 'le. 18-Wʋʋ yɛ-a, n -ji sɛ -ɩ nanɩ-a 'ji 'nɩ -ma na 'mö -wʋ, -ma na ku zɔmö n sa -bha. N ka -lie -linʋtʋ dlɩ zɔmö 'bhë-ë, n'n-a 'mö bhɛlɩ n 'kɩ nʋ. 19-Lie -li n 'jɩbha-a n'n nʋɩ, 'jinyloli n'n -lɛ-a 'jɩbha 'mɩ n nʋ -bha. 20'N -ɩ n'n -lɛ-a 'jɩbha n -kɩɩ nʋ 'le -wʋ-ɔ, -amöö bhë-ë 'nɩɩ-a 'mö nʋ 'le -wʋ, 'jinyloli -ɩ -wʋ-ɔ -ma na 'mö mɩ-ɩ -wʋɩ-a nʋ 'le.
21Nglinyunoköbhë -a -wʋ-ɔ -bha na 'ji 'klʋ 'kɔmʋʋ ma-a la'a: N -yɛ la nʋ n 'yɛ -lie -li nʋ nʋ-ɔ, 'jinylolie 'nyize -ghlanɩ'ɩ-a 'wʋ, 'mɩ n nʋ -bha. 22-Ma na dlɩ zɔmö, -Lagɔɔ gbö 'mʋna 'wʋ ɩ -bhï -bha. 23'Bhë -ma na nɩma 'mö, gbö -mɩmɩ -wʋ-ɔ -ma na ku zɔmö, mɩ-ɩ -yɛ na dlɩ -ɛ 'jɩbha-a ɛ 'yɛ -lie -li nʋ 'sɔ -wʋ-a gwɩ 'le, 'n ɩ wʋ'ʋ-a 'jinylolie gbö -ɩ -wʋ-ɔ -ma na nɩma 'möö gïyi 'wʋ zʋa 'le. 24Ngazɩ'ɩ na gbʋ -bhï -bha! -Mɔ ji'i bhe na ku -ʋ wʋ'ʋ-a tlɩtlɩbhɛyɩ kwa 'le ngli -saa 'nɩ? 25N bhalɩ -Lagɔ, -ma -aa Nyininyɔ Zezwi 'Kli 'mö! -Ma na dlɩ zɔmö n glɩnɩ -Lagɔɔ gböö gïyi 'bhë-ë, -ma na -dagwalɩdlɩ 'mö 'n n glɩnɩ 'yɛ-a 'jinylolie gïyi.
Actualmente seleccionado:
GHLƆMÖÖ NƖKPAA 'BƆGƲ 7: BNT96
Destacar
Copiar
Comparar
Compartir
¿Quieres tener guardados todos tus destacados en todos tus dispositivos? Regístrate o inicia sesión
Bete New Testament © Bible Society of Côte d'Ivoire 1996