माथ 6
6
दान एमोक् रेयाङ
1“मेन हुसिया़रोक्पे आपेयाक् भा़क्ला़इ का़मिको होड़को सामाङरे आलोपे का़मिया, ओनको ठेन ञेल ओचोक् ला़गित् दो, बाङ खान आपेरेन सेरमारे मेनाय बाबा ठेन कुड़ा़इ दो बा़नुक्तापेया।
2“ओनाते कोयेम एमोक्रे, आम सामाङरे सिङगा़ दो आलोम ओरोङ ओचोया, फा़सिया़रा होड़को सुना़गोगकोरे आर कुलहिकोरेको का़मियेत् लेका, जेमोन होड़को ठेनको सारहाव ओचोक्, सा़रिगेञ मेतापेकाना ओनकोवाक् कुड़ा़इ दोको ञाम होरायेदा। 3मेनखान आम दो कोयेम एमोक्रे, आमाक् लेङगा ति आलोय बाडायमा, आमाक् जोजोम ति चेत् ए चेकायेदा मेनते, 4जेमोन आमाक् कोय एमोक् दो ओकोगे ताहेन, आर ओकोरे ञेञेलकानिच् आ़पुमे एम रुवा़ड़ाम।”
कोयजोङ रेयाङ सिखा़उना
(लु ११:२-४)
5“आरपे कोयजोङरे आलो पे फा़सिया़रा होड़को लेकाक्आ, एनते ओनको दो होड़को ठेन ञेलओचोक्आ मेनते सुना़गोगकोरे आर दोबा़टिया़कोरे तेङगोकाते कोयजोङको कुसिक्आ। सा़रिगेञ मेतापेकाना, आकोवाक् कुड़ा़इ दोको ञाम होरायेदा। 6मेनखान आमेम कोयजोङरे आमाक् भिता़रते बोलोक्मे, आर सिलपिञ सिञकाते ओकोरे मेनाय आ़पुम ठेन कोयजोङमे, आदो ओकोरे ञेञेलकानिच् आ़पुमे एमामा। 7आर कोयजोङरे जिहुदि बाहरेरेन होड़को लेका आलोपे बाकतावक्आ, एनते ओनको दोको बुजहा़वेदा आकोवाक् ढेर काथातेगे आँजोमोक्ताकोवा मेनते। 8एनडेखान आलोपे ओनको लेकाक्आ, एनते आपेरेन बाबा दो आपे आ़उरिपे कोयेरेगे आपेयाक् जा़रुड़ोक्आक्कोय बाडाया। 9ओनाते आपे दो नोनका कोयजोङपे,
“ए आलेरेन सेरमारे मेनाम बाबा
आमाक् ञुतुम सोनोतोक्मा;
10आमाक् राज हिजुक्ताममा,
आमाक् मोने चेत्लेका सेरमारे ओनकागे ओतरे हों होयोक्मा बाड़े,
11आलेयाक् जा़रुड़ जोमाक् तेहेञ एमालेम,
12आलेयाक् दोसको इका़कातालेम,
चेत्लेका आले हों आलेयाक् दोदोसकोले इका़कात्ताको;
13बिडा़उरे आलोम आदेरलेया,
मेनखान बा़ड़िच् खोन बाञचावलेम। एनते राज आर दाड़े आर ठोनोक जायजुग हा़बिच् आमाक्गे, आमेन।”
14एनते होड़कोवाक् घा़टकोपे इका़काताको खान आपेरेन सेरमा बाबा हों आपेयाक् ए इका़कातापेया। 15मेनखान होड़कोवाक् बापे इका़लेताको खान, आपेरेन बाबा हों आपेयाक् घा़टको बाय इका़इतापेया।
उपा़स रेयाङ सिखा़उना
16आरपे उपा़सरे फा़सिया़राको लेका आलोपे मिरलुङोक्आ, एनते ओनको दो आकोवाक् मेंत्हाँको मिरलुङताकोवा, जेमोन होड़को ठेन उक्पा़सकानको उदुगोक्। सा़रिगेञ मेतापेकाना ओनकोवाक् कुड़ा़इ दोको ञाम होरायेदा। 17मेनखान आमेम उपा़सरे बोहोक्रे सुनुम ओजोगमे आर मेंत्हाँ आप् साफायताम, 18जेमोन होड़को ठेन दो बाङ, बिचकोम ओकोरे मेनाय आ़पुम ठेन उक्पा़स ञेलोक्, आर ओकोरे ञेञेलकानिच् आ़पुम कुड़ा़ये एमामा।
सेरमा रेयाक् धोन
(लु 12:33-34)
19धा़रतिरे धोन आलोपे सोंचजोङा, ओकारे दो जा़ँरडि आर इजोक्ते बा़ड़िजोक् आर ओने ओकारे कोमबड़ो ओड़ाक् भुगा़क्कातेको कोमबड़ोय, 20मेनखान सेरमारे धोन सोंचजोङपे, ओने ओकारे बाङ दो जा़ँरडिक्ते आर बाङ दो इजोक्ते बा़ड़िजोक् आर ओने ओकारे कोमबड़ो हों बाको भुगा़ग आर बाको कोमबड़ोय। 21एनते ओकारे धोन मेनाक्तामा, ओंडेगे आमाक् मोन हों ताहेना।
होड़मो रेयाक् मारसाल
(लु 11:34-36)
22“होड़मो रेयाक् दिउहे दो मेंत् काना, आदो आमाक् मेंत् निरोलागे खान, आमाक् गोटा होड़मो मारसालगे ताहेना। 23मेनखान आमाक् मेंत् बा़ड़िच्गेताम खान, आमाक् गोटा होड़मो ञुतगे ताहेना। ओना इया़ते आमरे मेनाक् मारसाल जुदि ञुतगे खान, ञुततेत् दो हेड़ान ञुता।”
इसोर से धोन
(लु 16:13; 12:22-31)
24“ओकोय हों बारया किसा़ँड़ ठेन ओहोय गुतिलेना, एनते मित् होड़ दोए कुरुदाया आर एटागिच् दोए दुला़ड़ेया, मित् होड़ ठेने जामाड़ोक्आ आर एटागिच् दोए नेङघावेया। इसोर आर धोन ठेन गुति ओहोपे खाटाव दाड़ेलेना।”
25“ओना इया़तेञ मेतापेकाना, आपेयाक् जिवि ला़गित् आलोपे दा़ँदिक्आ, चेत्पे जोमा से चेत्पे ञुया; आर आपेयाक् होड़मो ला़गित् हों आलो, चेत्पे होरोक् बानदेया मेनते, जोमाक् खोन जिवि आर होरोक् बानदेनाक् खोन होड़मो चेत् बाङ माराङा? 26चोटरेन उडा़उक् चेंड़ेंको बेङगेत्आकोपे बाको एरा, बाको इरा आर मुरा़इकोरे बाको सोंचजोङा एनरेहों आपेरेन सेरमा बाबाय एमाको काना, आपे दो ओनको खोन बाङ दो बापे सोरोस? 27आर आपे मोदरे ओकोय होड़ दा़ँदिकाते आयाक् धा़रति टुन्डा़ङ दिनरे मित् रिपित्गान होंए जुटुच् दाड़ेयाक्आ?”
28“आर होरोक् बानदेनाक् ला़गित् चेदाक्पे दा़ँदिक् काना? टा़न्डि रेयाक् सिकियोम बाहा आ़रिबा़न्धिपे चेत्लेका हाराक्काना? बाको खाटावक्आ आर बाको ताकोया; 29एनरेहोंञ मेतापेकाना, आयाक् जोतो ठोनोकरे सुलेमान हों नोवाको खोन मित् गोटेच् लेका हों बाय साजलेना। 30आदो तेहेञ मेनाक् आर गापा चुलहा़रे खादलेक् टा़न्डि रेयाक घाँस इसोर नोनकाय साजेत् खान आरतेत्गे चेत् आपे दो बाङ? ए नासेनासे पा़तिया़उक्को!
31“ओना इया़ते दा़ँदिक्ते आलोपे मेना नोनका दो, ‘चेत्ले जोमा से चेत्ले ञुया से चेत्ले होरोक् बानदेया?’ 32एनते नोवाको सानाममा जिहुदि बाहरेरेन होड़गेको ञामबाड़ाकान; आपेरेन सेरमा बाबा दो एनतेये बाडायगेया नोवाको सानामाक् जा़रुड़ापेकाना मेनते। 33मेनखान उनियाक् राज आर सा़रियाक् ञाम माड़ाङानपे, आदो नोवाको सानामे एम जुटुच्आपेया। 34ओनाते गापा ला़गित् दो आलोपे दा़ँदिक्आ, एनते गापा दिनमा आच् रेयाक्गेये दा़ँदिक्, तेहेञ ला़गित् दो तेहेञाक् हारोनगे ढेरा।”
Actualmente seleccionado:
माथ 6: NTSPt25
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
The New Testament Books in Santhali Language © The Word for the World International and Santhali Translation Project, Nepal, 2025