GHLƆMÖÖ NƖKPAA 'BƆGƲ 3
3
-Li -ɩɩ 'mö 'zwiföa zinɩ-a 'wʋ
1Ɩ yɛ 'manɩ 'mö 'zwiföyi zinɩ-ɛ 'mö-a 'wʋ 'nɩ? 'Manɩ zɔmöö 'wʋdɩdɩɛ ka 'mö-a 'ji 'nɩ? 2-Ma -li 'bhuo 'mö 'zwiföyi zinɩ-a 'wʋ. Takado'o, 'zwiföa 'mʋa -Lagɔ palɩ-a ʋ wɛlɩ 'mö. 3-Ma ɩ 'mö, wa gla'aa -mʋmʋa -yɛ 'mɩ wɛlɩ 'wʋ 'bhönɩ-ɛ, ɩ yɛɛ cɛ -Lagɔ ji-e 'mö-a -ɩ ʋ ji la-a nʋɔ 'wʋ 'bhönɩɛ? 4'Bhëbhë! Nɩkpa 'bhuo ji yuo -ka oo, -ɩ -yɛ-a 'dɛdɛɛ 'mɩ -Lagɔ ji-a nʋɔ, sa ɩ 'cɛlɩɔ-ɔ -ma -Lagɔwɛlɩɛ 'bɔgʋ 'mö naa:
“-Lagɔ, wa 'yɛ -ma -na gbagbawɛlɩ 'mö
-na 'möslɛnɔ yɩlɩnɩ,
nɩkpa -kamö gbʋ 'wʋ kwa -n 'kʋa lu.”
5Sa -aa -lɛ-a 'mö slɛnɩ -yɛ -Lagɔɔ 'möslɛnɔ 'pɩ 'pa-a, sa -a ji-a gba 'nɩ? -Lagɔ -kaya -aa 'jinylolie yɛ ʋ yʋlʋ -gömö -la-a, ʋ'ʋɔ cɛ 'mö slɛnɩ-a? 'Pɩnɩkpaa swɩ n -wʋ-ɔ la'a gba 'le. 6'Bhëbhë! -Lagɔ nɩ 'mö slɛnɩ-ɛ, sa ʋ ji-e 'mö-a 'pɩnɩkpa -zijle 'mö tutunʋɔ 'nɩ? 7-Mʋmʋa bhɛlɩ wa 'yɛ -sɩka'a nʋ naa: “Na yuodɩdɩɛ -yɛ -Lagɔɔ 'dɛdɛ'ɛ tulua-a, ɛ -yɛ ʋ 'nglɩ 'ghlimanɩ-ɛ, 'manɩɛ yɛ ʋ ka'a 'mö-ö -bhla 'jinylolie nʋnyɔ la 'nɩ?” 8Sa nɩkpa -wa -wʋya-a ngli nyimanɩ 'le nʋ-a -abha gba-a naa: “A-a nʋ 'jinyloli, -lie -li 'yɛ -ma ɩ 'mö 'wlʋ.” 'Mʋa nɩkpa, wa 'jinylolie 'pɛnɔ wa ji-a ghlɩɛ 'mö ʋ slɛnɩ -bha.
'Pɩnɩkpa 'bhuo 'jinyloli wa ka-a 'wlumö
9Sa ɩ sa 'mö-a zɔmö 'nɩ? -Abha 'zwiföa, -abha zi-a nɩkpa -mʋabha 'wʋɔ? 'Bhëbhë! -Wʋʋ yɛ-a, n kɩ tulua 'gamö 'bhë naa, 'zwiföa -yɛ -wa 'nɩ-a 'zwiföa glɩnɩ 'sɔ, wa 'bhuo 'jinylolie 'mötɛnɔ zɔmö wa -wʋ -bha. 10Sa ɩ 'cɛlɩɔ-ɔ -ma -Lagɔwɛlɩɛ 'bɔgʋ 'mö naa:
“'Möslɛnɩnyɔ 'nɩ -bhlɩ.
Ɔ -bhlʋ 'tɩɛ 'bhë 'nɩ -bhlɩ.
11-Mɔɔ wlumö-ö 'yɛ sɛ jɩnɩ, ɔ'ɔ -bhlɩ.
-Mɔ 'yɛ -Lagɔ 'nama, ɔ'ɔ -bhlɩ.
Wa 'bhuo, -Lagɔɔ 'yuogblʋ wa tɩ-ɛ -bha,
'n wa ji-a 'jinyloli wa dlɩa 'ye 'nyɛ.
12Wa gla'aa nɩkpɛ -mɔɔ bhë-ë 'yɛ -lie -li nʋ,
Ɔ -bhlʋ 'tɩɛ 'bhë 'nɩ -bhlɩ.
13Wa ngli -bhlee lesikpï bhlinɩ ngo banguu.
Wa nglie mɩɔ nya wa nʋnʋ-a nɩkpa yʋlʋ.
Wa nglie wɛlɩ -bhlee tɩmɛɛ glʋ.
14-Ma wa ngli gwiezʋwɛlɩ ye-e -ma.
15'Kulɩbhado'o wa bhʋ 'nɩ 'wʋ 'wɔlʋ.
16La wa -yɛ nyini, -bha wa sa-a yɛ,
'n wa tɩ-ɛ -bha ngazɩ.
17Wa'a -lɛ -gömöwlonɔɔ 'yuogblʋ jɩblɩnɩ,
18wa'a -Lagɔɔ nganɔ -gömö -ka 'lɩlɩlɩ.”
19A -ji sɛ naa, -ɩ la'a 'bhuo -ɩɩ gbʋ -Lagɔɔ gbö gba-a, -wa ɩ nyini-a, wa -li -bha, ngu 'bhuo 'yɛ -bha -Lagɔɔ 'ji 'klʋ 'wʋ 'gbɔ-ɔ, nɩkpa 'bhuo 'yɛ sɛ jɩblɩnɩ naa, -bha -Lagɔ 'ji 'klʋ gbʋ kʋa köbha 'bhë. 20-Wʋʋ yɛ-a, nɩkpɛ -bhlʋɔ 'bhë 'na -bha ʋ 'ji 'klʋ gböö -bhazʋ yɛ 'mö slɛnɩ, -ma -Lagɔɔ gbö 'mö 'jinylolie jɩblɩnɩjɩblɩnɩɛ 'bhönɩ -bhaa yɛ -bha.
Sa -Lagɔ slɛmanɩ-a -ma Zezwi 'Kli 'mö nɩkpa 'mö
21-Sɩka'a-a 'mö, -Lagɔ 'nɩ 'plɩnɩ gbö 'mö ʋ 'yɛ nɩkpa 'möslɛnɩngwa 'wʋ zʋa, -Lagɔɔ gbö -yɛ -Lagɔɔ 'mögbanɩngwa 'sɔɔ wɛlɩɛ 'bɔgʋɩ yɛ la ɩ gbʋ gba 'bhë. 22Nɩkpa -wa -Lagɔ zʋa-a 'möslɛnɩngwa 'wʋ, wa Zezwi 'Klie dlɩwʋka -yɛ -bha. -Wa la'a 'bhuo -wa ka-a Zezwi 'Kli dlɩ 'wʋ, 'mʋa -Lagɔ zʋa-a -sɩbha. Wa 'bhuo -kpö -bhlʋ wa -wʋ -bhaa yɛ -bha. 23-Wʋʋ yɛ-a, nɩkpa 'bhuo 'jinyloli wa nʋ -bha. Ɩ yɛ -Lagɔɔ 'ghlinɔ 'kadʋ 'nʋa -gömö -wʋ. 24'Bhë 'soko 'wʋ -Lagɔ zʋa-a 'möslɛnɩngwa 'wʋ ʋ ngazɩdlɩ nya, 'n ʋ zetinʋa-a -ma Zezwi 'Kli 'mö. 25'Mɔ -Lagɔ -sa-a -bha 'kɩ, ɔ dlu 'yɛ nɩkpa -wa jio la-a dlɩ 'wʋ -kaa 'jinyloli 'wʋ 'titli, -Lagɔɔ 'möslɛnɔ 'yɛ -ma ɩ 'mö 'tuluanɩɔ. -Wʋʋ yɛ-a, 'jinyloli la'a -ɩ nɩkpa nʋ la-a -tɩtɛɛ do'o, dlɩ ʋ -wʋ-a sɛ -sɩbha 'lee yɛ ʋ'ʋ -lɛ la ɩ gbʋ nɩkpa -gömö -la. 26Sa ʋ slɛnɩ-a 'mö, ʋ 'kɩ -sɩka'a tulua 'gamö, nɩkpa 'yɛ sɛ jɩblɩnɩ naa 'mö ʋ slɛnɩ -bha, 'n ʋ zʋa-a -ɔ la'a -ɔ ka-a Zezwi 'kli dlɩ 'wʋ 'möslɛnɩnyɔ 'wʋ.
27-Bhaa do'o, 'manɩluo yɛ nɩkpɛ ji-e 'mö-a -gömö gbɔ-ɔ 'nɩ? Ʋ'ʋ -bhlɩ. 'Manɩɛ yɛ nɩkpɛ bhɛlɩ-a ɔ 'yɛ kpɔtɔ 'nɩ? -Ɩ -Lagɔɔ gbö gba-a ɩ -bhazʋ -yɛ-a 'nɩ-ɩ? 'Bhëbhë! Dlɩwʋkakʋɔ 'nyizee yɛ -bha. 28-Wʋʋ yɛ-a, -a -ji sɛ naa nɩkpɛɛ dlɩwʋkakʋɔ yɛ -Lagɔ zʋɔ-a 'möslɛnɩnyɔ 'wʋ, ɛ'ɛ -lɛ sa ɔ zʋ-ɔ -bha -Lagɔɔ gböö yɛ. 29Bhlɩ'ɩ -Lagɔ, 'zwiföaa 'nyizee -Lagɔ-a 'nɩ-ɩ? Ʋ'ʋ -lɛ 'yɛ -wa 'nɩ-a 'zwiföa glɩnɩɛ -Lagɔ 'gamö? -Wa 'nɩ-a 'zwiföa glɩnɩɛ -Lagɔ ʋ glɩnɩ-a 'gamö. 30-Lagɔ, ʋ -bhlʋ tɩ -bha. -Wa glɩnɩ-a 'zwiföa -yɛ -wa 'nɩ-a 'zwiföa glɩnɩ 'sɔ, wa dlɩwʋkakʋɔ yɛ ʋ jua-a 'möslɛnɩngwa 'wʋ zʋaa. 31-Ma -ɩ la'aa 'mö, dlɩwʋkakʋɔ yɛɛ cɛ -a ji-a nʋ naa -Lagɔɔ gbö 'nɩ-a 'mö -lu 'ji -ka-a nʋɔ? 'Bhëbhë! -Ma dlɩwʋkakʋ mö -a tuluanɩ-a -Lagɔɔ gböö 'nglɩkakɩɛ.
Actualmente seleccionado:
GHLƆMÖÖ NƖKPAA 'BƆGƲ 3: BNT96
Destacar
Copiar
Comparar
Compartir
¿Quieres tener guardados todos tus destacados en todos tus dispositivos? Regístrate o inicia sesión
Bete New Testament © Bible Society of Côte d'Ivoire 1996